Deuteronomio 27 - Biblia Dc en Mixe de Quetzaltepec

Ja tsaa mëti'ipë ja'amyäjtsën wa'anëpën

¹ Ënet ja Moisés mëët ja mëjja'aytyëjkëty ojts ja ënä'ämën tyaktë ma ja naax kajpnën: Mtuntëp ya'atë mëti'ipë yam myajtuk'ënä'ämtëpën.

² Ko ënety jam të mja'ajnëtë ma ja Jordán mëjnëëjën ets ënety të xypyatnëtë ja naax kam mëti'ipë ja mWintsën Tiosëty mo'ojanëtëpën, nëjkxëp yë tsaa jam kanaak xytyajëtë ets xytyukwinkoytyëty yë jaam, jëtu'unts poop kyëxë'ëkëty.

³ Jam yajkëxja'ajëty tëkokyë mëti'ipës yam të nikäjpxyën. Mtuntëp jëtu'un ijxtëm yam yajni'ënä'ämën, ko ënety jam mjajnëtë, ma ja it naaxwiinyëtën ma ka'ap ja jë'kxy pëky y'ëmaaytyä'äkyën, mëti'ipë yë Wintsën mo'ojanëtëpën, mëti'ipë tyukwinwa'anëyën ja m'ap m'okëty.

⁴ Paaty ko ënety tëë xytyuknajxnëtë ja mëj Jordán nëë, nëjkxëp jam kopkëjxm xytyajëtë tu'uk yë tsaa ayenypë, ma txëëwatyën Ebal ets jaam poop xywyinkoytyëty.

^5-6 Nëjkxëp näjyëtu'un tu'uk yë wintsë'këntyakn xyaj'oyëtë, tsaa mtukpotstëp, mëti'ipë yë Wintsën miits yë mTiosëty jyä'ä'atëpën. Ja tsaa mëti'ipë ënety mtukpojtstëpën ëmuum xyajtuntëty këtii xypyu'uta'aktëty ëkë xytyätstëty. Ma ya'atë wintsë'këntyaknën, jam nëjkx yë Wintsën miits yë mTiosëty xymyo'otë yë wyintsë'kën nino'okpyë.

⁷ Ma ya'atë potsyën jam nëjkx näjyëtu'un yajyäky ja wintsë'kën, ko ënety ja nay'ëëw'oy näykyajpx'oyë y'ity mëët yë Dios ets nëjkx tu'uk yë mëj xëëw xytyuntë jam Dios wintum, ma nëjkx mkaytyë m'uuktën.

⁸ Jam tsaakëjxm jam nëjkx tëkokyë xykyëxjaaytya'atë ja aaw ayuk, mëti'ipë yam ntukni''ijxëtyëpën ets mëti'ipë të nmo'otën.

⁹ Ënet ja Moisés ojts tkäjpxy ja aaw ayuk ma ënety jyam'atën ja teetytyëjkëty ets ja Leví ja'ayëty, y'ënäny: Miitsëty Israel ja'ayëty, mëtoow'itë ya'atë ja aaw ayuk, mëti'ipë yam ntukmëtowantëpën. Tyam jä'ä miits të mnajxnëtë Dios yë nyaax kyajpn.

¹⁰ Paaty yë'ë jëtu'un mëmëtowtëp ets patuunëtë yë y'ënä'ämën tyiyajtën ets y'aaw y'ayuk, mëti'ipë të mtuknipëkëtën.

Ma yajnikäjpxyën kanaakpëky ja pojkën

¹¹ Jä'ä xëëw ja Moisés ojts näjyëtu'un tu'uk ja ënä'ämën tyajwë'ëmy ma ja naax kajpnën ets t'ënëmaay:

¹² Ko ënety tëë xytyuknajxnëtë ja mëjnëë, mëti'ipë yajtijpën Jordán, yë jyä'äjëty yë Simeón, Leví, Judá, Isacar, José ets Benjamín, yë'ë nëjkx jam wya'ak'oyëtë nitëtujk ma ja Guerizim kopkën ets ja naax kajpn yajkënu'kxëty.

¹³ E ja jyä'äyëty ja Rubén, Gad, Aser, Zabulón, Dan ets Neftalí, jam nëjkx wya'ak'oyëtë ma ja Ebal kopkën ets pojkën yajnikajpxëty ma ja naax kajpnën.

