Deuteronomio 32 - Biblia Dc en Mixe de Quetzaltepec

¹ Ets y'ënäny: Tsajp ets naaxwiinyëtë; mëtoow'itë ya'atë aaw ayuk mëti'ipës yam nkajpxäämpyën, ja'akyukëtë yajxon.

² Jëtu'unës yam ya'atë aaw ayuk najtsmatsëja'any, tä tyu'uy pyojyën, ets jya'tëty jap ma jot winma'anyën, tä yë maanikën, tä yë tuu kyëtä'äkyën naaxkëjxy ets tä yë maanik tyajxookyën yë mëëynyak.

³ Yë'ëjës yam nikajpxäämpy yë Wintsën yë xyëëw, ets xynyijawëtëty ko yë Dios mëj këjää yë winë tuny.

⁴ Yë Wintsën yë'ë xykyuwa'an xykyënu'kxëm, yë'ë aak'oy winë tuny, ko tii tuny aakyë'ë mëti'ipë mëtëyën. Yë'ë Tios'ajtp ets yë'ë tëy'ajtën'ajtp, yë'ë nijëna'a winë tëkatsy tkatuny, yë'ë tyuunpy mëti'ipë oyën ets mëtëyën.

⁵ Miitsëty ëxëëkja'aytyëjkëty, mëti'ipë ka'ap oypyë ja jot winma'any xymyëët'atën, mëti'ipë je'eyë yajjoot'anpëjktëpën yë Dios, ets ka'apë pyaatëtë yaj'u'unkniwa'antëty.

⁶ ¿E jëtu'un ja Wintsën ja y'oyjyot y'oywyinma'any xyajwinpijtëtë? Miitsëty naax kajpnëty, ma ka'ap yajxon mmaytyën mtajtën ets ka'ap tii xynyijawëtë, ¿këtii xytyimnija'awënëtë ko yë'ë xytyeety'atë ets yë'ë të myajkojëtë? Yë'ë të myajkojëtë ets yë'ë ja juukyajtën të mo'ojëtë.

⁷ Ëkmëmay ëkmëtaj, ets ëkja'amyäts ja tëëyëpë; pën ka'ap xyjyä'äymyetsy, yajtëw ja mteety mtaak, wä'än mtukmëmëtyä'äkyë:

⁸ Tëëyëp, yë Dios Ni'ik Këjxmëpë, ojts tyajwä'kxy yë naaxwiinyëtë, ets näjyëtu'un yë naax kajpn, ko ojts tyajnämyä'kxyë, ënät ojts tpëjktä'äky ja nyitsëpa'an. E ja Israel ja'ayëty ka'ap ojts tja'atyëkoy, ni'ikyë tsojky tja'awëy.

⁹ Jä'ä ko mëti'ipë yë Wintsën kyuma'ayën'ajtypyën yë'ë yë Jacob yë y'u'unk y'ëna'k ets yë'ë jyä'ä'ajtyp.

¹⁰ Jam ojts tpaaty të'ëts'itjotm, ma ënety je'eyë jyëënpojyën ets naaxway je'eyë këëynyääpy, jëtu'un ojts tkëwent'aty tä u'unk maay yajpity yajmotsyën, ets yajtseeny yajkonyën, ojts yajxon tnë'ëwinwoy tu'uwinwoy, ojts mëk tkëwent'ajty, jëtu'un tä ja'ay yë wyiinsantë tkëwent'atyën, janty tii mëpaat t'ëktukpaaty.

¹¹ Jëtu'un ojts timmyëët'aty tä yë witsn tnike'eky tkuke'ekyën yë pyä'än ma ja y'u'unk tyajmëxu'unk'atyën, jëtu'un yë kyäkn të tuknikë'ëy, tëë twoowmuky ets të tmu'uxy.

¹² Yë Wintsën yë'ë ojts kë'ëm tyimtu'uwinwowëtë, ka'ap wyiinkja'ayëty. Ka'ap ojts muum yë wiink wintsën y'ëktso'onpë ets tyu'uwinwoowëtë.

