Efesios 5 - Biblia Dc en Mixe de Quetzaltepec

Wi'ix jyuuky'atëty ja Tios ja y'u'unk y'ëna'k

¹ Miitsëty ma Dios m'u'unk'atëtën ets ko mtsokëtë, juuky'atë ijxtëm yë Dios jyuuky'ätyën.

² Nätsyokëtë nixim niyam ijxtëm ja Kristë të xytsyojkëmën ets të nyäkyë'ëyäkyë ma të wyintsë'kën'atëtyën ëëts'ajtëmkyëjxm, jëtu'un tä ja wintsë'kënën mëti'ipë oy xu'kp jojkpën Dios wintum.

³ Miitsëty mëti'ipë ja Dios ja'ay'ajtëtëpën jëtu'un mjuuky'attëty ijxtëm pyaat'atyën ko myajpaatë ma ja Dios ja kyajpnën, yë'ëpaat ka'ap xynyimëtya'aktëty ma ja ye'etyëjk to'oxytyëjk kanaak tmëët'atën oypyënëty ëkë ma ëxëëk tuunk tyajtu'uye'eytyën.

⁴ Ka'ap ëxëëkjaty m'ëwtëty mkajpxtëty, ëkë tëkatsy ja aaw ayuk xyajpëtsëmtëty ëkë jëtu'un mmëtya'aktëty ka'ap yowë mëpëktë, jä'ä ko ja jëtu'unpë ka'ap oy yaj'ixy, nikë yë'ë ja Dios myajmëjnaxtëp.

⁵ Tëë miits xynyijawëtë ko pën ja wiink to'oxytyëjk tmëët'aty ets tam yë tyo'oxytyëjk, ëkë ko ja to'oxytyëjk tmëët'aty ja wiink ye'etyëjk ets tam ja nyiye'etyëjk, ëkë ko pën ja ëxëëkpë tuny tkäjpxy, ëkë nëkoo tii kë'ëmwinma'any t'ëwtaty, ka'ap jam yajpaata'any ma ja kutujktaknën mëti'ipë ja Kristë ets ja Dios jyä'ä'ajtëpën.

⁶ Këtii pën mnätyukwin'ëënëtëty mëët ja aaw ayuk mëti'ipë ka'ap tyunyën; jä'ä ko yë'ëkyëjxm jëtu'un ja Dios ja tsyäätsy tyu'unën myina'any ma ja ja'ayëtyën mëti'ipë ka'ap të myëmëtoyën.

⁷ Paaty ka'ap mëët mnämyäyëtëty mëti'ipë ja Dios ja y'oyajtën ka'ap tsojkëtën.

⁸ Miitsëty jam ijty mjuuky'atë akootstum, e tyam ko m'ijnëtë mëët ja Wintsën jam myajpatnëtë ma tyi'kxy jyäjyën. Jëtu'un winë tuntë ijxtëm ja ja'ayëtyën mëti'ipë yajpatëpën ajajëntuuy.

⁹ Ko ja ja'ay yajpaaty ajajëntuuy, tyuunpy ja oypyë, mëti'ipë paat'ajtëpën ets mëti'ipë mëtëyën.

¹⁰ Yë'ë xëmë mëmay mëtajtë mëti'ipë ja Kristë tyukjotkëtäkpyën.

¹¹ Ka'ap xytyuntëty mëti'ipë ka'ap y'oyëtyën, ijxtëm mëti'ipë ja Kristë ka'ap tmëpëktën; yë'ë mtuntëp wi'ix xyajnikëxë'ëkëtyën ko ka'ap y'oyëty mëti'ipë yë'ë tyuuntëpën.

¹² Tsëtyu'un je'eyë xytyukpatmëp ko nnimëtyakmëty mëti'ipë tyuuntëpën ayu'utsy ame'tsyë.

¹³ E ko ya'atë tu'kë'ëyë nyikëxë'kta'ay mëët ja ajajk atë'kxk, ënät yajnija'awëtyä'äy.

¹⁴ Jä'ä ko ja ajajk atë'kxk tu'kë'ëyë tyajnikëxë'kta'ay. Paaty y'ënä'äny: Wijtë käjtë mëti'ipë jëtu'un ijtëpën tä ja'ay myä'äyën, pëtë'ëktë ets ka'ap m'ëk ijnëtëty ijxtëm ja o'kpën, jëtu'un ja Kristë mkujaj mkutë'kxëtëty.

