Deuteronomio 30 - Biblia Dc en Mixe de Quetzaltepec

Tii mëpaat yajtunyën ets ja Wintsën jyotwinpitëty

¹ Ko ënety jëtu'un mjaty mkëpety, ma yam të yajnikäjpxyën ja näkyënu'kxë ets ja näpyojkën ets mjootja'tëtëty mëktä'äky ya'atë aaw ayuk jam wiink naax wiink kajpn, ma ja mWintsën të mnajtswop të mnajtskäxëtën.

² Ets mjootwinpitëty, xyjyä'ämyätstëty jatëkok ja Wintsën mëët tu'kë'ëyë ja m'u'unk m'ëna'k ets xytyuntëty winë aaw winëjot tä yam të ntuk'ënä'ämtën.

³ Ja Wintsën nëjkxëp mpa'ëyowëtë ets myajjotkujkta'akëtë, nëjkxëp jatëkok myajtu'ukmukëtë oy ënety muum mtimyajpaatë,

⁴ ja mmëku'uktëjkëty mëti'ipë ënety muum jëkäm yajpatëpën wiink'it wiink naaxwiinyëtë, yë Wintsën nëjkxëp jam yajtsoonëtë ets wyoowmukëtë.

⁵ Ënet ja Wintsën nëjkx jatëkok tyajye'eymyujkta'ay ja ja'ay ma ja mnaax mkajpnëtyën, mëti'ipë ja m'ap m'ok tyukwinwa'anëyën ets ja kajpn xyajwintuktëty. Nëjkxëp jatëkok xypyaatë xy'ixtë ja wit meeny, ja jë'kxy pëky ets ja u'unk ëna'k mëjwiin këjää.

⁶ Nëjkxëp jap tpëjktä'äky ja oy'aaw oy'ayuk ma ja mjot mwinma'anyëtyën ets ma ja m'u'unk m'ok ja jyot wyinma'anyëtyën. Yë'ë nëjkx tu'ukyë xytsyoktë xyjyawëtë winë aaw winëjot, tu'ukyë jot tu'ukyë winma'any ets nëjkx jotkujk mjuuky'ajnëtë.

⁷ Yë Wintsën mëti'ipë miits mTiosajtëpën tyajkëtä'äky ja jotmay ma mmëtsipëtyën jëtu'un tä të yajnikäjpxyën ets mëti'ipë ënety të m'ëxëëk'ixëtën ets të m'ixjëtit të mpajëtitëtën.

⁸ E miitsëty nëjkxëp jatëkok mjootwinpitë ma ja Wintsënën ets nëjkx xymyëmëtowtë ets xypyatuunëtë ja y'ënä'ämën tyiyajtën, mëti'ipë tyam ntuk'ënä'ämtëpën.

⁹ Yë Wintsën yë'ë mputëkëjanëtëp oy tii xytyimtuntëty. Yë'ë nëjkx tkënu'kxy ja m'u'unk m'ëna'këty, mjëyujk mtsajpkaajëty, mtsajppax mkupixynyëty ets mkamëty mtu'ujëty, ijxtëm yam xymyëtowtën. Yë Wintsën jotkujk myaj'ita'anëtë. Jotkujk nëjkx nyäjyawëty ko ënety mputëkëtë, jëtu'un tä ijty tputëkën ja m'ap m'okëty.

¹⁰ E ënät jyëtu'un'atëty, pën mëmëtoowtëp yë Wintsën ets pën mpatuuntëp ja y'ënä'ämën tyiyajtën, mëti'ipë jap jaaypyety miinpën ma ja nokyën ma këxja'ay myiinta'ayën ja y'aaw y'ayuk ets ko ënety të mjootwinpitë winë aaw winëjot.

¹¹ Ijxtëm yam kë'ëm xy'ixtën xytyuntën ya'atë tëyajtën, ka'ap nëkooyë tsyipëty ijxkëm m'ënaanpëtë ka'ap yajmëmëta'akëty.

