Deuteronomio 5 - Biblia Dc en Mixe de Quetzaltepec

Ja majkpë ja tëyajtën

¹ Wa'ats ja Moisés tyajtu'ukmujktaay ja Israel kajpn ets t'ënëmaay: Mëtoow'itë miitsëty Israel ja'ayëty ya'atë tëyajtën ets ya'atë aaw ayuk, mëti'ipë yam ntukmëtowantëpën. Yajwë'ëmtë yajxon mkëpajkjoty mwinma'anyjoty ets mpatuntëp.

² Miitsëty wa'ats xynyijawëtë ko yë nWintsën'ajtëm Dios tu'uk yë käjpxytyu'unën të ojts tuny mëët ëëts'ajtëmë jam ma Horeb kopkën.

³ Ka'ap yi'iyëty mëët ja käjpxytyu'unën tuuny ja n'ap'ajt n'ok'ajtëmë, näjyëtu'un mëët ëëts'ajtëmë jënu'un tyam yaa nyajpatëmën.

⁴ Yë Wintsën yajxon ojts wa'ats tyimkäjpxy jam kopkkëjxm wiinxë jëjpxë jëënjoty.

⁵ Ëjts itkujkyës ënety nyajpaaty ma Tiosën mëët miitsëty ets ntuk'ëwaanëtëty tii ja Dios kyäjpxyp. Jä'ä ko ja jëën mëti'ipë jam këxë'kën ojts ja xytsyë'ëkëtë, paaty ka'ap tjëkyejpy jam mpätëty kopkkëjxm. Ets ja Wintsën ojts y'ënä'äny:

⁶ Ëjts jëtu'un Wintsën, mëti'ipë mijts mTios'ajtypyën ets jap nju'ty Egiptë, ma ënety m'ëyoyën mmëtunyën.

⁷ Ka'ap wiinkpë Dios xy'ëwtatëty tä ëjtsën.

⁸ Ka'ap xyajnikojtu'utëty ets xy'ëwtatëty mëti'ipë yajpatpën tsajpkëjxm, naaxkëjxy, nëëjoty ets naaxpa'tkë'pë y'ityën.

⁹ Ka'ap xywyinkoxtänëty ets ka'ap xymyëjjawëty, jä'ä tu'ukyës ëjts nWintsën'aty mëti'ipë mTios'ajtypyën. Ëjts Dios mëti'ipë ni'akë'ajtpën, ntëytyuunpës ja nyëë pyoky ja taak teety ma ja y'u'unk y'ëna'këtyën ets mëtëkëëk mëmajktaxk najtskä'äxëpë.

¹⁰ E mëti'ipës xytsyojkp xyjya'apën ets pyatuumpy ja n'ënä'ämënës ntëyajtënës, mëkës ntsoky njawë ets ka'ap tsyojk'amëty, kë'ëyxyëëw kë'ëyjyëmëjt jëtu'un.

¹¹ Ka'ap namaa natii xyjyawëty yë Wintsën yë xyëëw mëti'ipë mTios'ajtypyën, jä'ä ko yë'ë ka'ap jëtu'unyë tnayajninaxa'any, ko pën nëkoo xyëëw nëxik tukxikëty.

¹² Mja'amyätsëp yë po'kxënxëëw ets jää yë Wintsën xymyëjjawëty, jëtu'un tä yë mWintsën Dios të mtuk'ëne'emyën.

¹³ Tëtujkxëëw mtunëty ets jä'ä xytyuunka'pxëty mëti'ipë ënety mtunäämpyën.

¹⁴ E ma wyëxtujk xëëwpetyën po'kxënxëëw jä'ä pyatnëp ets mWintsën Dios mëpaat jää yajmëjjawë. Ma tääpë po'kxënxëëwën ka'ap pën tyunëty, ka'ap jää tyunëty yë mmaank, mnëëx, mtuunpë ye'etyëjkpë to'oxytyëjkpë; jaaypyaat jaaypyo'kxy; mjëyujk mtsajpkaa, mëti'ipë yajpatpën ma mnaax mkajpnën. Jëtu'un'äämpy pyo'kxtëty yë mtuunpë ye'etyëjkpë to'oxytyëjkpë.

¹⁵ Ja'amyäts ko näjyëtu'un ojts mijts mmëtuny jap Egiptë ets Dios mëti'ipë mTios'ajtypyën ojts jap mjuutyë mëët yë myëj'ajtën kyutujkën. E paaty tyam yë mWintsën Dios, mtuk'ëne'emyë ko kopkpëky ko xymyëjjawëty yë po'kxënxëëw.

¹⁶ Wintsë'ëkë yë mtaak mteety jëtu'un tä yë mWintsën të tni'ënä'ämën, jëtu'un jeky ets jotkujk mjuuky'atëty ma ja naax kamën mëti'ipë ja mWintsën mo'ojanëpën.

¹⁷ Ka'ap myajja'ay'ookëty.