¹⁵ Paaty nëëmëtë niwijy nikejy winë xytyuntëty. Ka'ap jëtu'un mjuuky'atëty tä tsuuja'ayën, wijy kejy myajpaattëty.

¹⁶ Yajtuunk'paatë yajxon ja xëëw jëmëjt, jä'ä ko tsiptakp tyam ja juukyajtën winjëpom.

¹⁷ Këtii tsuu poj tii xytyuntëty xykyajpxtëty, yë'ë mja'akyukëtëp mëti'ipë ja Wintsën tsyojkpyën.

¹⁸ Ka'ap m'uuktëty mmu'ukëtëty, jä'ä ko yë'ë yajtëkoopy; nikë oy ko mtu'umo'ojëtëty ja Kënu'kxymyëkajtën.

¹⁹ Nämyëkajpxëtë nixim niyam mëët ja tsajpkäjpxy, ëwtë ya'axtë ets tukxoonta'aktë mëti'ipë ja Dios yajmëjnajxypën.

²⁰ Xëmë ja Dios xykyukajpxëtëty mëët ja Wintsën Jesukristë ja xyëëw.

Wi'ix ja mëpëjkpëtëjk jyuuky'atëty mëët ja y'u'unk y'ëna'k

²¹ Näjyä'äkyukëtë nixim niyam jä'ä ko Kristë xywyintsë'ëkëtë.

²² To'oxytyëjkëty pëkpyë, myëmëtowëp ja nyiye'etyëjk, jëtu'un ijxtëm jeexyë yë'ë tmëmëtowtën ja Wintsën.

²³ Jä'ä ko ja ye'etyëjk yë'ë nyikëpajk'ajtyp ja tyo'oxytyëjk, ijxtëm ja Kristë tnikëpajk'atyën ja mëpëjkpëtëjk ets tyajtso'oky, ja mëpëjkpëtëjk mëti'ipë jëtu'unëtyën ijxtëm ja Kristë nyi'kx kyopkën.

²⁴ Je'eyëp ko jëtu'un ijxtëm ja mëpëjkpëtëjk tmëmëtowtën ja Kristë, näjyëtu'un ja to'oxytyëjk tmëmëtowtëty ja nyiye'etyëjk.

²⁵ Ye'etyëjkëty pëkpyë, tsoktë ja mto'oxytyëjkëty ijxtëm ja Kristë ojts tsokyën ja mëpëjkpëtëjk ets tku'o'këy.

²⁶ Paaty jëtu'un tuuny ets ja mëpëjkpëtëjk y'itëty oy ets wa'ats mëët ja aaw ayuk,

²⁷ ets tyaj'ita'any wa'ats, oy, ka'ap xyootsëty ets ka'ap y'äämyëty.

²⁸ Jëtu'unts ja ye'etyëjk tsoktëty ja tyo'oxytyëjk ijxtëm kë'ëm ja nyi'kx kyopk tsokyën. Pën tsyojkpy ja tyo'oxytyëjk, kë'ëm ënety nyätsyokyë.

²⁹ Ka'ap pën ja nyi'kx kyopk tmëtsip'aty, ni'ikyë tyajkay tyaj'uuky ets ja nyi'kx kyopk tkëwent'aty, näjyëtu'un ja Kristë ttsoky tjawë ja mëpëjkpëtëjk,

³⁰ jä'ä ko tu'ukyë nyajpatëmë mëët ja Kristë ijxtëm jeexyë tu'ukyë ja ni'kx kopkën.

³¹ Paaty yë ye'etyëjk t'ëxmatsa'any ja tyaak tyeety ets tu'ukyë y'ita'any mëët ja tyo'oxytyëjk, jëtu'un nimäjtsk tu'ukyë yajpaata'antë.

³² Yë ya'atë mëti'ipë ijty ka'ap yajnijawën, yë'ë ja Kristë ntijpyës mëët ja mëpëjkpëtëjk.

³³ Nikë oy ko nitu'ukjaty ja ye'etyëjk tsoktëty ja tyo'oxytyëjk ijxtëm kë'ëm nyätsyokyën ets ja to'oxytyëjk twintsë'ëkëtëty ja nyiye'etyëjk.