¹⁴ E ja Leví ja'ayëty mëti'ipë teety'ajtëpën, nëjkxëp tmëkajpxtë ja naax kajpn mëët ya'atë ja aaw ayuk:

¹⁵ Poky yë ja'ay wyë'ëmëty mëti'ipë yajkojpyën yë awinax, ja awinax mëti'ipë pujxn mëët y'oytyunyëtyën ets ja ja'ay mëti'ipë tyuunk'ajtypyën janty'oy ja ijxën tmo'ojëty ets ënät tpëjkta'akëty muum yu'utsytyuuy. Yë jëtu'unpë y'ëxëëk'ijxyp yë Wintsën. Ënet ja ja'ay y'ëtsowtëty: Oy, jëtu'un'atëp.

¹⁶ Poky yë ja'ay wyë'ëmëty, mëti'ipë ka'ap ja tyeety tyaak tmëj'ixy t'mëjpëjktä'äkyën. Ënet ja ja'ay y'ëtsowtëty: Oy, jëtu'un'atëp.

¹⁷ Poky yë ja'ay wyë'ëmëty, mëti'ipë tsëpa'an ayu'utsy ame'tsyë wyijtstëkajtsypyën, ma jyiiky myëku'uk mëët nyäpyäätyë. Ënet ja ja'ay y'ëtsowtëty: Oy, jëtu'un'atëp.

¹⁸ Poky yë ja'ay wyë'ëmëty mëti'ipë wyoowma'typyën tu'uk yë wiints. Ënet ja ja'ay y'ëtsowtëty: Oy, jëtu'un'atëp.

¹⁹ Poky yë ja'ay wyë'ëmëty, mëti'ipë o'ktëy yë jaaypyaat jaaypyo'kxy tyuunpyën näjyëtu'un yë ku'ookytyo'oxy ets ku'ooky'u'unk. Ënet ja ja'ay y'ëtsowtëty: Oy, jëtu'un'atëp.

²⁰ Poky yë ja'ay wyë'ëmëty mëti'ipë myëët'ajtypyën yë tyeety yë tyo'oxytyëjk. Jä'ä ko tyeety jëtu'un ënety yë myëyajtën wyintsë'kën yajtëkooyëp. Ënet ja ja'ay y'ëtsowtëty: Oy, jëtu'un'atëp.

²¹ Poky yë ja'ay wyë'ëmëty mëti'ipë yë jëyujk myëëtko'knääpyën, jëtu'un tä jeexyë tu'uk yë to'oxytyëjk tmëëtko'knë. Ënet ja ja'ay y'ëtsowtëty: Oy, jëtu'un'atëp.

²² Poky yë ja'ay wyë'ëmëty mëti'ipë myëëtko'knääpyën yë myëkä'äx to'oxytyëjkpë, oyxyëp wiink to'oxytyëjkëty tjataak'aty, tu'ukyë tyeetyëty tukmuktë, ëkë mëti'ipë wiinkteetyën, tu'ukyë ja tyaakëty tukmuktë. Ënet ja ja'ayëty y'ëtsowtëty: Oy, jëtu'un'atëp.

²³ Poky yë ja'ay wyë'ëmëty mëti'ipë myëëtko'knääpyën yë tyo'oxytyëjk më't. Ënet ja ja'ay y'ëtsowtëty: Oy, jëtu'un'atëp.

²⁴ Poky yë ja'ay wyë'ëmëty mëti'ipë yë jyiiky myëku'uk yaj'o'kpy yajtëkoopyën ets oy mëët të nyäjyawëty. Ënet ja ja'ay y'ëtsowtëty: Oy, jëtu'un'atëp.

²⁵ Poky yë ja'ay wyë'ëmëty mëti'ipë yë myëku'uk nyimeenypyijkpyën ets tyaj'ook tyajtëkoyëty, oy ënety nitii poky të tkatuny. Ënet ja ja'ay y'ëtsowtëty: Oy, jëtu'un'atëp.

²⁶ Poky yë ja'ay wyë'ëmëty mëti'ipë ka'ap tkupëkyën ya'atë aaw ayuk, mëti'ipë yajnikajpxpën ets ka'ap tpatuny. Ënet ja ja'ay y'ëtsowtëty: Oy, jëtu'un'atëp.