Esdras 4 - Biblia Dc en Mixe de Quetzaltepec

Ma ja mëtsip ka'ap t'a'ijxëtyën ets ja tsajptëjk yajkojëty

¹ Ko ja Judá ets ja Benjamín myëtsiptëjk tnija'awëtyë ko tëë jatëkok wyimpitë ja Jerusalén ja'ayëty ma ja nyaax kyajpnëtyën ets ko tam tkojjë'ëktë ja Wintsën ja tsyajptëjk, mëti'ipë ja Israel ja'ayëty Tyios'ajtëpën,

² ënät ojts tninëjkxtë ja Zorobabel, Josué ets ja mëjja'aytyëjk mëti'ipë ja Israel ja'ayëty jyä'äy'ajtëpën ets t'ënëmaaytyë: Ëëtsëty jëtu'unës njamay njatajtë ko miits njaputëkëja'antë ma yaa xykyojtën ja Wintsën ja tsyajpjëën tsyajptëjk, miitsëty wa'ats xynyijawëtë ko ëëtsëty nän yë'ë Wintsën n'ëwtajtëpës mëti'ipë miits m'ëwtajtëpën ets nän nmooytyëp ëëts yë wyintsë'kën maju'unëm jyuuky'ätyën ja Esar-hadon, mëti'ipë yajkutujkën jam ma Asiria ja'ayëtyën, mëti'ipës yaa xywoowmiintën.

³ E ja Zorobabel, ja Josué ets ja mëjja'aytyëjkëty Israel ja'ayëty tyaa y'ëtsoowtë: Ka'ap tjëkyepy ëëts nkojtëty yë Wintsën yë jyëën tyëjk mëët miitsëty. Aak ëëts yë xypyaatë nkojtëty yë tsyajpjëën tsyajptëjk yë Wintsën, mëti'ipë yë Israel ja'ayëty y'ëwtajtëpën, jä'ä ko jëtu'un yë yajkutujkpë Ciro të xy'ënä'ämtës, jampë yajkutukyën Persië.

⁴ Ënet tyaapë ja'ayëty ëxëëk jot ëxëëk winma'any tpatë, mëti'ipë jam tsënaaytyëpën winkon ets t'akajpxëtyë ja Judá ja'ayëty këtiipë tkojtëty ja tsajptëjk mëti'ipë jam të tkojtso'onta'aktën.

⁵ Ojts tjawin'ëëna'antë ja wintsëntëjkëty mëët ja wit meeny, e ja wintsëntëjkëty ka'ap ojts nyäkyë'ëyakëtë, oy ja kutuunktëjk ojts tyuntë mapaat yajkutujkyën ja Ciro jam Persië ets Darío.

⁶ E jää ma tyëjkëyën yë yajkutujkpë Asuero, jää tu'uk yë noky tkäjxtë yë myëtsip yë Israel ja'ayëty ets tuknikäjxtë ja Asuero, jä'ä yajni'ë'ënëtyëp ja Judá ja'ayëty ets ja Jerusalén ja'ayëty.

⁷ Ma ënety ja Artajerjes yajkutukyën, jampë Persië yajkutukyën, yë Bislam, Mitrídates, Tabeel ets ja myëku'uktëjk, ojts tnijayëtë ja Artajerjes. Arameë ayuk'äämpy ojts tja'atë ja noky ets mëët wi'ix nyiwijyën.

⁸ Yë Rehúm mëti'ipë tsiptuunpë wintsënën ets Simai mëti'ipë jääpyën, yë'ë kyäjxtë ja noky ets tmooytyë ja Artajerjes, ma tni'ëënëtën ja Jerusalén ja'ayëty.

^9-11 Jëtu'un ojts ja noky kyojy mëti'ipë kyäjxtën ja Rehúm, mëti'ipë tsiptuunpë wintsën'ajtpën ets ja Simsai mëti'ipë jääpyën mëët ja myëku'uktëjk mëti'ipë yajkutujktëpën, mëti'ipë poky nyipaye'eytyëpën ets mëti'ipë kutuunk'ajtëpën jam Persië, Erec, Babilonyë ets Susa, ja kanaakpë ja kajpn mëti'ipë ja Elám nyitënääpyën ets maajaty tëkokyë yë kajpnën mëti'ipë jam yajpatëpën ma tsyënaaytyaknpëjktën ja ja'ayëty mëti'ipë yajnëjkxën tsumy matsy ja Asnapar ets maajaty ja it naaxwiinyëtën mëti'ipë xëëwkëtä'äkytsyow yajpatëpën ma Efrates nëë nyäxyën: Jëtu'un ja noky tyaj'ëna'antë: Tyam ëëts nijayëtë ja yajkutujkpë Artajerjes, ëëtsëty ja tyuunpëty mëti'ipë tsënaaytyëpën maatsow yë xëëw kyëtä'äkyën, winkon ma mëjnëë nyäxyën mëti'ipë txëëwajtpën Éufrates:

