Ester 9 - Biblia Dc en Mixe de Quetzaltepec

Ma ja Jutiiyë ja'ayëty myëta'aktën

¹ Ma majktëkëëk y'änyën ja mëmajkmäjtsk po'opë, mëti'ipë tyijtëpën Adar, jää ojts ja yajkutujkpë ja ënä'ämën tpëjktä'äky ets tyunëtëty jyatëtëty ja mëti'ipë ënety të tuknipëjktaakëtën, ma y'o'kta'atëty ja Jutiiyë ja'ayëty, je'eyëp ko jää tëkatsy ojts wyimpëtsëëmnë, yë'ë ojts jää myëtaknëtë ja Jutiiyë ja'ayëty.

² Maajaty ja it naaxwiinyëtë tnitänën ja yajkutujkpë Asuero, ojts tyu'ukmujkta'atë ja Jutiiyë ja'ayëty ets tjëjpkuwa'akëja'antë ja myëtsip mëti'ipë ënety të myäy të tyajtën ko yaj'ooka'anëtë. Ni pën ojts jä'ä xëëw kya'ëknipëtë'kënëtë, jä'ä ko ja myëtsipëty ojts jatëkok tsyë'ëkëtëkëtë.

³ Tëkokyë ja kutujkëntëjkëty mëti'ipë ënä'ämtëpën ma ja naax kajpnën, aakyë'ë ojts tputëkëtë ja Jutiiyë ja'ayëty, jä'ä ko yë'ë tsyë'këtëp ja Mardoqueo.

⁴ Yë Mardoqueo mëj'äämpy ojts y'awinpity ma ja kutujktaknën ets akäjpxy ojts y'ity, ni'ikyë ënety myëjwiinë kyëjääjë ja kyutujkën.

⁵ Ja Jutiiyë ja'ayëty ojts tkupujxta'atë ja myëtsiptëjk mëti'ipë ojts jyayaj'ooka'anëtën; wa'ats tyajkutëkooytyääytyë mëti'ipë ënety të jyayaj'ooka'anëtën.

⁶ Jam Susa, nimëkoxk mëko'px jam tyaj'o'ktë ja myëtsipëty;

⁷ ojts näjyëtu'un tyaj'ooktë ja Parsandata, Dalfón, Aspata,

⁸ Porata, Adalia, Aridata,

⁹ Parmasta, Arisai, Aridai ets Vaizata.

¹⁰ Ya'atë nimajkpë yë'ë ënety ja Amán y'u'unk y'ëna'k mëti'ipë ëxëëk y'ijxën ja Jutiiyë ja'ayëty; je'eyëp ko tëkokyë mëti'ipë myëët'ajtën ka'ap ojts tontë.

¹¹ Jä'ä xëëw ma ja yajkutujkpë tnijawën ko tëë ja Jutiiyë ja'ayëty may yajja'ay'ooktë jam Susa, ma ja yajkutujkpë tmëët'atyën ja kajpn mëti'ipë këwent'atyën,

¹² ënät ja yajkutujkpë t'ënëmaay ja Ester: Yë Jutiiyë ja'ayëty tëë tyaj'ooktë nimëkoxk mëko'px yë ja'ay, ëpëky nimajk të tyaj'ooktë ja Amán ja y'u'unk y'ëna'k yaa ma Susa kajpnën. ¿Tiijaty jëtää muum të tjaaktuntë yë Jutiiyë ja'ayëty ma wiinkëtypë kajpnën? Tyam nëmaaykyës tiijaty mjaaktsojkpy ets nmo'ojëty.

¹³ Tä ja Ester y'ëtsooy: Pën mijts oy xymyëtoy ets pën m'ëwatsyp, wä'än yë Jutiiyë ja'ayëty jëpom jëtu'un tuntë yë myëtsiptëjk ijxtëm ojts yë'ëjëty tjatuknipëjktaakëtën, wä'än jëpom tyajkutëytyë ja jyot nyini'kxëty ja Amán ja y'u'unk y'ëna'k ma o'ktaknën.

