Deuteronomio 8 - Biblia Dc en Mixe de Quetzaltepec

Ka'ap yi'iyë ka'ayën ukën ja'ay timtyukjuuky'atëty

¹ Mpatuntëp ya'atë ënä'ämën tëyajtën mëti'ipë tyam të ntuk'ënä'ämtën, jëtu'un mjuuky'atëty, mnimayëtëty ets m'awinpitëty tu'uk mëj kajpn ets xynyiwa'aktëty ya'atë naax kam, mëti'ipë ja Wintsën tyukwinwa'anëyën ja m'ap m'okëty.

² Mja'amyätstëp wi'ix ojts ja mWintsën jam myajjëtitëtën të'ëts'itum wëxtyikxy jyëmëjt. Këtiipë mëj këjxm mnäjyawëtëty ets t'ixa'any tnijawëja'any pën wi'ix miits myajpaatë ets wi'ix mmaytyë mtajtë, pën nëjkxëp xypyatuntë ja y'ënä'ämën tyiyajtën, ëkë pën ka'ap.

³ Oy ojts mëk m'ëk ëyowtë ets m'ayuu'ajt m'ëxëëwajtë, yë'ë, ojts jatëkok mpa'ëyowëtë, ojts jatëkok myajkay myaj'uukëtë mëët ja maná. Jä'ä jëtu'un ja ka'ayën ukën mëti'ipë ni miits ets ni m'ap m'ok tkanija'awëtyën tiitën jä'ä, paatykyëjxm yë'ë tyäjky ets mtuknijawëja'anëtë, ko ja'ay ka'ap yi'iyë ka'ayën ukën timtyukjuuky'atëty. Nëjkxëp näjyëtu'un tukjuuky'äty ja Wintsën ja y'aaw y'ayuk.

⁴ Ma wëxtyikxy jyëmëjt nyäjxyën, yë mwit mtujkxyëty ka'ap ojts tsyojk'ëmëjë ets mkë'ë mtekyëty ka'ap niwi'ix jyajtë.

⁵ Yë'ë ëkmëmay ëkmëtajtë, ko yë Wintsën jëtu'un të mwoow'it të mwijts'itëtë, tä tu'uk yë u'unkteety tmëët'atyën yë y'u'unk.

⁶ Paaty yë'ë kuuytyuntë ja Wintsën ja y'ënä'ämën kyutujkën, yë'ë mëjjaw kënu'kxyjyawëtë ets mëjpëjktakëtë ja y'aaw y'ayuk.

⁷ Yë Wintsën tëë tuknipëjktaakë, ko jam myajnëjkxa'anëtë ma ja oy'it oynyaaxën, ma ka'ap tii y'ëmaaytyä'äkyën. Jam'ajtp mëjwiin këjää ja nëë, wä'än tjamëty joyjyotm ets kopkjotm.

⁸ Ma tääpë it naaxwiinyëtën ijtp wintëëp jam yë tsajpmok, cebadë, tsatsymkyam, higo kam, granadë kam, olivë kam ets uuxpa'ak.

⁹ Ma tääpë it naaxwiinyëtën ka'ap nëjkx xymyëmay xymyëtajtë tii mjë'kxtëp mpëktëp, tii myajtuntëp ets tii mnijuuky'atëpën. Jam nitii nëjkx kyatëkoy'äty, jä'ä ko ma tääpë it naaxwiinyëtën tsaajoty nëjkx xynyipujxtu'ut xynyika'tstu'utë yë juunpujxn ets jam tunkëjxm nëjkxëp xypyaatë yë tsaptspujxn. Jëtu'un'äämpy nëjkx xymyëët'atë yë juunpujxn.

¹⁰ Ko ënety jam myajpatnëtë ets ku'uxyë mkaaynyë m'uknëtë, mkukajpx mja'awëkyëta'aktëp yë Wintsën. Mëët ko ënety oypyë ja naax kam të mo'ojëtë.

Ma yajnikäjpxyën ets këtiipë Tios yaja'atyëkoyëty

¹¹ Këtii nijëna'a yë mWintsën xyjyä'äytyëkoytyëty, mpatuntëp yë y'ënä'ämën tyiyajtën, y'aaw y'ayuk ets y'ënä'ämën kyutujkën mëti'ipë tyam të ntuk'ënä'ämtën.

¹² Ko ënety jotkujk jam mkaaynyëtë m'uknëtë ets ku'uxyë jotkëtä'äky mwë'ëmnëtë ets oyëty ja mjëën mtëjk xymyëët'ajnëtëty, mëti'ipë kë'ëm mkojtëpën.

¹³ Ets xy'ixtëty ko ja mtsajpkaa, mkupixynyëty nyimayënëtë ets näjyëtu'un ja mpu'ts pujxn mpoop pujxn ets tëkokyë jënu'un winë xymyëët'atën,

¹⁴ këtii mëj këjxm mnäjya'awënëtëty ets xyjyä'äytyëkooynyëtëty ja Wintsën mëti'ipë jap Egiptë mju'tëtën, ma ënety m'ëyowtën mëtuntën.

¹⁵ Ets ojts myajjëtitëtë jam të'ëts'itjotm ma ënety jam yë ëwa'anëtypë jëyujk yajpaatën, tä tsa'anyën, kaa jëyujkën, yë kä'pyën ets ma ka'ap yajpaatyën ja nëë; e yë'ë ojts yë myëj'ajtën tyaj'ixyë, ojts ja nëë tyajpëtsëmy tsaajoty ets myajnëë'ukëtë.

¹⁶ Ets jam të'ëts'itum yë'ë ojts mtukayëtë yë maná, ja ka'ayën ukën mëti'ipë ja m'aptëjkëty ka'ap t'ijxyajtën. Këtiipë mëj këjxm mnäjyawëtëty ets t'ixa'any tnijawëja'any pën wi'ix miits myajpaatë ets wi'ix mmaytyë mtajtë, jä'ä jëtu'un tyuun ets kë'ëm nëjkx xytyuk'oy'atë.

¹⁷ Ijxkëm jëna'a mmaaytyëpë mtajtëpë ko tëkokyë mëti'ipë mmëët'ajtëpën, kë'ëm të xyajnimëjaawta'aktë.

¹⁸ Ja Wintsën mëti'ipë mTiosajtëpën yë'ë xëmë mja'amyätstëp. Jä'ä ko yë'ë mooyëtëp ja oyajtën mëk'ajtën ets winë xypyaatë xy'ixtëty. Ttuny jëtu'un ja mëti'ipë tyukwinwa'anëyën ja m'ap m'okëty.

¹⁹ E pën mja'atyëkooynyëtëp ja mWintsënëty ets ja wiink wintsën xypyanëjkxnëtëty ets jä'ä xy'ëwtajnëtëty, tyam miits yajxon n'ënëëmëtë, ko nëjkxëp mkutëkooytya'atë.

²⁰ Jëtu'un nëjkx mkutëkooytya'atë, tä ja Wintsën ja naax kajpn tyajkutëkooytya'ajanyën mëti'ipë mpaatantëpën ets nëjkx m'atëkoytyë, mëët ko ënety ja Wintsën të xykyamëmëtowtë ets të xykyamëjpëjkta'aktë.