Efesios 4 - Biblia Dc en Mixe de Quetzaltepec

Ma mëktä'äky yajnikäjpxyën wi'ix mëpaat ja'ay tkuuyjuuky'ätyën ja Kristë

¹ Paaty ëjts, maas yap tsumy n'ityën koos yë Wintsën Jesukristë tmëpëky, tyam miits nmënu'kxta'aktë ets jëtu'un mjuuky'attëty ijxtëm ja ja'ayëtyën mëti'ipë ja Dios të myëkajpxëtën, ijxtëm miitsëty ojts mjuuky'atën.

² Yujy tëtä'äky mja'ay'atëty ets aak m'oyjawëtëp ja'ay oy pyënë, m'ëwxit mä'kxtuktëp ets mnämyëmä'kxtukëtëp nixim niyam mëët ja nätsyok näjyawë.

³ Mëmay mëtajtë wi'ix mnäyaj'itëtëtyën tu'ukyë ets jotkujk mëët ja Kënu'kxymyëkajtën.

⁴ Tu'ukyë ëëts'ajtëmë nyajpatëmë ijxtëm ja ni'kx kopkën ets tu'ukyë ja Kënu'kxymyëkajtën yajpaaty, jëtu'un ijxtëm ja Dios të xytyukwinwa'anëmën tu'ukyë ja mëti'ipë yajjëjp'ijxpën.

⁵ Tu'ukyë ja Wintsën, tu'ukyë ja mëpëjkën, tu'ukyë ja nëëpäjtën;

⁶ tu'ukyë ja Dios mëti'ipë ni'ëmukë nteety'ajtëmën, mëti'ipë kyë'ë'am'ajtääpyën winë, mëti'ipë winë yajjuuky'ajtääpyën, ets winë ttuny ijxtëm yajtuk'oy'atëtyën ets yajpatp oy tyimmaajëty.

⁷ Tëë ja tuunk nitu'ukjaty n'ëxajëmë mëti'ipë ja Kristë të xymyo'oyëmën.

⁸ Paaty ja Dios ja y'aaw y'ayuk këxja'aypyë y'ënä'äny: Ko pya'tëjkëy tsajpjotm, ojts tyajnëjkxta'ay ja tsumpyë matsypë, ets ja naaxwiinyëtë ja'ay ja tyuunk tmooy.

⁹ ¿E wi'ix jëtu'un nyiwijy ko y'ënä'äny ko pya'tëjkëy tsajpjotm? Jä'ä jëtu'un yajwinjawë ko jëwyiin të kyëtä'äky naaxwiiny.

¹⁰ Ets mëti'ipë të kyëtä'äkyën yë'ë jatëkok të pya'tëkë këjxm jam tsajpjotm ets tyawintujkta'aja'any ja tsajp.

¹¹ Yë'ë pyëjktak ja ja'ay ets ja oy aaw oy ayuk tkajpxwa'kxëty, wiinkpë Dios kyäjpxynyajxpë'atëty, wiinkpë tkajpxwa'kxëty ja oy'aaw oy ayuk, wiinkpë ja mëpëjkpëtëjk t'ijx'it tkëwent'atëty ets ja wiinkpë yaj'ixpëkëty.

¹² Jëtu'un tuknipëjktakëy ets tja'akyukëtëty ja Dios ja jyä'ä ets tja'akyukëtëty wi'ix ja Dios tmëtuntëtyën ets jyotmëkpëktëty mëti'ipë mëpëjktëpën, mëti'ipë ijtëpën ijxtëm ja Kristë nyi'kx kyopkën

¹³ koonëm tu'ukyë nyajpatmëty ma ja mëpëjkënën ets ma të yajnijawën ja Dios ja y'U'unk, ets jëtu'un npatmëty ja mëjja'ay'at ma ënety yajxon ja Kristën të nija'awëmën,

¹⁴ Ka'ap jëtu'un n'ëkja'ay'ajtënëty ijxtëm ja pi'k ëna'kën, mëti'ipë maaymyiin maayxyëjptëpën, ka'apë tnijawëtën mëti'ipë tëy katëyën, mëti'ipë pojën myëpëjktëpën ko ja ja'ay nyë'ëmxëtë ets t'ëxmatstë ja ijxpëjkën mëtëypyë.

¹⁵ Nikë oy ko nikajpxmëty ja tëyajtën mëët ja tsojkën ja'awën, tsojk nyä'këm npäjtëm ma ja Kristën, mëti'ipë ijtpën tä tu'uk ja këpajkën ma ni'kx kopkën.