¹⁴ Ja yajkutujkpë ojts tkupëky. Ënet ojts yajkajpxwä'kxy ja ënä'ämën jam Susa ets ja okpë yajkutëëytyë, ja nimajkpë Amán ja y'u'unk y'ëna'k.

¹⁵ Ja Jutiiyë ja'ayëty ojts jatëkok tyu'ukmuktë ma myajkmajkts'anyën ja Adar po'o ets tyaj'o'ktë ëpëky nitëkëëk mëko'px ja myëtsiptëjkëty; je'eyëp ko ka'ap ojts nitii tpëjkëtë ets nitii tkatoontë mëti'ipë ënety ja'ay jyä'ä'ajtëpën mëti'ipë të y'ooktën.

^16-17 E ja Jutiiyë ja'ayëty mëti'ipë jëkäm kukajpnajtëpën, ma myajktëkëëk anyën ja Adar po'o jää ojts myuktë ets ja jyuuky'ajtënëty tkuwantë. Jëtu'un'äämpy ojts tyaj'o'kta'atë ja myëtsip. Jä'ä xëëw, jä'ä ojts ja myëtsip tyaj'ooktë: nitëkë'px majkmokx mil, ka'ap nitii tpëjkëtyë. Ma myajkmajkts'anyën, nän yë'ë po'o, jää ojts pyo'kxtë ets xyëëwtuuntë, xyoontaktë mëët ko ënety të myëta'aktë.

¹⁸ E jä'ä ko ja Jutiiyë ja'ayëty mëti'ipë jam Susa kukajpnajtëpën, tëë ënety myuktë ma myajktëkëëk anyën ets ma myajkmajkts'anyën ja Adar po'o, paaty ojts jää pyo'kxtë ma myajkmokx'anyën, nän yë'ë po'o xyëëwtuuntë ets xyiktë xyoontë.

¹⁹ E ja Jutiiyë ja'ayëty mëti'ipë tsënaaytyëpën ma ja mutsk kajpnën, mëti'ipë ka'ap nyapotsyëtyën, jää xyëëwtuuntë ma myajkmajkts'anyën yë Adar po'o. Tääts jää xyiktë y'ëwë'ktë ets xoontä'äky yajpatë ma ja xëëw ënety tyunyë jyätyën, nixim niyam nyämyooyëtë ja näynyamo'ojë.

Ma ja Purim tnixëëwtuntën

²⁰ Yë Mardoqueo wa'ats tkëxjaaytyääy tëkokyë wi'ix tyuunën jyaajtën ya'atë jotmay ets tuknikäjxtaay ja Jutiiyë ja'ayëty, mëti'ipë jam tsënaaytyëpën winkon ets mëti'ipë jëkämën, maajaty tnitänën ja yajkutujkpë Asuero,

²¹ ma ojts tni'ënä'ämën ets tnixëëwtuntëty, jää ma myajkmajkts anyën ets myajkmokx'anyën ja Adar po'o,

²² jä'ä ko, jä'ä xëëw jä'ä po'o ojts ja Jutiiyë ja'ayëty ja myëtsip tyajkutëkoytyë ets jä'ä xëëw jä'ä po'o ojts ja monyëtukyë y'ëxmatsëtë mëti'ipë xi'iky xony awinpijtën. Ya'atë xëëw mëj'äämpy nyäjxy, paaty ojts ja ënä'ämën tyajwë'ëmtë ko jää mëpaat ja'ay xyi'iktë xyoonta'aktë; jää näjyëtu'un tyajmuktëty ja ayajk ako'onën mëti'ipë tyukputëkëtëpën ja ëyoopëja'aytyëjk.