¹⁸ Ka'ap xyajwintsë'këntyëkoyëty yë pëjkën ukën.

¹⁹ Ka'ap mtonëty määtsëty.

²⁰ Këtii yë mëku'uk xynyi'antaakëty.

²¹ Ka'ap yë mëku'uk yë tyo'oxytyëjk xy'atsojkëty. Ka'ap xy'atsojkpëty yë jyëën tyëjk, kyam tyu'u, myëtuunpë kyupëjkpë, jyëyujk tsyajpkaa ets tëkokyë tii myëët'ajtypyën, nitii xykya''atsojkëty.

Wi'ix yë naax kajpn tsyë'këtyën jya'awëtyën

²² Ya'atë ja aaw ayuk mëti'ipë ja Wintsën mëk nyikajpxën jëën'akujky, ma ënety ja yoots yëkëm kyëxë'ëkyën ets miitsëty aak mtam'ajtëp jam kopk'ëjxm. Ko myëtyaktaay, ka'ap ojts wi'ix y'ëk'ënanë, ja tëyajtën jam ojts tkëxja'ay ma ja mäjtskpë ja tsaatsetsyën etsës ojts xymyo'oy.

²³ E ko xymyëtoowtë ja y'aaw y'ayuk jam jokjotm ets jëtu'un jëënyä'änk jyänty pyëtsimy jam kopkkëjxm, ënät miitsëty mëët ja mëjja'aytyëjkëty xynyimintës.

²⁴ Tääts xy'ënëmaaytyës: Tëyajtën yë'ë, ko yë Wintsën mëti'ipë ëëtsëty nTios'ajtëpën yaj'ijxëp yë myëj'ajt y'oyajtën. Jä'ä ko tëë kë'ëm ntimmyëtowtës yë y'aaw y'ayuk mëti'ipë të yajmëtoyën jap jëën akujky. Tyam ënät yajnijawë ko Dios mëtyakp yë wiinxë jëjpxë ets ko yë'ë tuknipëjktaakë ka'ap xyaj'o'kmëty.

²⁵ E ka'ap yowë y'oy'atëty ko ya'atë jëën yë'ë ntimnyätyukyaj'o'këmëty. Ko ënät njaaktimmyëto'owmëty ja Wintsën ja kyäjpxy myëtyä'äky jëën'akujky tsojk n'o'kmëty.

²⁶ ¿Tyaapë jëtu'unpë yaj'ixyën pën naaxwiinyëtë ja'ay y'ëkwintänëp, ma Dios kyäjpxy myëtyä'äkyën ets ka'ap niwi'ix jyatëty kyëpätëty, jëtu'un tä ëëts Tyam të nmëtowtën?.

²⁷ Niikë mijts ninëjkx ets winkon xymyëtowëty mëti'ipë Wintsën nyikajpxäämpyën ets mijts xytyuk'ëwaanëtëtyës mëti'ipë të mtukmëmëtyä'äkyën, tyam ëëts npatuntëty pën tii yë'ë xytyuk'ënä'ämtëpës.

²⁸ Ma ënety jam xymyëmëtya'aktënës, yë Wintsën wa'ats tmëtooy; paatyës xy'ënëmaay: Tëës nmëtoy, wi'ix tyaapë kajpn të y'ëna'antën, ëjts oyës të nmëtoy.

²⁹ Jëtu'un jeexyë xëmë myäytyë tyajtë etsës jeexyë xywyinkutsë'ëkëtë ets tpatuntëty yë n'ënä'ämënës ntëyajtënës winjëpom, ko jeexyë y'ëkjëtu'un'aty janty jotkujk jeexyë jyuuky'atë winë xëëw winë jëmëjt ets näjyëtu'un ja y'u'unk y'ëna'këty.

³⁰ Nëjkx ets ënëëmë wä'än jatëkok tnëjkxta'atë ma y'ijtaknëtyën.

³¹ E mijts wë'ëmës yaa mëët ëjts, jä'ä ko yë'ë yam ntuk'ëwaanëjäämpy tëkokyë ja ënä'ämën tëyajtën, ja kuttujkën ets ja aaw ayuk mëti'ipë ënät mnikajpx mnimëtya'akëpën ets yë'ë pyatuntëp, ko ënety jam yajpatnëtë ma ja naax kajpnën mëti'ipës nmo'ojantëpën ets tjä'ä'atëty.

³² E paaty yam n'ënëëmëtë, ko mtuntëp mëti'ipë të mtuk'ënä'ämëtën ja Wintsën Dios ets këtii nijëna'a xy'ëxmatstëty.

³³ Yë'ë ja në'ë tu'u panëjkxtë mëti'ipë ja Dios të mtukni''ixëtën ets jëtu'un jotkujk mjuuky'atëty jeky ma ja it naaxwiinyëtën mëti'ipë ja Wintsën të mmo'ojëtën ets xyjyä'ä'atëty.