Deuteronomio 25 - Biblia Dc en Mixe de Quetzaltepec

¹ Ko nimäjtsk yë ja'ay tsyiptuntëty, nimäjtsk mëpaat jam nyëjkxtë ma ja yajkutujktaknën ets yajnipaye'eytyëty ja pyokyëty ets ja kutuunktëjkëty yë'ë nëjkx nikajpxtë pën ënety pokymyëët ets pën ka'ap.

² Ja ja'ay mëti'ipë pokykya'apën, nitëjkëyëp ets yajxon yajwinwopëty, ko'knë yajwopëty ma ja kutuunktëjk jamëtyën ets jëtu'un tkumëtowëty ja pyoky.

³ Ja mëti'ipë yajwojpën ka'ap tjëkyepy yajwopëty naxy wëxtyikxy'ok, këtiipë nyäjyawëtëty o'ktëy jam ma ja kutuunktëjkëtyën ets ma ja myëkunaax myëkukajpnën.

⁴ Këtii yë tsajpkaa xytyuk'ajäänë'ëktëty yë xuumy, ko ënety jam xyajpajk'aty ja tsajpmok.

Ko yë Leví ja'ay yë tyo'oxytyëjk tni'o'ktu'utëty

⁵ Pën nimäjtsk yë ye'etyëjk tu'kkä'äxpë tukmuktë tëjk ets tu'uk y'ookëty, e ka'ap nitu'uk ja y'u'unk; ja tyo'oxytyëjk ku'ookpyë ënety të wyë'ëmnën, ka'ap tjëkyepy oy pën ye'etyëjk mëët pyëkëty jatëkok, ja kyäpy jä'ä mëët pyëkëty, jä'ä ko yë'ë ja nyiye'etyëjk ja myëkä'äx.

⁶ Ko ja to'oxytyëjk mëtu'uk ëka'any ja y'u'unk tyajmëxu'unk'atëty, jëtu'un nëjkx tukxëëwatë tä ja mëjëyëjpë ja nyiye'etyëjk txëëwatyën, këtiipë ja xyëëw yaja'atyëkoyëty ma ja Israel ja nyaax kyajpnën.

⁷ E pën ja ye'etyëjk kajts tpëka'any ja kyäpy, ja to'oxytyëjk jam nëjkx tnikäjpxy ma ja kutuunktëjkëtyën ets ma ja mëjja'aytyëjkëty jam yajpaatën ets y'ëna'anëty: Yë nkäpyës ka'ap tsoky ets y'äjty yë xyëëw ja'amyetsy y'itëty ma Israel kajpnën. Ka'apës xypyëka'any, e ëjts nija'apës ko yë'ë patëp jä'ä ko yë'ëjës nkäpy'äjtyp.

⁸ Ënet nëjkx ja kutuunktëjkëty ets ja mëjja'aytyëjkëty tmëjwowtë ja ye'etyëjk ets tmëmëtya'aktëty. Pën janty ënaanpën ko ka'ap tpëka'any ja to'oxytyëjk, mëti'ipë ja y'äjty të tku'ookyën.

⁹ Ënet ja to'oxytyëjk twinmëtsujëty ja kyäpy ets tpëjkëty ja kyë'ëk tu'kpa'a ets t'ënëëmëty: Jëtu'un yë ye'etyëjk yajtuny mëti'ipë ka'ap tsokyën ets myëkä'äx yë xyëëw ja'amyetsy y'itëty mëti'ipë të y'ookyën.

¹⁰ E ja ye'etyëjk ja y'u'unk tyo'oxytyëjk, jä'ä nëjkx yajtijy jam ma ja Israel ja'ayëtyën kë'ëktuk.

Ja wiinkpë ja ënä'ämën

¹¹ Pën nimäjtsk yë ye'etyëjk nätsyi'këtëp ets tu'uk tyo'oxytyëjk nyiwaantu'utëtëty ets ja tu'uk jap yajmatsëty ma ja y'ëxtsyaa pajkën.

¹² Jëtu'umpë ja to'oxytyëjk këtii xypya'ëyowtëty, ni'ënä'ämëtë ënätyë ets ja kyë'ë yajnëtsukëty.

^13-14 Ko tii xytyooktëty këtii mkijpxni'ikëtëty, näjyëtu'un ko mjuytyëty këtii mkijpxni'ikëtëty.

¹⁵ Ko tii xykyijpxtëty ets xytyiytyëty, mëtëy mëpaat winë xytyiytyë xykyijpxtë. Jëtu'un'äämpy yë Wintsën jeky myajjuuky'atëtëty ma ja it naaxwiinyëtën, mëti'ipë myajmo'ojantëpën.

¹⁶ Jä'ä ko yë Wintsën y'ëxëëk'ijxyp, ko tii oy kyayajtuny.

Ma yajni'ënä'ämën ets Amalec ja'ayëty kyutëkooytya'atëty

¹⁷ Mja'amyätstëp jëtu'un wi'ix yë Amalec ja'ayëty ojts mtunëtën jam tu'ujotm, ko mtso'ontë jap Egiptë.

¹⁸ Yë'ëjëty ninu'un ojts yë Dios tkatimtsyë'ëkëtë, ko mnipëtë'këtë ets ëxëëk mtuunëtë, yë'ëjëty ojts tja'ixtë, ko tëë ënety m'ënu'kxëtyääynyëtë, ni'ikyë ojts ëxëëk o'ktëy tuntë, mëti'ipë ënety ix'am të wyë'ëmtën.

¹⁹ E paaty n'ënëëmëtë, ko ënety ja Wintsën tëë mputëkëtë ets ja mmëtsip tëë xyajkutëkooytya'atë, mëti'ipë winkon tsënaaytyëpën ma ja naax kamën mëti'ipë ja Wintsën mo'ojanëtëpën. Yë Amalec këtii xyjyä'äytyëkoytyëty, nëjkxëp xyajkutëkooytya'atë yë y'u'unk y'ëna'këty ets nyaax kyajpnëty.