Eclesiastés 6 - Biblia Dc en Mixe de Quetzaltepec

¹ Yaa naaxwiiny naaxkëjxy tä tu'uk ëxëëkpë yajpaaty, mëti'ipës të n'ixyën oy tyimmaajëty:

² Jëtu'un yaj'ixy win'ixy yowë Dios ja'ay wit meeny tmo'oy ets win'ixy yowë jotkujk ja'ay tyajjuuky'äty, mëti'ipë tii tyëkoy'ajtxëtën mëti'ipë tsyojkën'ajtëpën; je'eyëp ka'ap yë'ëjëty tukjuuky'atë wiink ja'ay tyukjuuky'äjtyp. Ya'atë jëtu'unpë nän natëk winma'any yë'ë ets je'eyë pyäätyë nimo'on nitujkmëty.

³ Oy jënu'un yë ja'ay may y'u'unk y'ëna'k tmëët'atëty ets jeky jyuuk'atëty; pën ka'ap tukxoontä'äky yë juukyajtën ets ko y'ooky tyëkoy ni pën kyayajnaaxtëkëty, ëjts jëtu'unës n'ëna'any nikë wä'än jyaktsowpaaty pi'k ëna'k mëti'ipë ooky miinpën naaxwiinyëtë ets këtiinëm tääpë ja'ay,

⁴ jä'ä ko pi'k ëna'k mëti'ipë ooky miinpën naaxwiinyëtë, mëti'ipë miimp ja'ajtpën akootstuuy ets ka'ap yajnijawë,

⁵ oy tka'ix'aty ja xëëw po'o ets nitii tkanijawë'aty, tääpë pi'k ëna'k ni'ikë wä'än jyaak po'kxy këtiinëm tääpë naaxwiinyëtë ja'ay,

⁶ jä'ä ko oy jeexyë mäjtsk mil jëmëjt jyatim jyuuky'ajtpë ka'ap tukjuuky'äty ja mëti'ipë nyijëtu'un nyiye'eyëpën. Ko tpaaty ja xëëw jëmëjt jap nyëjkxta'atë ma o'kpë nyipetyën.

⁷ Yë naaxwiinyëtë ja'ay yë'ëkyëjxm ko kyäyä'äny paaty ka'ap nyeajpo'kxyë, je'eyëp ko ka'ap nyäky kyu'uxyë.

⁸ ¿Tii jëtää ni'ik tyimmëët'ajtyp yë ja'ay mëti'ipë wijyën ets këtii mëti'ipë tsuujën? yi'iyë yë wyijy'ajtën ets y'ijxpëky'ajtën ets tukjatëty wi'ix twinjawëtyën yë juukyajtën.

⁹ Tsoowpatp ni'ik ko tii ntimy'ijxmëty ets këtii ko tii je'eyë nmëma'ay nmëtajmëty. Je'eyëp ko natëkë winma'any näjyëtu'un ets jëtu'un tpaaty tä juukyajtën je'eyë ntuk'ëyë'kmëtyën.

¹⁰ Mëti'ipë tyam jää yajpatpën, tëëyëp yë yajxëëwmo'oy, je'eyëp ko tyam yajnijawë tii txëëwatyën. Ka'ap tjëkyepy tsyiptunëty pën mëët mëti'ipë ni'ik mëjën.

¹¹ Tëyajtën yë'ë, ma aaw ayuk nëkooyë yonyën tsuu poj ja'ay jam nyämyëkäjpxyë; ets tii jam tyimpat tyim ijxtëp.

¹² Ni pën tkanijawë, tii jëtää naaxwiinyëtë mëpaat yajxon tukxoontä'äky ma yaa wäänë jyuuky'ajtkojyën ets ma mëtyoy yë xyëëw jyëmëjt nyäxyën. Tä äpkën yë jyuukyajtën nyajxkojy, ¿ets pën ëktuk'ëwa'anxëtëp tii miimp wiinkoonp? ma ënety të y'o'knën.