²³ Yë Jutiiyë ja'ayëty xëmë ojts ya'atë xëëw tuntë mëti'ipë ja Mardoqueo nyi'ënä'ämëyën ets mëti'ipë jyääyën,

²⁴ jä'äkyëjxm ko ja Amán, mëti'ipë myëtsip'ajtypyën ja Jutiiyë ja'ayëty, tëë ënety jyayaj'ooka'anëtë ma ojts nyijuy nyitookëtën;

²⁵ e ko ja Ester ojts tuk'ëwaanë ja yajkutujkpë, ënät ja yajkutujkpë nokymyëët ni'ënä'ämëy ja Amán ets y'ënäny: ko tu'kë'ëyë ja ëyo'on jotmay mëti'ipë të tjanimay të tjanitajën yë Amán ets ëxëëk jyatëty ja Jutiiyë ja'ayëty, wä'än jam tkëtakta'ay ma Amanën. Jëtu'un'äämpy yë Amán mëët yë y'u'unk y'ëna'k kyutëkooytyë.

²⁶ E paatykyëjxm ya'atë mäjtskpë xëëw ojts yajtijy Purim, Pur jeexyë yajtijy ko jeexyë je'eyë tu'ukyë. E mëëtkyëjxm ko jëtu'un ja Mardoqueo ni'ënä'ämëy ets ko t'ijxtë mëti'ipë ënety të tyuny të jyätyën,

²⁷ yë Jutiiyë ja'ayëty jëtu'un ojts tkäjpxy'atë ko ya'atë xëëw pa'u'unk pa'ëna'k mëpaat yajtuny, ma ja Jutiiyë ja'ayëtyën ets ma ja ja'ayëtyën mëti'ipë tyuktëjkëpën ja Jutiiyë ja'ay ja myëpëjkënëty; winjëmëjt ya'atë xëëw yajtunëty, nitu'kjëmëjt kyaninaxëty. Mäjtsk xëëw ja ja'ay xyëëwtuntëty ma ënety tukka'ayën ets jëtu'un yajkuuytyunëty ja ënä'ämën mëti'ipë të tkäjpxy'atën;

²⁸ ets y'ënantë ko tyaapë mäjtsk xëëwpë, niteety ni'ap y'itëty, myëjpëjkta'aktëp ja ja'ayëty, wä'än tpënëty, wä'än tmaakajpnëty, nijëna'a kyayajja'atyëkoyëty.

²⁹ Yë yajkutujkpë Ester, yë nyëëx yë Abihail, mëët yë Mardoqueo, mëti'ipë Judá ja'ayëtyën, ojts wiinkpë noky tkäxtë mëët ja kuttujkën ma tnikajpxtën ja xëëw mëti'ipë tyijtëpën Purim ets tnikajpxëtë ja mëjëyëjpë ja xëëw,

³⁰ ets tuknikäjxtë ja nimëko'px ja i'px wëxtujkpë ja kajpn mëti'ipë nyitënääpyën ja yajkutujkpë Asuero. Jap nokyjoty mëët ojts kyajpxtë ja oy aaw oy ayuk ets mëët ja näjyiiky'at näymyëku'uk'atë

³¹ ma tni'ënä'ämëtën ets ja Purim xëëw yajtunëty ma ënety të tpaatyën, ijxtëm ja yajkutujkpë Ester ets ja Mardoqueo të tni'ënä'ämëtën ma ja Judá ja'ayëtyën ets ma y'u'unk y'okëtyën. Ojts näjyëtu'un tkujayëtë ja ënä'ämën wi'ix yë ja'ay y'ayuu'atëty ets myontëty tyuktëty.

³² Ja ënä'ämën mëti'ipë ja yajkutujkpë Ester nyi'ënä'ämëyën, jap ojts tnikäjpxy wi'ix ja Purim yajnixëëtunëtyën. Tëkokyë ya'atë jap ojts yajkëxjaaytyä'äy ma tu'uk ja mëj nokyën.