Efesios 3 - Biblia Dc en Mixe de Quetzaltepec

Ko Pablo yajtuknipëky ets ja Kristë jyä'ä tkajpxwa'kxëty ma ja'ayëtyën ka'apë jyutiis'atën

¹ Paatyës, ëjts Pablo, yap tsumy n'ity mëët yë'ëkyëjxm koos ja Kristë nmëtuny ets miits xytyuk'oy'attëty mëti'ipë ka'ap jyutiis'atën.

² Miits wa'ats xynyijawëtë ko Tiosës të xytyuknipëky koos nkajpxwa'kxëty mëti'ipë të tuknipëjktaakën ma miitsëtyën mëët ja tsyojkën jya'awën.

³ Tëës ja Dios xytyuk'ixy xytyuknijawë ja yu'utsypë etsës nkajpxwa'kxëty, ijxtëm wäänë të ntuk'ëwaanëtën nokyjoty.

⁴ Ko miits yë noky xykyajpxtëty, ënät xymyëpëktëty koos nijawë ja Kristë jyä'ä mëti'ipë ijty kayajnija'apën.

⁵ Ni pën ijty tëëyëp tkanijawë, je'eyëp ko tyam tëë ja Dios mëët ja kyënu'kxymyëk'ajtën tuk'ixy tuknijawë ja wa'atspë y'ijxpëjkpëtëjk ets ja kyäjpxynyajxpëtëjk.

⁶ Ya'atë ijty kayajnija'ap: mëët ja oy aaw oy ayuk Dios tmëkajpxta'ay ja naax kajpn ets yajpaatëty mëët ja Kristë Jesús ets t'ëxajëtëty mëti'ipë ja Dios të twaantä'äkyën.

⁷ Dios të tuny ja mëyajtën ma ëjtsën mëët ja y'oy jot y'oy winma'any ets pya'ëyo'ow nyajts'ëyo'owën, tëëjës xytyuk'ixy ja myëk'ajtën.

⁸ Oyës ëjts ni'ik naxym nyajpaaty ma ja Dios ja nyaax kyajpnën wa'atspë; e tëëjës xytyuknipëky etsës nkajpxwa'kxëty ja aaw ayuk mëti'ipë ka'ap tjëkyepyën wi'ix nkajpxtë'kxmëty, etsës n'ëwaanëtëty ja ja'ay mëti'ipë ka'ap jyutiis'atën wi'ix ja Kristë myëjëtyën.

⁹ Ja Dios, mëti'ipë tu'kë'ëyë winë yajkojën, yë'ëjës të xytyuknipëky etsës ja ja'ay ntuk'ëwaanëtëty mëti'ipë tyuknipëjktakëpën, mëti'ipë ijty ja ja'ay ka'ap nijawëtën.

¹⁰ Jëtu'un'äämpy tyam, mëët ja mëpëjkpëtëjkëty, nijawëtëty ja tsajpjotmëpë yajkutujkpëtëjk ja Dios ja wyijy'ajtën kyejyajtën mëti'ipë kanaakjëjp nikëxë'kpën.

¹¹ Jëtu'un ja Dios të tuny winë ma ja Kristë Jesusën ijxtëm tëëyëp tuknipëjktaakën.

¹² Mëët ko ja Kristë të nmëpëjkëmë, jyëkyejpy nmëwinko'onmëty ja Dios mëët ja oy'aaw oyjyot.

¹³ Paaty këtii xymyëmay xymyëtajtëty ko miits nku'ëyowëtë. Miits yë'ë mtuk'oy'ajtëp koos yap n'ity.

Tsajpkäjpxy ma yajmëjpëjktä'äkyën yë Tios

¹⁴ Yë'ëkyëjxmës nwinkoxtänë ja Dios,

¹⁵ ma ja xyëëw tsyoontën tëkokyë naaxwiinyëtë ja'ay ets tsajpjotmëpë yajpaatën.

¹⁶ N'amëtoopy npëjktsoopyës ja Dios ets mjotmëkmo'ojëtëty ets myajpaatëty akujk jotkujk mëët ja mëk'ajtën mëti'ipë tso'onpën ma ja oypyë tsujpën, mëti'ipë myëët'ajtypyën ja Dios ja kyënu'kxymyëk'ajtën,

¹⁷ wä'än ja Kristë t'ity ma miitsëtyën ko të xymyëpëktë, ets ja tsojkën ja'awën yajpaatëty xëmë ma miitsëtyën.

¹⁸ Jëtu'un tëkokyë ja Dios ja nyaax kyajpn tja'akyukëtëty wi'ix myëjwiinëtyën, yenyëtyën, kyëjxmëtyën ets kyëkëtyën ja Kristë ja tsyojkën jya'awën.

¹⁹ N'amëtoopy npëjktsoopyës ets xynyijawëtëty ya'atë tsojkën ja'awën, ko ni'ik myëjëty këtiinëm tii wiinkpë, ets ni'ikyë xypyaatëty ja Dios ja y'oyajtën.

²⁰ E tyamm, mëj'äämpy ja Dios nyäxy, ko tmëët'aty ja mëk'ajtën ets winë tunëty, wäänëni'ik këtiinëm ijxtëm n'amëto'owëmën ëkë ijxtëm nmëma'ay nmëtajëmën, oy ko tmëët'aty ja kuttujkën ets winë tunëty ma ëëtsajtëmën.

²¹ Mëj'äämpy ja Dios nyäxy ma ja mëpëjkpëtëjkëtyën ets ma ja Kristë Jesusën, winë xëëw winë jëmëjt ets xëmëkyëjxm. Oy jyëtu'un'atëty.