Ester 8 - Biblia Dc en Mixe de Quetzaltepec

Ma ja ënä'ämën yajpëjktä'äkyën mëti'ipë ja Jutiiyë ja'ayëty tyuk'oy'atëpën

¹ Jä'ä xëëw, ënätyë ja yajkutujkpë Asuero tnamo'oy ja Ester tu'uk yë tëjk ma ijty tsyëënën ja Amán, mëti'ipë myëtsip'ajtypyën ja Jutiiyë ja'ayëty; e ja Mardoqueo ojts tninëjkxy ja yajkutujkpë Asuero, jä'ä ko yë Ester tëë ënety tuk'ëwaanë ja yajkutujkpë ko yë Mardoqueo tjämyëty.

² Ënet ja yajkutujkpë Asuero nyätyukë'ëji'tstutë ja kë'ëjiits mëti'ipë ja Amán ijty yajtuumpyën ets tmooy ja Mardoqueo. E ja Ester yë'ë ojts tuknipëky ja Mardoqueo ets tniwintsën'atëty tëkokyë winë mëti'ipë ja Amán jyä'ä'ajtypyën.

³ Ester ojts jatëkok tninëjkxy ja yajkutujkpë Asuero ets twinkujijtëy mëët ja jë'ëyën yaxën tääts t'amëtooy tpëjktsooy ets ja yajkutujkpë tunëty ja mëyajtën: tpo'otëty ets tyaj'atëkoyëty ja ënä'ämën mëti'ipë ënety ja Amán të tyajkojyën, këtiipë jëna'a jëtu'un tyunëtëty jyatëtëty ja ëyo'on jotmay ma ja Jutiiyë ja'ayëty ënety të yajtuknipëjktaakëtën y'ooktëty.

⁴ Tä ja yajkutujkpë tnajtstijëy ja tyajk, mëti'ipë aak pu'ts pujxn mëët y'oytyunyëtyën, ma ja Ester jam kyoxtänën ets t'ënëmaay ko pyëtë'ëkëty. Tääts pyëti'ky ets wya'ak'o'oyëy jam kutujkënwintum,

⁵ ets y'ënäny: Pën yë yajkutujkpë myëtoopy oy mëti'ipës yam n'amëtoowäämpyën ets pën xyänty tsyojkyp xyääntyjya'apës, wä'än tu'uk noky tyajja'ay ma yaj'akajpxtukëtyën ja ënä'ämën mëti'ipë ja Amán ojts tyajkojyën, ma tjatuknipëjktakëyën jeexyë ja Jutiiyë ja'ayëty y'o'kta'atë mëti'ipë tsënaaytyëpën maajaty ja kajpnën mëjpë mutskpë mapaat ja ënä'ämën kuttujkën y'ityën.

⁶ Jä'ä koos, ¿wi'ixës jëtu'un jotkujk njuuky'atëty pën nija'apës koos ja njëëky nmëku'uk ets ja nmëkunaax nmëkukajpn y'o'kta'aja'antë?

⁷ Ënet ja yajkutujkpë Asuero t'ëtsoowinpijty ja Ester ets ja Mardoqueo, mëti'ipë Jutiiyë ja'ayëtyën: Ëjts tëëjës ntukë'ëtëjkëtyä'äy ja yajkutujkpë Ester tëkokyë jënu'un yë Amán winë të tmëët'atyën ets mëët ja nyijëën nyitëjk ets ja Amán nän tëë tyimyajyo'ktëy, mëti'ipë ojts tjayaj'o'kta'aja'anyën ja Jutiiyë ja'ayëty.

⁸ Tyamës nyajkutuky nxëëwkyëjxmës, ets miits yam ntuknipëjktëp xyjya'atëty ja noky ijxtëm mëpaat ja jutië ja'ayëty tuk'oy'atën ets xytya'atëty mëët ja kë'ëjiits mëti'ipë ja yajkutujkpë kyë'ëjiits'ajtypyën. Tu'uk ja noky mëti'ipë të tyajkojyën yë yajkutujkpë ets mëti'ipë të tsa'ayën mëët ja kyë'ëjiits ets ëpëky të twinkukäätsë, ka'ap tjëkyepy pën tyajma'atëty.