¹⁶ Mëët ja Kristë oy y'ity ja ni'kx kopk ets tu'ukyë nyämyajts'ijta'ayë; ko aak'oy tyuunta'ay oy ni'ëmukë yääktë pyätë ets tyajmëjtëkëtë ja nätsyok näjyawë.

Jempyë juukyajtën ko Kristë mëët n'ijtmëty

¹⁷ Ya'atës nnikäjpxyp ets yë'ë yam ntukkë'ëtëjkëtyëp ma ja Wintsën Jesukristë ja xyëëwën: Ko ka'ap jëtu'un m'ëkjuuky'ajnëtëty ijxtëm ja ja'ayëtyën mëti'ipë ka'ap ja Dios tnijawëtën, mëti'ipë jëtu'un juuky'ajtëpën ijxtëm ja kyë'ëm jot kyë'ëm winma'anyëtyën,

¹⁸ kupi'its kukoots ja jyot wyinma'anyëty. Yë'ëjëty ka'ap tukxoonta'aktë ja juukyajtën mëti'ipë tso'onpën ma Tiosën, jä'ä ko tsuu yajpaatë ets ka'ap tii tjawëtë jyootjoty wyinma'anyjoty.

¹⁹ Tëë jyotmëktaknëtë ets tëë nyäkyë'ëyajkënëtë ma ja ëxëëk juukyajtënën, yi'iyë tyuunëtëp ja ëxëëkpë ets ka'ap t'ëk'ëxmatsanëtë.

²⁰ E miitsëty, ka'ap yë'ëkyëjxmëty ja Kristë të xy'ixy'atë ets jëtu'un mjuuky'atëty ëxëëk,

²¹ miits tëë xymyëtowtë wi'ix ja Kristë yajnimëtyä'äkyën ets tëë xyjyatë wi'ix miitsëty mjuuky'atëtyën ijxtëm yë'ë jyuuky'äjtyën, ijxtëm ja Jesús tyiy'ajtënën.

²² Ixmajtsta'atë wi'ix ijty miits tëëyëp mjuuky'atën, ëxmatstë ja m'ëxëëk winma'anyëty mëti'ipë mnätyukwin'ë'ënëtëpën, jä'ä tëkokyë tääpë tëë mya'ta'ay ko yi'iyë të yaj'atsoky ka'apë myëtëyëtyën.

²³ Yaj'ajemyëtë ja mjot mja'awënëty ijxtëm kë'ëm xymyëmay xymyëtajtën,

²⁴ ets ja jempyë juukyajtën xyajtso'onta'aktëty ijxtëm ja Dios të tuknipëjktaakën ko të nyäyaj'akojnaxyë ets nyikëxë'ëkëty ja mëtëypyë juukyajtën oypyë wa'atspë.

²⁵ Paaty tyam, këtii m'ëk'antaknëtëty, ko mmëku'uk xymyëmëtya'aktëty mëtëy tii xytyuk'ëwaanëtëty, jä'ä ko tu'ukyë n'ijtëm ijxtëm tu'ukpë ja ni'kx kopkën.

²⁶ Ko mjoot'anpëkëty, këtii mpokytyuntëty; këtii tu'kxëëwpaaty mjoot'anpëkëty.

²⁷ Këtii ja mëjku'u xytyu'umo'otëty.

²⁸ Pën ijty mä'tspën, ka'ap y'ëkmä'tsnëty wä'än je'eyë tnitunë tii tsyojkpyën, wä'än tyajtuny ja kyë'ë ets tii tpaatëty mëti'ipë myo'ojëpën ja ëyoopëja'aytyëjk.

²⁹ Ka'ap y'ëk'ëxëëk kajpxnëty, yë'ë kyajpxëp myëtya'akëp ja oypyë ja aaw ayuk mëti'ipë tyukmëjnaxëpën ja naax kajpn ets tuk'oy'atëty ja ja'ay ko tmëtowtëty.

³⁰ Këtii nëkoo xyajjotmaytyëkëtëty ja Dios ja kyënu'kxymyëk'ajtën, mëti'ipë të myajtuk'ijxwë'ëmtën ko Dios mjä'ä'atëtë mapaat ja nitsokën ënety tu'ukyë myajmooynyëtën.

³¹ Ixmatstë ja äkë, ja näyya'ax näjyokë, nänyiwaanpätë ets tu'kë'ëyë ëxëëk winma'any.

³² Oy mja'ay'atëty ets mnäpya'ëyowëtëp nixim niyam. Nänyimä'kxëtë tu'knax ijxtëm ja Dios të mnimä'kxëtën, ko ja Kristë të xymyëpëktë.