Ester 3 - Biblia Dc en Mixe de Quetzaltepec

Mardoqueo ets Amán

¹ Jëtu'un ja xëëw jëmëjt tpaty ma ja Amán ojts mëj'äämpy ja yajkutujkpë pyëjktä'äkyën. Amán, Hamedata yë tyeety xyëëwajtyp, Agag y'u'unk y'ok, ja yajkutujkpë kyutënaay ma ja naax kajpnën.

² Tëkokyë ja'ayëty mëti'ipë myëtuuntëpën ja yajkutujkpë, aak myëjpëjktaktëp ets aak wyinkoxtënaaytyëp ijty yë Amán, oymyaajëty ko muum wyinnaxëtë aak wintak naaxkoowtëp ja'ayëty, jä'ä ko jëtu'un ënety ja yajkutujkpë të tuknipëjktaakë; e ja Mardoqueo ka'ap tpatuuny jëtu'unpë ja ënä'ämën.

³ Ënet ja tuunpëtëjkëty mëti'ipë myëtuuntëpën ja yajkutujkpë tyajtëëwtë ja Mardoqueo tiikyëjxmën ko ka'ap tpatuny jëtu'unpë ja ënä'ämën mëti'ipë ja yajkutujkpë të tpëjktä'äkyën.

⁴ Xëmë winjëpom ijty tjantyyajtëwtë, e ja Mardoqueo ka'ap nitu'k'aaw y'ëtsoy. Ënet ojts tuk'ëwaanëtë ja Amán ets t'ëtsë'ëkëja'antë ja Mardoqueo ets t'ixa'antë pën je'eyëm jëtu'unpë ja winma'any tmëët'aty, jä'ä ko yë'ë tëë ënety tnikäjpxy ko jyutiis ja'ayëty.

⁵ E ko ja Amán tjanty'ijxy ko tëytyëm ko ka'ap ja Mardoqueo kyoxtänë ko nyäxy, ënät ojts yajxon jyänty jyoot'anpëky;

⁶ e jä'ä ko tëë ënety tnijawë ma tsyoonyën ja Mardoqueo, paaty ja winma'any tpaty ko ka'ap yi'iyëty atu'uk timyaj'ooka'any. Ënet tyëjkëy winma'any ixtääpyë wi'ix mëpaat tëkokyë ja Jutiiyë ja'ay tyajkutëkoyën mapaat ja yajkutujkpë Asuero ja naax kajpn tnitänën.

Ma ja ënä'ämën yajpëjktä'äkyën ko kyutëkooytya'atëty ja Jutiiyë ja'ayëty

⁷ Ma mëtu'kpo'o tsyo'ontä'äkyën jajëmëjt, mëti'ipë yajtijpën Nisán, ma majkmäjtsk jëmëjt y'apetyën ma ja Asuero yajkutukyën, jää t'ijxpëtsëëmtë ja xëëw po'o jëna'a mëpaat y'ëktuny y'ëkjatyë ja Amán ja wyinma'any, jää ojts mëtëy tukka'ay ma majktëkëëk y'änyën ja mëmajkmäjtsk po'opë, mëti'ipë yajtijpën Adar po'o.

⁸ Ënet ja Amán t'ënëmaay ja yajkutujkpë Asuero: Maajaty ja yajkutujkpë t'ëne'emyën ja naax kajpn, tää tu'uk kajpn mëti'ipë tëkatsy juukyajtpën; wiink ja wyinma'any tmëëtëty, ka'ap jyëtu'unëty tä ja nimaypyë ja kajpnën, jä'ä ko ka'ap tpatuntë ja ënä'ämën mëti'ipë mijts yajkutujkpë të xyjyanikäjpxyën. Tyaapë kajpn ka'ap y'oyëty ko je'eyëm yajpaat'ëtë'ëtsy ma mijts m'ëne'emyën myajkutukyën.

⁹ E paaty yam tu'uk winma'any njayaka'anyës ets jeexyë tu'uk yë ënä'ämën yajpëjktä'äky ma yajnikäjpxyën wä'än tääpë naax kajpn timkyutëkoy, ëjts tyamës kë'ëm n'ëna'any koos nyaka'any tëkëëk mëko'px ja i'px majk mil tsim, aak poop pujxn, maas ntukë'ëtëkëja'anyën yë kutuunktëjkëty ets jam nyipätëty ma ja yajkutujkpë ja wyit myeeny tyaj'itën.

¹⁰ Ënet ja yajkutujkpë nyätyukë'ëji'tstutë ja kyë'ëjiits ets tmooy ja Amán, mëti'ipë ënety myëtsip'ajtypyën ja Jutiiyë ja'ayëty.

¹¹ Tääts t'ënëmaay: Mijts jä'ä'at tääpë poop pujxn. E mëëtpë tääpë kajpn mëti'ipë mnikäjpxypën, mijts mnija'ap wi'ix xytyunëtyën.

¹² Ma majktëkëëk y'änyën ja mëët tu'kpo'opë, jä'ä jëmëjt ojts yajmëkajpxmuktë ja jaaypyëtëjkëty mëti'ipë tuuntëpën ma ja yajkutujkpën, ojts yajtuk'ënä'ämtë tja'atëty ja ënä'ämën mëti'ipë të tnipëjktaakën ja Amán ets yajtuknikäxtëty ja mutsk yajkutujkpëty mëti'ipë yajpatëpën ma ja it naaxwiinyëtën mëti'ipë nyitënääpyën ja yajkutujkpë Asuero ets ja kutuunktëjkëty mëti'ipë kajpn kajpn yajpatëpën. Ya'atë ënä'ämën jëtu'un yajjaay tä ja naax kajpn ënety ja aaw ayuk tkajpxtën nijä'äjaty, ojts ja yajkutujkpë xyëëw yajkëxja'ay ets yë'ë tsaay ja noky mëët ja kyë'ëjiits,

¹³ tä yajkäjxwa'kxtaay ja ënä'ämën maajaty ja yajkutujkpë Asuero tnitänën. Ma ja nokyën jä'ä jap kujayë ijtp ko y'o'kta'atëty ja Jutiiyë ja'ayëty tu'kxëëyë, mëj mutsk, yä'äy to'oxy ets yajpëjkëtya'atëty winë mëti'ipë myëët'ajtëpën. Ja xëëw mëti'ipë ënety të yajpëjktä'äkyën, jää ojts tukka'ay ma majktëkëëk y'änyën ja mëmajkmäjtsk po'opë, mëti'ipë yajtijpën Adar.

¹⁴ Ya'atë noky ma ja ënä'ämën myinyën, ojts nyikojtu'uty may ets yajkäjxwa'kxtaay oymyaa'it myaanaaxwiinyëtëty, oymyaakajpnëty maajaty ënety tnitänën ja yajkutujkpë Asuero; jëtu'un ja ja'ayëty nyäjyëjp'ixëtëty ko ya'atë ja xëëw po'o tpaatëty.

¹⁵ Ja noky ënätyë ye'eywya'kxtaay, jä'ä ko jëtu'un ënety ja yajkutujkpë të tni'ënä'ämë, ya'atë noky ojts jam Susa yajkajpxwä'kxy. E ja yajkutujkpë uktëp mukëtëp ënety jap mëët ja Amán, tyam ja ja'ayëty mëti'ipë jam Susa kukajpnajtëpën myoontëpë tyujktëpë.