¹² Tyam ëëtsëty nikajpxtë ets mijts myajtuknijawë ko ja jutië ja'ayëty mëti'ipë të xykyexyën ets wyimpitëty ma nyaax kyajpnëtyën yaa Jerusalén maas ntsëënëtën, tëëjës ja jya'të ets tëë ja tniwa'aktë ja tsajptëjktuunk ma ya'atë ja naax kajpnën mëti'ipë käjpxy kyumëtoownajxtëpën ets ëxëëkpë kyajpn'atyën. Tëë ja potsy'ëjx tyaj'o'oyëtya'atë ets tam ja potsy këjää tnayajtu'uye'eynyëtë.

¹³ Ets näjyëtu'un ntuknijawëtë ko pën ya'atë naax kajpn yaj'o'oyëp jatëkok ets pën yajpojts'o'oyëtyääpy ja pya'a nyux, ya'atë ja'ayëty kajts ja ënät y'ayakëja'an y'akonëja'antëty ets ko ënät jyëtu'un'atëty maajën ja wit meeny tsyoonëty.

¹⁴ E komë ëëtsëty oy ëëts mëët mijts n'itë, paaty ja jotmay nmëët'atës këtiipë jotmaymyëët wyë'ëmëty ëëts ja nkutujkpëty, e paatykyëjxm ëëts të nmintë ets myajtuk'ëwaanë,

¹⁵ wä'än tyajpaye'ey jap nokyjyot yajxon ma ëëts ja nkutujkpëty ja nyoky pëjkë'ëky tyaj'ityën. Ma ënät jap tnikäjpxyën ko ya'atë naax kajpn je'eyë kyäjpxykyutëjy ets ko kutsë'ëkë yajpaaty ma wiinkëtypë ja naax kajpnën ets ko tëëyëp ojts ëxëëk y'ëk'ëtëtstëpë paaty ojts y'ëkkutëkooytyëpë.

¹⁶ E paaty ëëts ja nkutujkpëty ntuk'ëwaanëtë pën ya'atë naax kajpn yajkoj'o'oyëp jatëkok, ëëts ja nkutujkpëty tëkooyaanp ja mëjwiin këjää ets ka'ap nëjkx t'ëkjëkyäjpnë y'ënä'ämëty jam Éufrates.

¹⁷ Ënet ja yajkutujkpë Artajerjes tyuknikäjxëtë ya'atë ja aaw ayuk: Yajtuknikexy ya'atë noky ja Rehúm, tsiptuunpë wintsën ets ja Simsai, mëti'ipë jääpyën ets ja myëku'uktëjk jampë tsyëënëtën Samaria ets mëti'ipë jam tsënaaytyëpën maatsow xëëw pyëtsimyën ma ja Éufrates mëjnëë nyäxyën: Tyam nkajpxpo'kxtë,

¹⁸ ja noky mëti'ipë miits të xykyäxtën, tëëjës ja nja'akyukë, tëëjës nyajtukwinkukajpxë ets tëëjës yam nnijawë,

¹⁹ e tëëtsës ja ni'ënä'ämë ets tuntëty ja paye'eyën. E janty tëy jëtu'un ojts tääpë ja'ayëty tëëyëp ëxëëk jyänty ëtë'ëtstë, ojts tnikäjpxytyunëtë yë yajkutujkpë kanaak'ok mëti'ipë ojts jya'ënä'äma'antën,

²⁰ jam Jerusalén ojts jam yajkutujkpëtëjk y'itë mëti'ipë mëk yajkutujktën ma it naaxwiinyëtën mëti'ipë yajpatpën ma xëëw pyëtsimyën, ma ja Éufrates mëjnëëjën, yë'ëjëty xëmë ijty myeenyyaktë jam Jerusalén.

²¹ E paaty yam mijts n'ënëëmëtë ets xy'ëtuktëty tääpë tuunk, wä'än jëtu'unyë t'ëwxitynyëm ëjtsnëm kë'ëm jatëkok nikajpxëp.

²² Këtii xynyakumëtoownaxtëty ya'atë tuntë jëtu'un tääjës yam ni'ënä'ämën këtiipë nëkoo ja amay jotmay kyëxë'ëkëty.

²³ Ko ja Rehúm ets ja Simai mëti'ipë jääpyën ets mëët ja myëku'uktëjkëty ojts ja noky yajtukwinkukajpxë, ënätyë ojts nyëjkxtë jam Jerusalén ets atsip tuk'ëxmajtstë ja tuunk ja Israel ja'ayëty.

²⁴ Jëtu'un ja tsajptëjktuunk ojts jëtu'unyë yaj'ëxmatsy, komjëmëjtnëm ojts jatëkok yajniwa'akë ma ja Darío yajkutukyën jam Persië.