Deuteronomio 34 - Biblia Dc en Mixe de Quetzaltepec

Ma Moisés y'ookyën ets nyaaxtëkë

¹ Ënet ja Moisés jam tsyo'ony Moab mëti'ipë të'ëts'itjotmën ets ojts jam nyijkxy ma ja Nebo kopkën, jam ojts pyety ma Pisgá kopkën, jyä'äjty ma ja kopkupi'tsykyën ma mëët nyäwyinku'ixëty yë Jericó kajpn. Ënet ja Wintsën jam y'ënëmaayë: Tuk'ijxëtya'a yë Galaad y'itjotm ets jampaat ma ja Dan y'itjotmën,

² ma ja nyaaxjotmën ja Neftalí, Efraín, Manasés ets Judá; tyimja'ty jam ma ja Mejyën Naax'akujkpyë,

³ nyajxë'ëky jam ma ja Négueb y'itjotën ets ma ja Jordán mëj joyjyotën, mëti'ipë ja Jericó nyitënääpyën, mëti'ipë ijty yajtijpën Tëëxykyepy kyajpn ets jyä'ty jam Zoar.

⁴ Tä ja Wintsën y'ënëmaayë: Ya'atë it ya'atë naaxwiinyëtë jëtu'un ojts ntukwinwanëtës yë Abraham, Isaac ets Jacob ets n'ënëmaaytyës yë y'u'unk y'okëty yë'ë nëjkx ya'atë naaxwiinyëtë tjä'ä'atë. Täätsës të ntuknipëjktaakë, ko mijts oy je'eyë jëkäm xyjyaaknajts'ixëty, jä'ä ko ka'ap nëjkx jam m'ëk ja'ajnë.

⁵ Jëtu'un'äämpy ojts ja Moisés y'o'knë mëti'ipë ja Dios oy myëtuunën, jam ojts y'o'knë Moab ets y'atëëy jëtu'un tä ënety ja Wintsën të tnikäjpxyën.

⁶ Jam nyaaxtëjkëy joyjyotm ma ja Moab tnitänën, winkon ma ja it naaxwiinyëtë txëëwatyën Bet-peor, tyampaat ni pën tääpë it naaxwiinyëtë tkanijawë.

⁷ Ko yë Moisés y'o'ky jä'ä ënety yë jyëmëjnë mëko'px ja i'px, ka'ap ojts nijëna'a yë y'ijxën myony ets nijëna'a ojts kyapëky kya'ixyë, tyim'o'ky jëtu'un.

⁸ Yë Israel ja'ayëty tu'kpo'o tnijëëy tniyaxtë yë Moisés ko y'oky jam Moab, i'px majk xëëw y'ijtë mon tuk, jä'ä ko jëtu'un ënety myontë tyuktë ko pën y'ooky.

⁹ E yë Josué yë myaank, yë Nun, tëë ënety yë Moisés yaj'ijxpëkyë ets wa'ats tnija'awëtyä'äy wi'ix ja naax kajpn tu'uwinye'eyëtyën; tëë ënety ja Moisés ja kuttujkën myo'oyë ma jyaak juuky'ätynyëmën, paaty ja Israel ja'ayëty ojts y'ëna'antë ets yë'ë tmëmëtowa'antë, tä ja Moisés ënety të tyuk'ëne'emyën ja Wintsën.

¹⁰ E oy jyajëtu'un'ajty, ka'ap ojts nijëna'a maa käjpxynyajxpë jëtu'unpë y'ëkëxë'knë tä yë Moisésën mëti'ipë timkajpx timmëtyakën mëët yë Wintsën wiinxë jëjpxë,

¹¹ ëkë tyaj'ixëtëty mëjwiin këjää ja Wintsën ja myëj'ajtën tä yë Moisés jap tuunyën Egiptë yajkutujkpë wyintuuy, ko ja ëyo'on jap kyëtäky mëjwiin këjää ma ja yajkutujkpën ets ma ja wyintsëntëjkën,

¹² ets ja mëk'ajtën jëtu'un tmëët'atëty tä yë'ë tmëët'ajtyën ets winë tunëty jëtu'un tä yë'ë tuunyën winë ma tëkokyë yë Israel ja'ayëtyën.