Eclesiastés 4 - Biblia Dc en Mixe de Quetzaltepec

¹ Ënätës ojts n'ixy ntuny wi'ix ja'ay tyaj'ëyoyën yaa naaxwiiny naaxkëjxy. Ënätës ojts n'ixy ko mëti'ipë ja'ay ëyoopën jëëytyëp yaxtëp yë'ëjëty ets ka'ap pën pyutëkëty; mëti'ipë ja'ay myëku'uk yaj'ëyoopyën ëxëëk myëku'uk tyajjaty tyajkëpety ets ka'ap pën pyutëkëty mëti'ipë ëxëëk yajtuuntëpën.

² Paatyës të n'ëna'any nikë oy ko tyim ookëty ja'ay mëti'ipë myëku'uk yaj'ëyoopyën ets këtii ko jyuuky'atëty;

³ nikë jotkujk yajpaatë mëti'ipë ka'ap tyimminyëmën naaxwiinyëtë, jä'ä ko ka'ap t'ixynyëm mëti'ipë ja'ay tuuntëkoopyën yaa naaxwiiny naaxkëjxy.

⁴ Tëës näjyëtu'un n'ixy ko ja'ay mëk nyäyajtunyë ets wyimpety ja wyit myeeny, yi'iyë näy'ëxëëk'ixë näkya'oy'ixë y'ixkujkëp, tääpë nän natëkë winma'any yë'ë, jëtu'un tä jeexyë nëkoo jyuukyajtën tuk'ëyi'ikyën.

⁵ Jëtu'un ja'ay y'ëna'antë: Yë winma'anytyuk je'eyë nyäkyë'ëmëkityë ets nyäyaj'ëyo'ontëkëty ni'ikyë.

⁶ E ëjts jëtu'unës n'ëna'any: Nikë tsoowpatp ni'ik ko ja'ay nyeajpo'kxyë jënu'un myëpaatëtyën ets këtii ko nëkooyë nyäyajtuunaxyë.

⁷ Koos ojts wiinktsow najts'ixë, ënätës ojts n'ijxpaaty wiinkpë natëkë winma'any:

⁸ tu'u yë naaxwiinyëtë ja'ay nätyu'ukpë jyuuky'ätyën, ka'apë y'u'unk y'ëna'kën ets ka'apë myëkä'äxën, ka'apë pyo'kxyën nitu'knu'un ets yi'iyë myëmääpy myëtäjpy wyit myeeny ets nijëna'a kyanäyajtëyë: ¿tiijës ko nëkooyë ntimy tyäty nyäyajtunyë? ¿Pën n'amëtu'unëp? ¿Tiijës ko ka'ap näyyajpo'kxyë? Ya'atë nän natëkë winma'any yë'ë ets je'emty yë oy.

Mëtakp xëmë nimayë'at

⁹ Ni'ik myëta'aktë mëti'ipë nimäjtskën, jä'ä ko pyatëp ni'ik mëti'ipë tyukjotkëtaktëpën.

¹⁰ Ko tu'uk kyëtäy, tu'uk wyijtsë'ëky. Mon tuk yë ja'ay mëti'ipë nätyu'uk'ajtpën ko kyëtäy pën ëkwijtsë'ëkëtëp.

¹¹ Ets näjyëtu'un, ko nimäjtsk nyäkyo'okëtë, xim yam nyäyaj'aanpëkyë; tu'ukpë, ¿Wi'ix? nyäyaj'aanpëkëtëty.

¹² Nätyu'ukpë ja'ay pojën yë myëtsip myëmëta'akëtëty, mëti'ipë nimäjtskëtyën wyintanëtëp yë'ë. Yë tejpxy atëkëëkpë ka'ap nyapojtkojy.

Ka'ap yë'ëkyëjxmëty ja'ay wyijyëty ko xyëëw jyëmëjt wyimpetyëty

¹³ Näyjyëtu'un ënätnëpë, tsoowpatp ni'ik yë ëna'k ja'ay wijypyëpë ets këtiinëm tu'uk yajkutujkpë tsuupë, jä'ä ko yë'ë ka'ap y'ëkkäjpxyjyä'äykyujkënë.

^14-15 Oy n'ëna'anmëty ko ënety tpaaty ja xëëw jëmëjt yë ëna'k ja'ay kyutëkëjäämpy tääpë yajkutujkpë, oy ënety jyapëty pujxn tëkoty pyëtsimy, ëkë oy ënety jënu'un të y'ëyoy të jyotëkoy, tëëjës n'ixy ko jëtu'unpë ja'ay pyätyp yë näypyutëkë ma mayjyä'äyën.

¹⁶ E oy ënety jënu'un yë kajpn jyamëjjëty ma jëtu'unpë ja yajkutujkpë y'ëne'emyën, mëti'ipë ok minantëpën ënä'ämpë ka'ap t'oy'ixa'antë oy ënety oy të jyayajkutuky ja ja'ay. Ya'atë nän natëkë winma'any yë'ë, jëtu'un yë nyäxy tä juukyajtën nëkoo ntuk'ëyë'kmëtyën.