¹³ Yë'ë ojts xëmë yajmëta'akëtë oymyaajëty, tyimjajtë jam jëtu'un kopkkëjxm, ko jam jyajtë ojts tyukjë'kxëtë ja aaytyëëm ujtstëëm jampë yajpaatyën kamjotm tu'ujotm, ojts tyukjë'kxëtyë ja uuxpa'ak, mëti'ipë ojts tsaajoty tpaatën, ets ja on mëti'ipë tsaakëjxm yoonë'kpën.

¹⁴ Ma tsyajpkaato'oxyëtyën jam ja y'on tpatë ets quesë; ojts tsu'utstë yë tsajppax ets kupixyny oyëtypë ni'kxëtypë aakyë'ë jëtu'unpë tä mëti'ipë jamën Basán; aakyë'ë kyääytyë y'uktë oyëtypë tsajpmok ets yë'ë tyukpa'uktëp tsatym nyëë, jëtu'unpë ja nyëë y'akëxë'ëkën tä ne'pynyën.

¹⁵ Yë Jesurún ja'ayëty yajxon të nyi'kxëtë, je'eyë y'atë'kxnëtë mëët ko ku'uxyë jotkëtä'äky të jyë'kxtë; tyam amëj akëjxm nyäjya'awënëtë. Ko jëtu'un të y'ixë'aty ënät ja Wintsën të tja'atyëkoyëtë mëti'ipë ojts yajkoj pyëjkta'akëtën; tyam ixtijy tyajnajxnëtë ja mëti'ipë këwent'ajtëtëpën ets mëti'ipë yajnitsokëtëpën.

¹⁶ Tëë yë Dios tyajjoot'anpëktë ko të t'ëwtatë naaxpotsy.

¹⁷ Ko të tmo'otë yë wyintsë'kën yë mëjku'u mëti'ipë ka'ap tyiosëtyën ets ka'ap t'ixy'atë. Ja maywyintsën mëti'ipë tyijtëpën, ko jemy, mëti'ipë ka'ap nijëna'a ja y'aptëjk t'ixyajtën.

¹⁸ Mijts Israel ja'ayëty tëë ja mteety xyjyä'äytyëkooynyë, mëti'ipë mkëwent'ajtëpën. Tëë xyjyä'äytyëkooynyë ja mTios mëti'ipë juukyajtën mooyëpën.

¹⁹ Ko yë Dios jëtu'un t'ijxy ojts jyoot'anpëky ets ojts näjyëtu'un timjyä'ätyëkooynyë ja y'u'unk y'ëna'k ye'etyëjk to'oxytyëjkpë,

²⁰ ets y'ënäny: Nikë oyës yë Israel ja'ayëty ntimjyä'äytyëkoyëty ets ntimy'ëxmatsëty, min n'ëk'ixyës tii winma'any pyatëp. Tëës yam kë'ëm n'ixy, ko yë'ëjëty je'eyë y'ëxëëkjot y'ëxëëk winma'anyëty, wi'ixës n'ëktuk'ijxpätëty.

²¹ Yë'ëjëty je'eyës xëmë xyajjoot'anpëktë. Jä'ä ko ënätyë wiink wintsën tpanëjkxtëkëtë, ëxëëkës njanäjyawëty, ko yë'ë tmëjjawëtë ka'apë wyintsënëtyën. E kajts wyi'ixëty oy ko jyëtu'unëty, nëjkxëp yë ja'ay ëxëëk tyunëtë mëti'ipë jëtu'unyë jëtijtëpën, ka'apë yajnijawën maajën kyukajpn'atë, nëjkxëp yajtsipkä'äxëtë yë ja'ay mëti'ipë ka'ap ninu'un jyä'äkyukën.

