Esdras 7 - Biblia Dc en Mixe de Quetzaltepec

Ma ja Esdras ets ja myëku'uktëjkëty jya'tën jam Jerusalén

¹ Kom ok, ma ënety yajkutukyën yë Artajerjes jam Persië, ojts jam jyuuky'äty tu'uk ja'ay mëti'ipë xyëëwajtypyën Esdras, yë'ë y'u'unk y'ok yë Seraías, yë Azarías ets Hilquías,

² Salum, Sadoc, Ahitub,

³ Amarías, Azarías, Meraiot,

⁴ Zérahías, Uzí, Puquí,

⁵ Abisúa, Finees, Eleazar ets Aarón, mëti'ipë më''ëka'any teety'ajtën.

⁶ Yë Esdras mëj'ijxpëky ja'ay ijty, ojts ni''ijxpëkë Wintsën tyiyajtën, mëti'ipë Israel ja'ayëty y'ëwtajtëpën, mëti'ipë yajmooyën yë Moisés, ya'atë Esdras putëjkëyëp ijty mëjwiin këjää Wintsën, paatykyëjxm ko ijty tii winë t'amëtoy, yë yajkutujkpë Artajerjes mooyëp ijty. Jëtu'un'äämpy yë Esdras wyimpijty jatëkok jam Jerusalén,

⁷ Babilonyë tsyo'ony mëët teetytyëjkëty, Leví ja'ayëty ets ja'ayëty mëti'ipë ëëwtëpën, mëti'ipë tsajptëjktuuntëpën ets mëti'ipë tëjk këwent'ajtëpën ma ja tsajptëjkën, kom wëxtujk jëmëjt ma ënety yajkutukyën yë Artajerjes.

^8-9 Ja Esdras yi'iyë tu'ukyë ja Wintsën tyimtuk'ijxpejtyp, tä tsyo'ony jam Babilonyë ma tyu'uk anyën ja mëët tu'uk po'opë, ma wyëxtujk jëmëjtpetyën ma yajkutukyën ja Artajerjes ets jyäjty jam Jerusalén ma tyu'uk anyën ja mëmëkoxk po'opë nän jää jëmëjt.

¹⁰ Yë Esdras tëë ënety jyot wyinma'any tu'ukyë tpëjktä'äky ko t'ixpëka'any ets tpatuna'any ja Wintsën ja y'ënä'ämën tyiyajtën ets tukni''ixëja'any ja Israel ja'ayëty wi'ix ja Wintsën ja kyutujkën ets y'ënä'ämën tyajminyën.

¹¹ E tsyaats tu'uk ja noky ojts yajnijaaytyu'uty mëti'ipë ja yajkutujkpë Artajerjes myooyën ja Esdras, mëti'ipë teety'ajtpën, yaj'ijxpëjkp ets ixpëkyjyä'äy, mëti'ipë yajxon të tnijawën ja Wintsën ja y'ënä'ämën tyiyajtën mëti'ipë ja Israel ja'ayëty y'ëwtajtëpën.

¹² Tyam ja yajkutujkpë Artajerjes tkajpxpo'kxy ja teety Esdras, yaj'ijxpëjkpë, mëti'ipë nyija'apën ja ënä'ämën tëyajtën ja Wintsën ja jyä'äy tsajpjotmëpë yajpaatyën.

¹³ Tëës ënä'ämën nyajwë'ëmy ma tëkokyë yë Israel ja'ayëtyën mëti'ipë yaa ijtëpën tsënaaytyëpën ma ja it naaxwiinyëtën mëti'ipës n'ëne'empyën ets nyëjkxëty mëët mijts jam Jerusalén pën nëjkxantëp, wä'än teetyëty ëkë wä'än Leví ja'ayëty.

¹⁴ Jä'ä ko yë yajkutujkpë ets niwëxtujkpë jyä'äy mëti'ipë ëëwij kajpxwijtëpën, yë'ë yam mkäjxëtëp ets nëjkx xy'ixy tyuny jam Judá ets jam Jerusalén, jëtu'un tä jap myinyën kuja'ay ja ënä'ämën tëyajtën ma mnokyën mëti'ipë mëët'ajtypyën.

¹⁵ Mënëjkx yë pu'ts pujxn ets poop pujxn mëti'ipë yë yajkutujkpë ets kyajpxwijpëtëjk myooytyëpën kë'ëmwinma'any ja Israel ja'ayëty ja Tyiosëty, jampë yajpaatyën Jerusalén,

¹⁶ ets tëkokyë ja pu'ts pujxn poop pujxn mëti'ipë mtimpyätypyën yaa Babilonyë ets näjyëtu'un ja ayajk ako'onën mëti'ipë ja'ay yajktëpën, mëti'ipë teety yajktëpën ets jam tyunëty ma ja tsajptëjkën.

