Deuteronomio 24 - Biblia Dc en Mixe de Quetzaltepec

Ja nyitëyajtën wi'ix ja ja'ay yaj'ajaaywya'kxëtyën

¹ Pën yë ye'etyëjk tëë tu'uk yë to'oxytyëjk tpëky ets ok tukjotma'atëty, mëët ko t'ixy ka'ap nëkooyë y'oyëty ets ka'ap t'ëkmëëtsëënëjanëty, jyëkyejpy tu'uk ja noky tjä'äjëty ma yajnijawëty ko tëë ja to'oxytyëjk t'ëxmajtsnë ets ja to'oxytyëjk tmo'ojëty.

² Ja to'oxytyëjk pën tëë jam tsyo'onë ma ja ye'etyëjk ja tyëjkën, jyëkyäjpnëp mëët wiink ye'etyëjk pyëkëty.

³ E pën ja mëmäjtskpë ja nyiye'etyëjk näjyëtu'un ok tyukjotma'atyë ets tu'uk ja noky myo'ojëtëty ma ja awä'kxy'ajtën t'amëtoyën ets y'ixkäxëtëty ma ja tyëjkën, ëkë y'ookëty ja ye'etyëjk,

⁴ ja nyiye'etyëjk mëti'ipë mëjëwyiin pëjkën ukën ka'ap tjëkyepy y'ëkwoowënëty, jä'ä ko ja to'oxytyëjk tëë ënety nyäyaj'ëxëëktëkëty mëët ja wiink ye'etyëjk. Ko jatëkok nyäpyuwa'këtëpëty yë Wintsën nëjkxëp tyajpoky, e miitsëty ka'ap mëpaat xyajnipäxëtëkëtë ja naax kajpn mëti'ipë ja mWintsën Dios mooyëtëpën ets xyjyä'ä'atëty.

Ma kanaakjëjp ja ënä'ämën myinyën

⁵ Pën tu'uk yë ye'etyëjk naamnëm pyiky, ka'ap kyopkpëkyëty nyëjkxëty tsiptuunpë, ëkë atsip tii tunëty naaxjoty kajpnjoty. Tu'kjëmëjt ëwaatsë mëpaat yajpaaty ets tjëkyäpëty tmëët'atëty ja xëëw po'o ma ja tyo'oxytyëjk mëët yajpaatyën ets jotkujk ja tyo'oxytyëjk nyäjyawëtëty.

⁶ Ko pën mënu'kxy'atëtëty, këtii xypyëjkëtëty ja pyaan tsyu'ts mëti'ipë ja to'oxytyëjk tyukmeepy tyukjëjtypyën. Jä'ä ko jëtu'un xytyuntëty jëtu'un nëjkx tpaaty tä jeexyë ja jyuukyajtën xypyëjkëtën.

⁷ Ko tu'uk yë Israel ja'ay yajnijawëty ko tëë myëku'uk tkukä'ptuta'ay ets tyaj'awinpita'any ëyoopë mëtuunpë, ëkë tooka'any; tääpë ja'ay mëti'ipë ënety ja myëku'uk jëtu'un të tunyën, kopkpëky ko nëjkx tku'ookë jëtu'unpë ja tuuntëko'oyën. Jëtu'un'äämpy ka'ap yaj'ijxta'akëty ja nëë poky ma miitsëtyën.

⁸ Ko pën pyëkëtëty ja ëxëëk pu'uts pa'am, jëtu'un mëpaat xytyuntë, tä ja ënä'ämën myinyën mëti'ipë ja Leví ja'ayëty nyikajpxtëpën mëti'ipë teety'ajtëpën. Jëtu'un xytyuntëty, tä yë'ë të ntuk'ënä'ämtënës xytyuntëty.

⁹ Yë'ë ja'amyätstë wi'ix yë Wintsën tëytyuunyën yë Maria jam tu'ujotm, ko mtso'ontë jap Egiptë.

¹⁰ Pën tëë yë mjëëky mëku'uk tii xytyuk'ënu'kxtë, këtii mtëkëtëty tyëkoty ets atsip tii winë xypyëjkëja'antëty, mëët ko ënety mkamëkëpätëtë tsojk.

¹¹ Yë'ë kë'ëm y'ixëp pën tii yakäämpy ets jä'ä ja nu'kx tukëpätëty, e miitsëty jap tëja'p m'ëwxitëty.

¹² Pën m'ijxtëp ja ja'ay ko janty ëyoop ets ënety tii mo'ojëtë mëti'ipë ja nu'kxy tyukëpejtypyën, këtii tu'ktsu'um xyajninaxtëty ets xymyëët'atëty ja mëti'ipë ënety të tyäkyën.

