Eclesiastés 1 - Biblia Dc en Mixe de Quetzaltepec

Jëtu'unën kajpxën ka'apë tsyoowpaatyën ma juukyajtënën

^1-2 Ya'atë y'aaw'ajtyp y'ayuk'ajtyp ja kë'ë'amääpyë, yë David yë myaank, mëti'ipë jam Jerusalén yajkutujkën. Aak nëkoopë nyatëkë'aty oymyëti'ipë tuunkëty myëti'ipë winma'any. Aak natëkë'ajtp yë'ë.

³ ¿Tii yë naaxwiinyëtë ja'ay tyimpatyp tyim'ijxyp? ko nëkooyë nyäyajtunyë.

⁴ Wiinkpë myëxu'unk'aty, wiinkpë y'ooky, e ja naaxwiinyëtë ka'ap tyëkatsy.

⁵ Xëëwpëtsëëmëp, xëëwkëtakëp ets jatëkok jyä'ty ma të tsyoonyën, jap jatëkok tsyoony ets pyëtsimy.

⁶ Pojp ëpa'tkë'ëytsyow, pojp anëkëjxytsyow ets jëtu'un y'ëwtity ets y'ëwtity.

⁷ Aak mëjmejyjoty kyëtakta'ay oymyëti'ipë mëjnëëjëty, ja mëjmejy kä'äpyëm nyäky y'uty; jam jatëkok tsyoony ets tniye'eyëtyä'äy ma të tsyoontën.

⁸ Ka'ap pën yajxon tkajpxtë'kxy wi'ix yajtsipke'exyën mëti'ipë yajpatp yaj'ijxpën; ni pën maa tkamëtoynyëm oypyë aay ayuk mëti'ipë jeexyë yajxon jotkëtakpën.

⁹ Aakyë'ë jää yajpatp mëti'ipë tääyëmën; aakyë'ë yajtuunp tääyëmpë yajtunyën. Yaa naaxwiinyëtë naaxkëjxy ka'ap yaa nitii jyemyëty.

¹⁰ Ka'ap tyëkoy'äty ja'ay mëti'ipë ëna'anaanpën: Tyaapën tëy jemy. Oy jënu'un tii jemy jyayaj'ixy tääyëm yë'ë ma ëëtsajtëm ka'ap njä'ä'ajtëpën.

¹¹ Tëëpë nyäxyën tëë ja yajja'atyëkooynyë ets näjyëtu'un yajja'atyëkoyä'äny mëti'ipë tunan jatanëpën.

Tëëpë ja kë'ë amaaypyë tjuuky'ätyën

¹² Ëjts, mëti'ipë yam kë'ë ëmaaypyën, ojtsës nkutujkpë'aty jam Jerusalén.

¹³ Etsës ojts ni''ijxpëjkëtyä'äy winë, n'ijxtaay ntuuntaayës ets nmëmaay nmëtajyës tëkokyë mëti'ipë yaa naaxwiiny naaxkëjxy yajtuunp yajkajpxpën. Mëktuunk ets je'emty tyimy yë Dios të xymyo'oyëmë ets yë'ë mëët xynyaxmëtijëmëty.

¹⁴ Ets ojts nijawës ko tëkokyë mëti'ipë yaa naaxwiiny yajtuunp yajkajpxpën nëkoopë nyatëkë'aty, mëti'ipë jëtu'un nyapatypyën tä jeexyë poj nmatsa'anëmën.

¹⁵ Mëti'ipë näy xëketyën ka'ap tjëkyepy nwo'ontë'ëwmëty ets ka'ap tjëkyepy tii nipëjktakëmëty pën ka'ap yajmëët'aty ja mëtakën.

^16-17 Ënätës ojts kë'ëm nämyä'äy nätyajxëty etsës n'ënany: Tyaajës, mëj'äämpyës n'ity, ni'ikës nwijyëty këtiinëm jyëtu'un'ajtë mëti'ipë y'ënä'ämtën tëëyëp yaa Jerusalén; maas winë këkpaat nmëmay nmëtajyën ets n'ijxpëjkta'ay winë winma'anymyëët ets näjyëtu'un tsuu pojës n'ëtë'ëtsy ets jä'äs ntuunpy ka'apë tyuunëtyën ets n'ik'ixa'anyës ko oymyëti'ipë ntimtyu'unmëty aak nëkoopë nyatëkë'aty.

¹⁸ Mëti'ipë mëpaat ntijëmën tëy jaanty yë'ë ko ja'ay mëti'ipë ijxpëjkni'ikëpën nän mëk näy'atsipë tyajnaxy; mëti'ipë ja'ay ni'ik tii nyija'awëpën, nän ni'ik y'ëyoy.