Esdras 5 - Biblia Dc en Mixe de Quetzaltepec

Ma ja tsajptëjk jatëkok yajkoj'oyën

¹ Ja Dios ja kyäjpxynyajxpëtëjk mëti'ipë txëëwajtëpën Hageo ets Zacarías, Idó myaank nimäjtsk. Ojts tukmëmëtya'aktë ja Judá ja'ayëty ets ja Jerusalén ja'ayëty mëti'ipë ënety ja Wintsën të tyukmëtowëtën, mëti'ipë Israel ja'ayëty Tyios'ajtëpën.

² Ënet ja Zorobabel, Salatiel myaank ets Josué, Josadac myaank tyëjkëtyë tuunpë ets jatëkok tniwa'këtyë ja tsajptëjktuunk jam Jerusalén, e ja Dios ja kyäjpxynyajxpëtëjk jä'ä jam tyimmëët'ajtyp ets tputëkë.

^3-4 E ja Tatenai, mëët ja Setar-boznai ja myëku'uktëjk, mëti'ipë yajkutujkpën ma ja naax kajpnën jampë yajpaatën winkon ma ja Éufrates nëëjën, ojts nyëjkxtë ets t'ënëmaaytyë: ¿Pën të m'ënä'ämëtë ets ya'atë tsajptëjk xynyiwa'akëtëty ets xykyoj'oyëtëty, ix jam ja kepy të xyajpäjtaaynyëtë? ¿Nikajpxtë tiijaty ja'ay txëëwatë mëti'ipë tyaapë tuunk nyiwintsën'ajtëpën?

⁵ E ja Wintsën mëët jä'äkyëjxm ko yë'ë kë'ëm Kyëwent'ajtyp ja jutië ja'ayëty mëti'ipë ja tuunk yajtu'uye'eytyëpën, ka'ap ojts ja tuunk wya'akwë'ëmy, je'eyëm tyu'uye'ey; koonëm ja aaw ayuk tuknikäjxtë ja yajkutujkpë Darío ets jä'ä t'ëwxijtë ja Darío ja y'ëtsoowinpijtën.

⁶ Ojts tu'uk ja noky tnijaaytyu'utë mëti'ipë kyäjxtën ja Tatenai, jampë yajkutukyën Éufrates winkon mëët ja Setar-boznai ets ja myëku'uktëjk jampë näjyëtu'un y'ënä'ämtën winkon ma Éufrates nëëjën,

^7-8 jëtu'un ja noky y'ënä'äny: Ma mijtsën yajkutujkpë tyam ëëts ja kajpxpo'kxën nyajnaxtë, nikajpxa'antës ko tëëjës ntukjëtijtëtya'atë ja Judá y'itjot ets tëëjës n'ixtë ja mëj Wintsën ja tsyajptëjk, mëti'ipë jam ja Israel ja'ayëty tyuunk'ajtëpën, mëjatyëty ets oyëty ja tsaa mëti'ipë yajtuuntëpën. Tyam kepy yam tyukniwojpnëtëp ja potsy, poj'am ja tuunk t'ëkyajtu'uye'eynyëtë.

⁹ Tëës nyajtëwtë ja jutië ja'ayëty mëti'ipë nyiwintsën'ajtëpën ja tuunk, pën ja y'ënä'ämën pyatuunëtëp ko ja tsajptëjk tkoj'oyëtëty ets ja potsy tkepywyinwopëtëty,

¹⁰ tëëjës näjyëtu'un nyajtëwtë tiijaty ja ja'ay xyëëwajtëp mëti'ipë nyiwintsën'ajtëpën ja tuunk ets yajkuja'ajëty, jëtu'un yajtuk'ëwaanëty ja yajkutujkpë.

¹¹ Yë'ëjëty jëtu'un të y'ëtsowtë ko yë'ë y'ëwtajtëp yë Wintsën tsajpkëjxmëpë ets naaxwiinypë y'ityën ets ko tyam yë'ë y'akojëtëp ja tsajptëjk mëti'ipë ojts tëëyëp kyojyën ma yajkutujkyën tu'uk ja mëj'ënä'ämpë ma Israel ja'ayëtyën.

¹² Näyjyëtu'un të nikajpxtë ko ojts ja y'ap y'okëty ja Tyios tyajjoot'anpëktë mëjwiin këjää, paaty ojts kyë'ëyakëtë ma ja yajkutujkpën Nabucodonosor jampë Babilonyë yajkutukyën, ma Caldeo ja'ayëtyën; e yë'ëts ojts tjijtë'ëky ya'atë tsajptëjk ets ja mayjyä'äy yaj'ëxwojptaay.

¹³ Kom ok tu'uk ja yajkutujkpë mëti'ipë xyëëwajtypyën Ciro, Babilonyë ja'ay ojts tyajkutuky ets ya'atë tsajptëjk jatëkok yajkoj'oyëty.

¹⁴ Tëës näjyëtu'un nyajtukmëmëtya'aktës ko ja yajkutujkpë Ciro ojts jatëkok jap tjuuty ma ja Babilonyë ja tsyajptëjkën ja pu'ts pujxn ets poop pujxn mëti'ipë ënety ja Nabucodonosor të tyajpëtsëmyën ma ja tsyajptëjkëtyën ja Israel ja'ayëty jam Jerusalén ets tukë'ëtëjkëy yë Sesbasar mëti'ipë ënety yajkutujkpën.

¹⁵ Ciro ojts tuknipëky yë Sesbasar ets tkë'ëyajkta'ajëty ya'atë apëjk atu'unën ma Israel ja'ayëty tsyajptëjkëtyën, wä'än jatëkok tkoj oyëtë ja tsajptëjk jämyëm ma ojts y'ëk'ijtpën.

¹⁶ Tä ja Sesbasar tjanty yajtso'ontäky ja tuunk, tä tnitajëy ja tsajptëjk ja nyipotsy'ëjx; tyampaat yë'ëtsën ëëts ntuunk'ajtëp, ka'anëm y'o'oyëtyä'äynyëm.

¹⁷ E tyam jëtu'un ëëts yam nja'ënëëmëja'antë ja yajkutujkpë ets jeexyë ja noky yaj'ijxta'ay jampë Babilonyë y'ityën ets yajnijawëty pën janty mëtëy ko yë yajkutujkpë Ciro yë'ë ojts t'ëwa'atsy ets tyajkutuky ets ya'atë Wintsën ja tsyajptëjk yajkoj'oyëty jampë Jerusalén, ets jeexyë ëëts xytyuk'ëwaanëtë ja yajkutujkpë wi'ix të tuknipëjktaakëtë.