Esdras 1 - Biblia Dc en Mixe de Quetzaltepec

¹ Ma ja Ciro mëtu'uk jëmëjt ëka'any y'ëne'emyën, jampë yajkutukyën Persië, jää ojts ja Wintsën ja y'aaw y'ayuk y'atëy; mëti'ipë ja Jeremías ojts tnikäjpxyën, Wintsën ojts kë'ëm t'ënëëmë yë Ciro ets tkajpxwa'kxëty ja aaw ayuk kajpn apëtsëmy, mëti'ipë ënaanpën:

² Jëtu'un ja Ciro y'ënä'äny mëti'ipë yajkutujkpën jam Persië: Yë Wintsën, mëti'ipë ijtpën tsajpjotm yë'ë ojts t'ëwa'atsy etsës ëjts njä'ä'atëty ja kutujktakn naaxwiinyëtë apëtsëmy e yë'ëtsës të xytyuk'ëne'emy etsës nkojëty tu'uk Tsyajptëjk jam Jerusalén, ma Judá y'itjotmën.

³ E paatyës yam nyikäjpxy, pën jää yaa pën mëti'ipë jam kukajpn'ajtpën ma Wintsën nyaax kyajpnën, yë Wintsën putëkëtëp ets nyëjkxtëty jam Jerusalén, ma Judá y'itjotmën, ets tkojtëty ja tsajptëjk, ja Wintsën Tsyajptëjk mëti'ipë yë Israel ja'ayëty y'ëwtajtëpën, jä'ä ko tääpë Wintsën yi'iyëm jam kukajpn'ajtp Jerusalén.

⁴ E pën tso'ontëp ma ja nyaax kyajpnëtyën ma tyam y'itën, wä'än ja myëjëën myëtëjk tputëkëtë mëët ja wit meeny, jëyujk tsajpkaa, ets ja ayajk ako'onën mëti'ipë yajtukniyajkëpën ja Wintsën ja jyëën tyëjk jam Jerusalén.

Ma ja Israel ja'ayëty wyimpitën jatëkok jam Jerusalén

⁵ Ja kopktëjkëty, Judá ja'ayëty ets Benjamín ja'ayëty, ja teetytyëjkëty ets ja Leví ja'ayëty, mëti'ipë ja Wintsën të myëkajpxëtën, jotkujk ojts nyäyjyawëtë, ënät tuknipëjktakëtyë nyëjkxa'antë jam Jerusalén, ja Tsajptëjk kyoj'oyëjantëp, mëti'ipë ja Wintsën tyëjk'ajtypyën.

⁶ Tëkokyë ja myëjëën myëtëjkëty ojts pyutëkëtë, tam mëti'ipë yajkën wit meeny, poop pujxn pu'ts pujxn ets tam mëti'ipë kë'ëmwinma'any yajkën ayak akonë.

⁷ Ja yajkutujkpë mëti'ipë txëëwajtpën Ciro, ojts tkë'ëyajkta'ay mëti'ipë ënety ja Wintsën jyä'ä'ajtypyën, mëti'ipë ja Nabucodonosor ënety të tmëpëtsëmyën jam Jerusalén ko tnitëjkëy ets jam tyajnëjkxtaay ma ja wiink tios ja tsyajptëjkën.

⁸ Ja yajkutujkpë Ciro yë'ë winë tyukë'ëtëjkëtyääy ja Mitrídates je'eyë tmëtyooy ets tyajknajxy, ja Sesbasar myooy, mëti'ipë ja Judá ja'ayëty wyintsën'ajtëpën.

⁹ Ya'atë ojts yajmëtyoy: i'px majk a'ukën aak pu'ts pujxn, tu'kmil ja a'ukën aak poop pujxn, i'pxtaxtujk yë tsujkn.

¹⁰ Ko yajmëtyoowtaay, jä'ä wyinë'ajty ja pu'ts pujxn ets ja poop pujxn mëkoxk mil ja taxk mëko'px.

¹¹ Aakyë'ë myënëjkxtaay yë Sesbasar, ko wyinpijnëtë jam Jerusalén, ma tsyo'ontën jam Babilonyë, ko ojts yaj'ëxmajtsnëtë.