²² E ëjts yajxonës yë njoot'an të tsyooypyëjknë jëtu'un tä jëënën. Jëtu'unës yë njot nwinma'any tyam nja'awënë, tä yë patoyëjëën jyëtityën tunkëjxm kopkkëjxm ets tyajtooytyä'äy tëkokyë yë aay ujts, aay kepy; jëtu'un tä jap kopk'ëjxyën ets ma kopk kupi'tykyën wa'ats tyajwintooytyuta'ay.

²³ E tyam tëëjës ntuknipëjktaakë ko ma yë'ëjëtyën kanaakjëjpës yë ëyo'on nyajkëta'aka'any. Jëtu'unës jam ja ëyo'on mpëjkta'aka'any ma yë'ëjëtyën, tä yë ja'ay yë tyi'pxn tnajtstijëy jam ma tyajja'ta'anyën.

²⁴ Yë jëënpa'am ets yuu yë'ë nëjkx yaj'o'kta'ajëtë, ma yë'ëjëtyën jam'atëp yë pa'am ëyo'on, jëënpa'am ets jëyujk mëti'ipë yajja'ay'ookëpën, tä yë tsa'anyën, kaa jëyujkën ets jëyujk ëwa'anëtypë.

²⁵ Yë y'u'unkëty y'ëna'këty jam nëjkx muum kupuxy y'ooktë tu'ujotm, jap tyëkotyëty tsë'ëkëtëp jam xëmë, ooktëp ja yä'äy'ëna'k, to'oxy'ëna'k, mëjja'ay mutskja'aypyë, pi'k'ëna'këty mëti'ipë tsi'tstëpnëm.

²⁶ E jëtu'un nëjkx jyatë kyëpätë, jä'ä koos tëëjës ënety ntuknipëjktaakë, koos jëtu'unyë n'awojpwa'kxa'antë, ets ja xyëëw ntimjyo'otsanëtës ma ya'atë it naaxwiinyëtën,

²⁷ e ëjts ka'apës tu'ukyë njoot'anpëky, ënätës jatëkok nmayä'äny ntaja'any ka'ap yowë jëtu'un tyim'oy'atëty koos yë nmëtsip ntimyajxoonta'akëty. Ka'apës ntsoky ets mëj këjxm nyäjyawëtëty, ëkë y'ëna'antëty: Ix ënät ëxëëk jyajnëtë kyëpäjnëtë yë Israel ja'ayëty, ëëtsajtëm jëtu'un o'ktëy të ntu'unëmë, ka'ap yë'ëjëty yë Wintsën.

²⁸ Nija'apës ko yë Israel ja'ayëty tëë yë jyot wyinma'any tyajtëkoytyë. ¿Tii ko jyëtu'unëty? Ja'aykyujkën kyamëët'ajtëp.

²⁹ Kooxyëp jeexyë y'ëkwijy'atë ets oy winë tmëmay tmëtajtë; wyinja'awëtyëp jeexyë ma jya'ta'antën ma ka'ap oy jyuuky'atëtyën.

³⁰ Tu'uk je'eyë ja myëtsip mëti'ipë nitu'kmil yajkekpyën ja myëtsip. ¿Wi'ix jëtää ko jyëtu'unëty? E ja mäjtskpë ja myëtsip majk mil tyajke'eky. ¿Näy wi'ix ko jyëtu'unëty? E ¿tiikyëjxm ko jëtu'un jyajnëtë kyëpäjnëtë? Yë'ë ko Wintsën jëtu'un të tuknipëjktaakë, mëti'ipë ijty këwent'ajtëtëpën. E tyam jä'ä ko tëë y'ëxmajtsënëtë, paaty o'ktëy jyajnëtë kyëpäjnëtë ma ja myëtsipëtyën.

³¹ Yë mëtsip wa'ats tnijawëtë, ko yë kyuwaanpëty, ka'ap jyëtu'unëty tä nkuwaanpë'ajtëmën.

