Efesios 6 - Biblia Dc en Mixe de Quetzaltepec

¹ U'unk ëna'këty mëmëtowtë ja mtaak mteetyëty jëtu'un tä Dios t'oyjawën, jä'ä ko jëtu'un kyutukyëty.

² Yë'ë ya'atë Dios y'ënä'ämën mëtu'ukpë mëti'ipë waantakën myëët'ajtypyën: wintsë'ëkë ja mtaak mteety,

³ ets akujk jotkujk jeky mjuuky'atëty naaxwiiny.

⁴ Miits taak teetyëty ka'ap m'u'unk m'ëna'k xyajjoot'anpëktëty, ëëwij kajpxwijtë yajxon ets tuk'ix tuknijawëtë wi'ix tuntëty mëti'ipë Wintsën tsyojkpyën.

⁵ Miits mëtuunpëtëjkëty nitookpyë, mëtoow'itë yë mwintsënëty naaxwiinypë. Mëtuntë mëët yë wintsë'kën ets tëyajtën ijxtëm jeexyë xymyëmëtuntën ja Kristë.

⁶ Mëtuntë yajxon, këtii jyääyëty ko ënety jam m'ixëtë ets oy mëët mwë'ëma'antë, nikë mëtuntë ijxtëm ja Kristë yajmëtunyën, ëmuumtu'ukjot ijxtëm ja Dios tsokyën.

⁷ Oy winë xytyuntëty ëmuumtu'ukjot, jä'ä ko yë'ë Wintsën mëtuuntëp, ka'ap nyaaxwiinyëtë ja'ayëty.

⁸ Jä'ä ko miitsëty wa'ats xynyijawëtë ko ja ja'ayëty mëti'ipë nitookyëtyën ets ka'apë nyitookyëtyën y'ëxajëjantëp ja kuma'ayën mëti'ipë ja Wintsën yakäämpyën ko ënety winë të tuntë.

⁹ E miitsëty wintsënëty mëti'ipë yajtuunpë tuuntëpën, wintsë'ëkëtë ja mtuunpëtëjkëty, këtii xy'ëtsu'uxya'axtëty. Miits tëë xynyijawëtë ko jëtu'un miitsëty ijxtëm yë'ëjëtyën, tu'ukyë xymyëtuntë ja Wintsën mëti'ipë tsajpjotmën; yë Dios ka'ap pën twiink'ixy, wä'än tmëtuunpë ëkë tkamëtuunpëty.

Mëpëjkpëtëjk myëk'ajtënëty

¹⁰ E tyam mëku'uktëjkëty, jam xy'ixta'atëty ja mëk'ajtën ma ja Wintsënën, ja mëk'ajtën mëkpë.

¹¹ Nekyuwa'anëtë jëtu'un ijxtëm ja tsiptuunpë nyäxyoxëtën ko tsyiptuna'antë. Jëtu'un näkyëwent'atëtë mëët ja mëk'ajtën mëti'ipë Dios të mmo'ojëtën këtiipë ja mëjku'u wyinma'anypyaatëty wi'ix myajpokytyunëtëty.

¹² Jä'ä ko ka'ap jyä'äyëty mëët ntsiptu'unëm, yë'ë mëët ntsiptuntë mëti'ipë tsajpwinm yajkutujktëpën; kutujkënmëëtpë, mëk'ajtënmëëtpë ets mëti'ipë ënä'ämtëpën ma ja ja'ay tkamëmëtowtën ja Dios.

¹³ Paaty miits yajxon xymyëët'atëty ja mëk'ajtën mëti'ipë Dios të mmo'ojëtën, ko tpaatëty ja xëëw ëxëëkpë myiny wyinkonyën ets xymyëmëta'aktëty, tu'ukyë ja mëpëjkën xyaj'itëty ko ënety mëk myajpaatë.

¹⁴ Jëtu'un tu'ukyë ja mwinma'anymyëët'atë, nätyukxoxëtë ja tëypyë jaantypë ets yë'ë nätyukëwent'atëtë ja tëyajtën.

¹⁵ Jëjp'ixy xëmë myajpaatëty ma yajkajpxwa'kxa'anyën ja jotkujk'ajtën.

¹⁶ Ets ja mëpëjkënëty yë'ë jëtu'un myajtuntëp ijxtëm ja tsiptuunpë ja pyujxn nyätyuk'akëëytyukyën, oy jyaminy ja ti'pxn mëti'ipë ja ku'oypyë myëjti'pxypën jëënmëët.

¹⁷ Jëtu'un miits mëët'atë ja nitsokën ijxtëm ja tsiptuunpë tmëëtëtyën ja pyujxnkujup; ets ja Dios ja y'aaw y'ayuk ijxtëm ja tsiptuunpë tyajtunyën ja tyiypyujxn, mëti'ipë ja Kënu'kxymyëkajtën mmooyëtëpën.

¹⁸ Këtii xy'ëxmatstëty ja Dios ja'amyäjtsën, mënu'kxta'aktë ets amëtowtë pëjktsowtë ja Dios xëmë, wi'ix ja Kënu'kxymyëkajtën mwinma'anymyo'ojëtëty. Jëjp'ixy näyaj'itëtë. Xëmë ninu'kxta'aktë ja Dios ja kyajpn.

¹⁹ Tuknija'amyäjtsëtëkës ja Dios, ets ja Dios ja aaw ayuk xymyo'ojëtyës mëti'ipës nimëtya'akëpën, etsës amëk jotmëk nkajpxëty ets ja ja'ay ntuknijawëtyës ja oy'aaw oy ayuk, mëti'ipë ijty kayajnija'apën.

²⁰ Tëës ja Dios xykyexy etsës yë aaw ayuk oypyë nkajpxwa'kxëty, mëti'ipës të nkutsumtsyëënën. Ja'amyätstë ja Dios etsës amëk jotmëk nikajpx nnimëtya'akëty, ijxtëm pyäätyën.

Ko ja kajpxpo'kxën tjaakyajnaxy

²¹ Yë nmëku'uk'ajtëm Tiquico, mëti'ipë ni'ik yajmëku'ukja'apën ets mëti'ipë yam ëëts oy xypyutëjkëtyëpën mëët ja Wintsën ja tyuunk, yë'ë mtuk'ëwaanëjanëtëp wi'ixës yam nyajpaatyën ets wi'ixës yam ntunyën.

²² Paaty miits ntuknikäxtë ets yë'ë mtuk'ëwaanëtëty wi'ixës yam nyajpaatyën ets mjotmëkmo'ojëtëty.

²³ Wä'än ja mëpëjkpëtëjk tmëët'atë ja jotkujk'ajtën, ja tsojkën ets ja mëpëjkën mëti'ipë ja Dios Teety ets Wintsën Jesukristë yajktëpën.

²⁴ Wä'än ja Dios mkënu'kxëtë ni'ëmukë miitsëty mëti'ipë mtsojktëpën ja Wintsën Jesukristë mëët ja tsojkën ja'awën xëmëpë y'ityën.