¹⁷ Yë'ës mtukjuyëp ja tsajpkaa ets ja tsajpkaa ëna'k, ets tsajppax ets ja kupixyny, mëët ja nyi'ujts pajk tä yë tsajpmokën ets nëëjën, mëti'ipë mtukwintsë'ëkëtëpën ja Wintsën, jam ma wintsë'këntyaknën mëti'ipë jap tsajptëkoty yajpatpën jam Jerusalén.

¹⁸ E mëti'ipës natëjkëpën mijts kë'ëm ixtë maa xyajtuntë ets wi'ix yë Wintsën mwinma'any mo'ojëtën.

¹⁹ Yi'iyë tëy yë apëjk atu'unën mëti'ipë yam myajtukë'ëtëkëpën jam xykyë'ëyakëty ma ja tsajptëjkën, kë'ëm xymyo'ojëty yë mWintsën Dios mëti'ipë jam Jerusalén yajpatpën.

²⁰ Kë'ëm jam mijts xyjyaaknijawë tiijaty myajmëyäjtyp, jam xypyaatëty ma ya'atë kutujkëntëjk tyaj'itën winë pëjkë'ëky.

²¹ E ëjts yajkutujkpë Artajerjes, tyamës ja ënä'ämën npëjktä'äky ets ja kutuunktëjkëty jampë yajpaatën xëëwkëtä'äky wiinkonpë ma Éufrates nëëjën ets tmo'otëty tii tyim amëtoowpyën yë teety Esdras mëti'ipë yaj'ijxpëjkpën,

²² jä'ä tmo'otëty, tëkëëk mil ja tëkëëk mëko'px apëjkën yë poop pujxn, i'px mäjtsk mil apëjkën yë tsajpmok, mäjtsk mil ja mäjtsk mëko'px apëjkën yë uuky mëti'ipë tsatym nyëëjën, mäjtsk mil ja mäjtsk mëko'px apëjkën yë on ets kaan jëtu'un tä tyajmëyatën.

²³ Tëkokyë tii tyim amëtoowpyën yë Wintsën tsajpjotmëpë y'ityën, tyam yajyakëty ënätyë, këtiipë nëkoo tii ëyo'on xynyimi'inmëty ma ëëtsajtëmën ets ma ja u'unk ëna'kën mëti'ipë yajpatëpën maajaty ja naax yajnitänën.

²⁴ Mëk xyjyä'ämyätstëty ko ja'ayëty mëti'ipë tuuntëpën ma tsajptëjkën, tä yë teetyën, Leví ja'ayëty, tsajptëjk këwent'ajtpëty, tsajptëjk atënääpyëty, pätpë ja'axpëty mëti'ipë tuuntëpën ma tsajptëjkën ka'ap tjëkyepy kyëpätëty ets ka'ap tjëkyepy ni'ikyë tii n'amëto'owmëty.

²⁵ E mijts Esdras, mëti'ipë mjajtyp mnija'apën, mëti'ipë Wintsën të mo'oyën, tuknipëk yë ja'ay mëti'ipë yajkutukëpën ets ënä'ämëpën, mëti'ipë pyaye'eyëpën ja nëë poky ma ja naax kajpnën jam Éufrates, mëti'ipë nyija'awëtëpën ja Wintsën ja tyiyajtën; e mëti'ipë ka'ap tnijawëtën tukni''ixëtë.

²⁶ Pën ka'ap tpatuny ja Wintsën ets ja yajkutujkpë ja y'ënä'ämën, wä'än t'ooky, ëkë wä'än tyaj'ixkexy, wä'än tkuyäky ëkë wä'än tyajtsumy.

Ma ja Esdras kyajpxtä'äkyën

²⁷ Ënet ja Esdras tmëpëjktsooy ja Wintsën ets t'ënëmaay: Kënu'kxy mëjjawë mijts Wintsën teety m'ity mëj këjää, mëët ko të xy'atëk të xytyuktëkë ja yajkutujkpë ets tmëmay tmëtajëty ja mtsajptëjk jampë yajpaatyën Jerusalén,

²⁸ ets mëët ko tyajnikëxë'ëky ja y'oyjyot y'oywyinma'any ma ja yajkutujkpën ets ma ja wintsëntëjkën ets ko të xymyo'oyës ja amëk'ajt jotmëk'ajtën ets tyu'ukmuktë ja mëjja'aytyëjkëty, Israel ja'ayëty ets të yajkäjpxy'äty ko jatëkok nwinpita'antës jam Jerusalén.