³² Yë'ëjëty je'eyë nëkoo wyin'ëën wyinxajtë, je'eyë ja y'ëxëëkjot y'ëxëëk winma'anyëty, tä ja ja'ayëtyën jampë tsyënaaytyën Sodomë ets Gomorra, ma janty oyëty jyayaj'ixyën ja tsatym kyepy jyayony jyajiitsy, e ko një'kxmëty xunëm, ta'amëm y'atëkë.

³³ Jä'ä jëtu'un ja uuky mëti'ipë tsooymyëëtën, ja uuky mëti'ipë poj'am yaj'o'kpën, tä yë tsa'any yë xyëwätën.

³⁴ E tëkokyë ya'atë tyunyën jyätyën nja'amyejtsypës yë'ë, tsyapës ntuknipëjkë'ëkëtë, mëti'ipë nëjkx ëxëëk tmëjat tmëkëpätën, jëtu'un tä ja'ay yë wyit myeeny tpëjkë'ëkyën.

³⁵ Jääjës yë ntuknipëjktaakë nyajpëtsëma'any, koos ënety ntuunwinpity, mëët wi'ixës ja y'ëxëëkjot y'ëxëëk winma'any të xytyuk'ixtën, ets ko ënety o'ktëy jyajnëtë kyëpäjnëtë. E timwinkoonp ma ënät kyutëkooytya'atëtyën, tyimpatyp ja xëëw po'o.

³⁶ Yë Wintsën nyiwaantu'utäämpy yë nyaax kyajpn, ko ënety t'ixy të y'ënu'kxëtyääynyëtë. Yë Wintsën pya'ëyowäämpy yë tyuunpë kyupëjkpë, ko ënety t'ix, ko ka'ap ma pën mëti'ipë ka'ap myëkëtyën ets mëti'ipë mëkëtyën.

³⁷ Ënet nëjkx ja Israel ja'ayëty t'ënëëmëtë ja myëtsip: ¿Maaxën ja mtiosëty mëti'ipë ënety mnikapxtëpën, ko yë'ë m'ijx'it mkëwent'atëtë, ets yë'ë xëmë mtimtyuk'ijxpäjtëp,

³⁸ ja mëti'ipë jyë'kxtëp pyëjktëpën ja wintsë'kën, ets mëti'ipë y'uktëpën ja tsatym nyëë mëti'ipë mooytyëpën, ets mtukwintsë'këtyëpën? Wä'än yë'ë tminy ets mputëkëtëty. Wä'än mniminëtë ets mkëwent'atëtëty.

³⁹ Ëjts jëtu'un tu'kpajk Tios'ajtp; ka'ap maa pën wiinkpë tios. Ëjts nyäjkpyës yë juukyajtën, etsës mpëjkpyës jatëkok. Ëjts yajtsëtyujtp yajwintëkoopyës, ets yajtsokp yaj'akëtakpës. Ni pën tkajëkyepy tkukä'äkëty ëjts yë nmëk'ajtën.

⁴⁰ Tyamës yë nkë'ë nxajë'ëky etsës yam nikäjpxy maas ëjts kë'ëyxyëëw kë'ëyjyëmëjt njuuky'ätyën.

⁴¹ Koos ënety tëë ntuknipëjktaakë, etsës ja ëyo'on nyaj'ita'any, ets jëtu'un ja nëë poky nipaye'eyëtyës, ëxëëkës nëjkx ntuny ja nmëtsiptëjkës, ets ntukumëtowa'antës, mëët wi'ixës të xytyimtuntën. Ja mëti'ipës ënety xy'ëxëëk'ijxypyën, ëxëëkës nëjkx nyajjaty nyajkëpety.

⁴² Nëjkxëpës yë mayjyä'äy nyaj'o'kta'ay, ets jëtu'unës nëjkx ja jyot nye'pyny ntäämëtë nja'tsëtë, këtii yowë y'ëmaayëty, ets nkupujxta'aja'anyës tëkokyë mëët ja nyenypyujxnës, temy je'etsy nëjkx yë nye'pny y'itë yë tsëtyutja'ayëty, ets tsumjyä'äytyëjkëty. Ja mëtsip ja wyintsëntëjkëty mëti'ipë ja wyääyëtyën yeny.