⁹ Ja yajkutujkpë ja jyääpyëtëjk ënätyë ojts yajmëkajpxta'atë. I'px tëkëëk ënety ja mëtëkëëk po'opë y'äny, ja Sivan po'o. Tëkokyë mëti'ipë ja Mardoqueo nyi'ënä'ämëyën yajkujaaytyääy ets yajtuknikäjxtë ja Jutiiyë ja'ayëty, yajkutujkpëtëjk ets kutuunktëjk ma ja mëko'px ja i'px wëxtujkpë ja kajpnën, mëti'ipë jam India ets jampaat Etiopíë yajpatpën; aakjëtu'un ja noky yajjaay tä kyajpxtën ets wi'ix ja tja'atën. Ja Jutiiyë ja'ayëty ojts ja nyoky yajtuknikäxtë tä kyajpxtën ets jya'atën.

¹⁰ Ja noky, yë'ë ojts kë'ëm tim tsyä'äy ja yajkutujkpë ets ojts näjyëtu'un twinkukäätsë, kë'ëm ojts ja kyë'ëkaa jam tpëjktä'äky. Ko yajjaaytyääy ja noky, tääts ja kunoky tmëtso'ontë. Ja kunokyëty kwaaykyijxy tmëjëtijtë ja noky. Jä'ä yajtuuntë ja kwaay mëti'ipë ja yajkutujkpë jyä'ä'ajtypyën. Tääts poj'am jya'ajtaay kajpntum ja nija'awën.

¹¹ Ma ja nokyën, jap kujayë myiny ma ja Jutiiyë ja'ayëty yajtuknijawëtën; ko oymyaakajpnëty ma muum yajpaatën, ënätyë mëpaat tyu'ukmuktë ets tkuwa'antëty ja jyuuky'ajtënëty; yë'ëjëty, myëët'ajtëp ja kuttujkën ets tyaj'ooktëty ja myëtsip mëti'ipë näjyëtu'un yaj'ookanëtëpën ets tjä'ä'atëty mëti'ipë ënety yajtukni'oktutëpën; wä'än yë'ëjëty ye'etyëjkpë to'oxytyëjkpë, mëjja'ay mutskja'aypyë.

¹² Ya'atë ënä'ämën, jä'ä ojts yajtuknipëjktaakë ets tu'kxëëyë tyunëtëty jyatëtëty ma ja mutskëtypë kajpnën mëti'ipë nyitënääpyën ja yajkutujkpë Asuero; jä'ä xëëw yajpëjktäky jëtu'un tyunëtëty jyatëtëty, ma majktëkëëk y'änyën ja mëmajkmäjtsk po'opë, mëti'ipë tyijtëpën Adar.

¹³ Tu'uk ja ënä'ämën ojts wyi'imy mëti'ipë yajkajpxwa'kxëpën ets ni'ëmukë ja kajpn yajtuknijawëtëty, jëtu'un'äämpy ja Jutiiyë ja'ayëty nyänyipëjktaakëtëty ets ëxëëk tuntëty ja myëtsip mëti'ipë ënety ëxëëk të tyunëtën.

¹⁴ Tä ja yajkutujkpë ojts tni'ënä'ämë ets ja tyuunpëtëjk tmëtsoontëty kwaaykyijxy ja noky ets poj'am ye'eywya'kxtaaytyë kajpn kajpn, ya'atë ënä'ämën ojts jam näjyëtu'un yajkajpxwä'kxy ma Susa kajpnën.

¹⁵ Jä'ä xëëw ja Mardoqueo jap pyëtsiimy ma ja kyutujktaknën, jä'ä wyit tyuktëjkëy mëti'ipë ja yajkutujkpëtëjk wyit'ajtëpën; jä'ä wyooxyëty poop ets yëktsuxk, ojts ja pu'ts pujxn kujän tpëjktä'äky ma kyëpajkën ets nyätyukniyä'pë tu'uk ja mëjwit, tsapts wyooxyëty, oywyit. Tä ja mayjyä'äy tyëjkëtyë yaxpë jojkpë mëët ja mëj xoontakën;

¹⁶ ja Jutiiyë ja'ayëty jëtu'un nyäjya'awëtyë tä xëëw jeexyë pyëtsimyën koots it, akujk jotkujk nyäjya'awëtyë tii yowë tyimpëjk tyimpatëp.

¹⁷ Maajaty ja kajpnën mëjpë mutskpë, ma jyä'äjtyën ya'atë ënä'ämën mëti'ipë ja yajkutujkpë ojts tkäjxwä'kxyën, ja Jutiiyë ja'ayëty yajxon tukxoontaktë, ojts may tnixëëwtuntë ets may kyääytyë y'uktë. Ëpëky ojts ja ja'ay ja jampë kyukajpn'atën may tpuwa'akëtë ja Jutiiyë ja'ayëty ets jëtu'un nyäyajnajxëtë Jutiiyë ja'ayën, jä'ä ko t'ijxnëtë aak kutsë'ëkë ja Jutiiyë ja'aynyë.