¹³ Pën yë'ë të tyäky yë nyipä'än, xëmë xymyënëjkxëyëty ux ux ma jyëën tyëjkën ets tjëkyäpëty tii nätyuknipä'änëtëpën, ko mya'aja'an pyo'kxa'anëty. Jëtu'un nëjkx janty mëj tkukajpxë ets tja'awëkyëtä'äky ma miitsëtyën ets Wintsën oy nëjkx t'ixy ko jëtu'un xytyuntëty.

¹⁴ Këtii ni'ikyë winë xypyëjkëtëty ja ëyoopëja'ay, ko mmëtunëtëty, këtii xyajpo'oxëty ja myëju'uny. Tyaapë yajnikäjpxyën, mtunëp oy jyamëty ma ja mëkunaax mëkukajpnën ëkë ma jaaypyaat jaaypyo'kxyën.

¹⁵ Jä'ä xëëw ma mëtunëtën xymyëjuytyëty ma ja xëëw tyun'akëtaknën, mijts mnija'ap ko ja ëyoopëja'ay yajmëyäjtyp ja wit meeny. Paaty ënätyë xymyëjuyëty ets tmëët'atëty tii nyijuuky'atëpën. Jä'ä ko pën ka'ap ënätyë xymyëjuy, yë'ë nëjkxëp ja Wintsën tuk'ëwaanë ets miits mpokytyëkëtëty.

¹⁶ Yë teety taakëty ka'ap tjëkyepy yë'ë tkëpätëty ja u'unk ëna'k ja nyëë pyoky, ni u'unk ëna'k tkajëkyepy tku'ookëty ja tyeety tyaak ja nyëë pyoky. Ja ja'ay mëti'ipë ënety pokytyuunpën, yë'ë kë'ëm kyëpätëp ja nyëë pyoky.

¹⁷ Këtii nëkoo o'ktëy xytyuntëty yë jaaypyo'kxy, ni yë'ë ëxaty xykyatuntëty yë ku'ooky u'unk ets ja ku'ookytyo'oxy, ko ënety mënu'kxy'ätyë. Këtii yë wyit tyujkxy xypyëjkëtëty mëti'ipë ja nu'kxy mtukutëkëtëpën.

¹⁸ Nijëna'a xykyaja'atyëkoytyëty ko jap Egiptë näjyëtu'un jap mëk m'ëyoowtë mmëtuuntë. E ko myëpaat'ajty Wintsën ojts jap mjuutëtë. E paatykyëjxm yam miits ntuk'ënä'ämtë ets ya'atë ënä'ämën xypyatuntëty.

¹⁹ Pën yë'ë yë tsajpmok myajmujktëp jam mkamjotm, ko mtso'onëtëty ets xyjyä'äytyëkoytyëty tu'k'atsumy, këtii xynyiwinpitëty. Ixmatstë jam, yë'ëts jyä'ä'atëp yë jaaypyaat jaaypyo'kxy mëti'ipë yajpatëpën ma miitsëtyën, ëkë ku'ooky'u'unk ku'ooky tyo'oxyëty. Jëtu'un'äämpy ja Wintsën ni'ik tkënu'kxëty ja mkam mtu'ujëty ets miits näjyëtu'un myajkënu'kxtëty.

²⁰ Ko ënety xytyuktë ja aceitunas ma ja nyikepyën, këtii janty jëtu'un xy'ijxta'a xytyuunta'atëty ma ja nyixe'entyën. Myajwë'ëmtëp jam kepykyëjxm wäänë, yë'ëts jyä'ä'atëp ja jaaypyaat jaaypyo'kxy mëti'ipë yajpatëpën ma miitsëtyën ets ja ku'ooky'u'unk ku'ookytyo'oxy.

²¹ Ko xyajmuktëty ja mtsatym tyëëmëty ma ja mtsatym kyamëtyën këtii wa'ats xy'ixtaaytya'atëty ja nyikepy; mëti'ipë wë'ëmpën këtii xy'ëkniwinpijnëtëty, yë'ë jyä'ä'atëp ja jaaypyaat jaaypyo'kxy, ku'ooky'u'unk, ku'ookytyo'oxy.

²² Yë jëtu'un xëmë mja'amyätstëp, ko miitsëty ojts jap näjyëtu'un mëk m'ëyowtë mëtuntë Egiptë. E paaty jëtu'un yam ntuk'ënä'ämtë ets xykyuuytyuntëty.