¹² Ka'ap jyamëty tsajpkëjxm yajpaaty ets pën y'ënaanpëty: ¿Pën jam ëkja'tëp tsajpkëjxm ets jam tyajtsoonëty ja ënä'ämën tëyajtën ets xytyuk'ijx xytyuknija'awëmëty?

¹³ Ëkë ka'ap jyamëty yajpaaty muum mejy winnaxy ets pën y'ëna'anëty: ¿Pën jëtää ya'atë mejy y'ëktuknaxëp ets nëjkx tyajtsoony ja ënä'ämën tëyajtën ets xytyuk'ijx xytyuknija'awëmëty tääts npatu'unmëty?

¹⁴ Ka'ap tjëkyepy pën jëtu'un y'ëna'anëty jä'ä ko tyaapë ënä'ämën tëyajtën janty winkon yajpaaty ma miitsëtyën; tam ma mwiin m'aawëtyën ets ma mjot mwinma'anyëtyën ets xypyatuntëty.

¹⁵ E tyam miits ënät mpatëtëp xywyin'ixtëty, mëti'ipë mtsojkën'ajtëp, pën yë'ë ja oyajtën ets ja juukyajtën ëkë pën yë'ë ja ëxëëkajtën ets ja o'kën tëko'oyën.

¹⁶ Pën mtuuntëp ijxtëm yam ntuk'ënä'ämtën ets pën mtsojktëp mja'awëtyëp ja mWintsën mëti'ipë mTiosajtëpën ets pën mpanëjkxtëp ja nyë'ë tyu'u ets pën mpatuuntëp ja y'ënä'ämën tyiyajtën ets ja y'aaw y'ayuk, jotkujk nëjkx mjuuky'atë ets Wintsën mëti'ipë miits mTiosajtëpën nëjkxëp mkënu'kxëtë näjyëtu'un ja m'u'unk m'ëna'këty jam ma ja it naaxwiinyëtën mëti'ipë mjä'ä'atantëpën.

¹⁷ E pën kajts xytyuntë këwentë, ja wiink wintsën jä'ä mpanëjkxtëjkëtyëp ets mwinkoxtënaaytyëp.

¹⁸ Tyam yajxon ntimtyukja'aymyätstë, ko miitsëty nëjkxëp m'o'kta'atë, ka'ap nëjkx ninu'un jam m'ëk poxnëtë ma ja it naaxwiinyëtën, mëti'ipë mnitsiptunantëpën ets xynyiwa'aka'antën, jä'ä jëtu'un ja jampë yajpaatyën nëë awinaxy, ma ja Jordán mëjnëëjën.

¹⁹ E tyam yë'ëjës yam yë tsajp ets naaxwiinyëtë npëjktäkpy tä jeexyë ijxpë nija'apën ets tä jeexyë y'ixtën myëtowtën ma miitsëtyën, ko miits yam ntukwin'ixtë, mëti'ipë juukyajtën mtsojkën'ajtëp: pën yë'ë mwin'ijxtëp ma jeky mjuuky'atëtyën ëkë pën yë'ë ja o'kën tëko'oyën. Pën yë'ë ja näkyënu'kxën ëkë pën yë'ë ja näpyojkën. Ëjts jëtu'unës yam kë'ëm n'ëna'any, ko yë'ë mwin'ijxtëp ja juukyajtën ma jeky mjuuky'atëtyën mëët ja m'u'unk m'okëty.

²⁰ Tsoktë jawëtë yë mWintsën, mëmëtowtë ets tu'ukyë yë'ë xypyanëjkxtëkëtëty. Jä'ä ko, ënät mjuuky'atëty ets jeky jam mtsëënëtëty ma ja it naaxwiinyëtën, mëti'ipë ojts tukwinwanën mëët ja aaw ayuk ja kutujkënmëëtpë ja Abraham, Isaac ets Jacob mëti'ipë miits m'ap'ajt m'ok'ajtëpën.