Ester 5 - Biblia Dc en Mixe de Quetzaltepec

Ma ja Ester tninëjkxyën ja yajkutujkpë

¹ Kom tëkëëk xëëw ojts ja Ester nyäxyoxyë mëët ja wit tujkxy mëti'ipë to'oxytyëjktëjk wyit'ajtëpën mëti'ipë nyiye'etyëjk'ajtëpën ja yajkutujkpë ets ojts tninëjkxy ja yajkutujkpë jam ma yajkutukyën. Jap nyäjxy tëjkwiiny, jap wya'ak'a'awëy wintuuytsyow ma ja yajkutujktaknën.

² Ko ja yajkutujkpë t'ijxy tam tyänë ja yajkutujkpë Ester, janty yujy janty tëtä'äky ojts nyäpyëjktä'äkyë mëët ja Ester, ënätyë tuknikäjpy ja tyajk mëti'ipë oytyunyën mëët ja pu'ts pujxn mëti'ipë kyë'ëkap'ajtypyën ets jä'ä mëët tukmëjwo'ony.

³ Tä ja yajkutujkpë yajtëëwë: ¿Tii mjajtëp mkëpäjtëp, mijts yajkutujkpë Ester? ¿Tii mtsojkpy? Tyam mijts n'ënëëmë ko oy xytyim'amëtowëty yë n'ënä'ämënës nkutujkënës, mijts nmo'ojëp yam kujkwä'kxy. Ënet ja Ester y'ëtsooy:

⁴ Mijts yajkutujkpë, ¿wi'ix tëy oy xy'ëk'ëtsoowinpitëty ya'atë aaw ayuk mëti'ipë ntukmëtowäämpyën? Ëjts yë'ëjës ntsojkpy ets jeexyë mijts tyam jam myajpaaty ma ja ka'ayën ukën nipëjktaakënës, mijts nixëëtunäämpy, ntsojkpyës näjyëtu'un xywyowëty yë Amán. Ënet ja yajkutujkpë ënätyë ni'ënä'ämëy ets y'ënäny:

⁵ Nëjkx tim tyam ixta'atë yë Amán ets xyajmintëty, wä'än tyajpajämyëëtë yë Ester. Jëtu'unts ja yajkutujkpë ets ja Amán ojts nyëjkxtë jam ma ënety ja Ester të tnipëjktaakën ja ka'ayën ukën.

⁶ E tam ënety jëtu'un kyäytyë, ko ja yajkutujkpë t'ënëmaay ja Ester: Ester, amëtoowkës tii mtimtsyojkpyën, tyam nmo'ojëty, oy yë'ë xytyim'amëtowa'anëty kujkwä'kxy yë nkutujktaknës.

⁷ Tä ja Ester y'ëtsooy: Yi'iyës ntsojkpy ets yi'iyës n'amëtoopy:

⁸ Pën yë yajkutujkpë janty ënaanp koos xytsyoky xyjyawë, pën ënaanp ko xymyo'oja'anyës tiijës ntimy'amëtoopy, yë'ëjës yam jatëkok n'amëtowäämpy ets yajkutujkpë mëët yë Amán jam jatëkok myinëty ma wiinkpë ja ka'ayën ukën nnipëjktaakënës, ma jatëkok nnixëëtuna'anyën mijts yajkutujkpë. Jäänëmës nikajpxëty mëti'ipës yë yajkutujkpë xy'amëtoopën.

Ma ja Amán tnipëjktaakën tu'uk ja kepy ma tyo'ktëyä'änyën ja Mardoqueo

⁹ Ko ojts yë Amán jam tsyo'onë ma ënety të kyäy të y'uuktën, janty jotkujk pyëtsëëmnë ets janty ku'uxyë; je'eyëp ko jää ojts jatëkok ja jyot myä'äty ko twinku'ijxëy ja Mardoqueo jam tëjk'ëkë'ëm, ko ka'ap wya'akë'ëky, ni'ikyë wiinktsow nyajts'ix nyajtskowë ko ja Amán nyäxy, jëtu'un ja Mardoqueo nyäpyëjktä'äkyë ka'ap yowë timy'ijxpaaty ja Amán.

¹⁰ Je'eyëp ko ja Amán ka'ap ënätyë tyajkëxë'ky wi'ix yajxon jyoot'anpëkyën. E ko jam jyä'äjty ma tyëjkën, ënät tmëkajpxmujktaay ja myëku'uktëjk mëti'ipë mëët oy nyäjyawëtyën, ojts tmëkäjpxy näjyëtu'un ja tyo'oxytyëjk, mëti'ipë xyëëwajtyp Zeres,

¹¹ ets tukmëmëtyaktaay wi'ix ënety tmëëtëtyën ja wit meeny mëj këjää, wi'ix nyimayëtyën ja y'u'unk y'ëna'k ets wi'ix ja yajkutujkpë të myo'oyën ja ënä'ämtakn kutujktakn, yi'iyë atu'uk këtiinëm ja myëku'uktëjk ets wi'ix ni'ik mëj'äämpy të yajnaxyë.

¹² Ets ka'ap yi'iyëty, tyaa näjyëtu'un t'ënëmaay: Nen tëëjës näjyëtu'un ja Ester xywyoy kääpyë, ëjts atu'uk të nyajwoy mëët yë yajkutujkpë Asuero, ma xyëëw të yajtuknipëjktaakën; e tyam tëëjës nyaj'ënëmaaykyojnëpë etsës jatëkok nnëjkxëty jëpom kääpyë mëët ja yajkutujkpë ma Ester tnixëëwtuna'anyën ja yajkutujkpë.

¹³ Tii tëy ka'ap xyajjotkujk'atyës, yë'ë tääpë jaaypyo'kxyjyä'äy, Mardoqueo, mëti'ipë Jutiiyë ja'ayën, jampë y'u'unyën këmoon tëjk'ëkë'ëm. Ëjts oyës jënu'un mëj'ajtën kuttujkën njamëëtëty pën tääpë ja'ay nwinku'ijxëpës, yë mëj'ajt kuttujkën ka'ap nitii tsowëty.

¹⁴ Ënet ja tyo'oxytyëjk ets ja myëku'uktëjk ojts y'ënë'ëmxëty: ¿Tii ko tu'uk xykyayaj'oyë o'kpäjn? Jä'ä xyajkëjxm'atëty majkmajkts xajpk ja kujkm ets nëjkx jopy xy'ënëëmë yë yajkutujkpë wä'än tni'ënä'ämë yë Mardoqueo ets yajyo'ktëyëty. Jëtu'unts jopy mnëjkxëty kääpyë ukpë mëët yë yajkutujkpë akujk jotkujk. Katii xykyamëmay xykyamëtajëty. Tyaapë jëtu'unpë winma'any oy ojts tmëtoy yë Amán, ojts tjanty'oytyuny ja o'kpäjn.