⁴³ Miitsëty naaxëty kajpnëty, xoonta'aktë mëët tu'kmukyë yë Wintsën yë nyaax kyajpn. Yë'ë ka'ap jëtu'unyë näyajninaxa'any, ko yë y'u'unk y'ëna'k y'ooktë tyëkoytyë. Pyaatëp yë xëëw po'o jëna'a ets tyajkutëkooytya'ajëty yë myëtsiptëjk, ets nëjkx ja nyaax kyajpn tpokymye'kxy.

Wi'ix ja Moisés ojts ja aaw ayuk tjaakyäkyën ko y'ookanë

^44-45 Ënet ja Moisés mëët ja Josué ojts jam nyäwya'këxë'ëkëtë ma ja mayjyä'äyën, ma ënety ja Israel ja'ayëty të nyiye'eypyäjta'atën. Ets ja Moisés mëët yë Josué, yë myaank yë Nun ojts nimäjtsk t'ëwtë ja ëy mëti'ipë ja Moisés jyääyën, ix'ajp ojts t'ëëwtsoontë ets jëtu'un tyajjëjpkëjxtë.

⁴⁶ Ko y'ëëwtaaytyë ënät yë Moisés t'ënëmaay ja naax kajpn: Mëmay mëtajtë tyam mëti'ipë të ntukmëmëtya'aktën, nëjkxëp näjyëtu'un xytyukmëmëtya'aktë ya'atë aaw ayuk, mëti'ipë ja ënä'ämën tëyajtën nyimëtyäkpyën.

⁴⁷ Ya'atë aaw ayuk ka'ap tjëkyepy namaa natii xyjyawëtëty, ya'atë ënä'ämën yë'ë nëjkx myajjuuky'atëtë ko xypyatuntëty. Ko xytyuntëty ijxtëm y'ëne'emyën, jeky nëjkx mjuuky'atë ma ja it naaxwiinyëtën jampë yajpaatyën nëë awinaxy, ma Jordán mëjnëëjën, mëti'ipë miitsëty mniwa'akantëpën.

Yë Tios tuk'ixy yë Moisés ja it naaxwiinyëtë mëti'ipë wyinwa'anëyën

⁴⁸ Jä'ä xëëw ojts yë Wintsën tmëkäjpxy yë Moisés ets t'ënëmaay:

⁴⁹ Nëjkx jam Abarim ets mpätëty jam Nebo kopkkëjxm. Yë y'itjot yë Moab ja'ayëty, mëti'ipë mëët nyäwyinku'ixëtyën yë Jericó, jamts mku'ijxnaxëty ets xynyinas'ixëty Canaán itjot, mëti'ipës nmo'ojäämpyën yë Israel ja'ayëty ets yë'ë tjä'ä'atëty.

⁵⁰ Jam kopkkëjxm ma ënety të mpetyën, jam nëjkx m'ooky mtëkoy ets mëët mnämyukëtëty ja m'ap m'ok tä yë m'ajty Aaronkën, mëti'ipë ojts jam y'ookyën ma Hor kopkën ets ojts mëët tyu'ukmuky ja y'aptëjk.

⁵¹ Miitsëty nimäjtsk mëët yë m'ajty Aarón, ka'apës ojts xywyinkutsë'ëkëtë jam Meribá-Cadés, jam të'ëts'itjotm ma Zin yë y'itjotmën; ma ja nëë pyëtsiimyën tsaajoty ko ja Israel ja'ayëty ojts xytyukjoot'anpëktës, miitsëty ka'apës ojts xymyëjjawëtë.

⁵² Paaty tyam je'eyë jëkämy xyjyaaknajts'ixëty ja it naaxwiinyëtë, mëti'ipë yë Israel ja'ayëty nmo'ojantëpësën, e mijts ka'ap nëjkx jam m'ëk ja'ajnë.