Eclesiastés 10 - Biblia Dc en Mixe de Quetzaltepec

Wi'ix mëj'äämpy nyäxyën yë ixpëkyajtën

¹ Ëxëëk xyuuky tu'uk yë tsaty'ooky, yajma'typ yë olivë on mëti'ipë pa'akxu'kpën. Yajmëjnajxyp yë ja'ay ni'ik yë wäänëpë inkäjpxy, këtiinëm yë wijy'aaw wijy ayuk mëti'ipë yajkajpxpën mëët näwyinkutsë'ëkë.

² Yë wijyjyä'äy yë jyot wyinma'any jam tyajtëëynyë ma oypyën, e yë ëxëëk ja'ay jam tyajtëëynyë ma ëxëëkpën.

³ Yë tsuuja'aytyëjk, ko tii tuntë, ënätyë yaj'ixy ko ka'ap wyijy'atë, oy jya'ëna'any ko wiink ja'ay ka'ap wyijyëty.

⁴ Pën mtukjoot'anpëjkëp yë ja'ay mëti'ipë yajkutujkpën, mëk xymyajts'itëty yë mjot mwinma'any; mëj tsooy nyäxy ko ka'ap nëkoo ja'ay jyot'ëtë'ëtsy ko tii mëj këjää tuuntëkoy.

⁵ Tëës n'ixy ntuny wi'ix yë yajkutujkpëtëjk tyëkoytyën yaa naaxwiiny naaxkëjxy:

⁶ yë yajkutujkpëtëjk tyuunkmooytyëp yë tsuuja'aytyëjk ets yë'ë myooytyëp tuunk mëti'ipë mëj'äämpy najxpën, e yë wijyjyä'äytyëjkëty yë'ë yajmooytyëp yë tuunk mëti'ipë ka'ap mëj'äämpy nyäxyën.

⁷ Tëës n'ixy wi'ix yë ëyoopë mëtuunpë nyäxy tyëkën kwaaykyijxy ets yajkutujkpë tekyye'epy jyëtijtpë tä jeexyë yë'ë y'ëyoy myëtunyën.

⁸ Mëti'ipë jut yajkojpyën, jap kyuka'anaxy. Mëti'ipë potsy jijtpën, tsu'tsëp yë tsa'any.

⁹ Tsëtyujtp yë ja'ay mëti'ipë tsaapu'upën. Neypyujxëp yë ja'ay mëti'ipë ja'axypyujxpën.

¹⁰ Ko yë jatyë jyëjpkëtä'äky ka'ap oy pyuxy, koonëm mëk yajnixajjë'ëky täänëm tyuky yë ja'axy.

¹¹ Nëkoo nyatëkëjaty ko tu'uk ja'ay tyajxuxy pën tëë jëyëjp nyatsu'tsnë.

¹² Ko yë wijyjyä'äy kyäjpxy oy yë y'aaw y'ayuk yajmëtoy, e ko yë tsuuja'ay kyäjpxy kë'ëm nyäyajtëkoyë;

¹³ aakyë'ë nyikäjpxy ka'apë myëtëyëtyën ets ko kyajpxta'ay aak je'eyë të tjo'pta'ay ja winma'any mëti'ipë ënety të jyayajnimëtyä'äkyën.

¹⁴ Ja'ay mëti'ipë tsuujën je'eyë tyäty myëtyä'äky. ¿Pën y'ëknija'awëp tii tunan jatanëp? Ni pën tkanijawë mëti'ipë miimp wiinkoonpën.

¹⁵ Mëti'ipë ja'ay tsuujën je'eyë nëkooyë y'ëxëëk näyajtunyë, ni yë'ë tkanijawë mëti'ipë tu'u jam jajtp kajpnjotm.

¹⁶ Janty mon janty tuk yajpaaty yë kajpn mëti'ipë kyutujkpë'ajtypyën tu'uk pi'k ëna'k ets mëti'ipë yë myëjja'aytyëjkëty ëmu'ukyëpë kyuxëënyëtën ma xyëëwtun xyëëwkajpxtën.

¹⁷ Oy tsuj yë naax kajpn yajpaaty mëti'ipë yë kyutujkpë oy winë tyuunpyën ets mëti'ipë yë wyintsëntëjk kaaytyëpën uktëpën ma nyikutukyëtyën ets paatykyëjxm kyäytyë ko yuu'ookëtë ets ka'ap yë'ëkyëjxmëty ko nyäyajmu'uka'anëtë.

¹⁸ Yë ja'ay nuuxpë ka'ajaanp yë tyëjk nikë'ë; ets mëti'ipë ka'ap nitii tunyën këtawaanp yë tyëjk.

¹⁹ Yë ka'ayën ukën paatykyëjxm yë'ë të yajtuknikojë ets yajtukxon yajtuk'itëty, yë tsatym nyëë yë'ë të yajtuknipëjktaakë ets yajtukxoonta'akëty; e yë meeny yë'ë të yajtuknipëjktaakë ets tääpë mäjtsk yajjuyëty.

²⁰ Këtii yë yajkutujkpë xynyi'ojëty ets ni xykyanimay xykyanitajëty wiinkjaty. Këtii yë kumeenyjyä'äy tëkatsy xynyimëtya'akëty ets oy muum nätyu'uk myajpaatëty, jä'ä ko joon kääkjëtijtëp yë'ë ets tsojk nëjkx tukmëmëtyä'äky mëti'ipë ënety të xykyäjpxyën.