Deuteronomio 23 - Biblia Dc en Mixe de Quetzaltepec

Ja ja'ayëty mëti'ipë ka'ap myëtyo'owëntëkëtën ma ja naax kajpnën

¹ Mëti'ipë ja'ay nakën yë y'ëxtsyaapajk, ëkë tuktsukë yë ye'etyëjkajtën, ka'ap tjëkyepy jam yajpaatëty ma ja Wintsën ja nyaax kyajpnën.

² Näyjyëtu'un tu'uk yë ja'ay mëti'ipë ka'ap yajnijawën pën tyeety'äjtypyën, ka'ap tjëkyepy yajpaatëty ma ja Wintsën ja nyaax kyajpnën, ni yë'ë ja y'u'unk y'ëna'k jam kyayajpaatëty.

³ Yë Amón ja'ayëty ets Moab ja'ayëty nijëna'a kyayajkupëktëty ma ja Wintsën ja nyaax kyajpnën, oy jyä'äjëty ja y'u'unk y'okëty mëti'ipë ënety të nyajtsmin të nyaskä'äxëtën majk'oknipëtë'ëkë.

⁴ Jä'ä ko jam mnajxtë ma nyaaxjotëtyën, ko jap mtso'ontë Egiptë, ni tu'ktsunyën wäänë ojts mkamo'ojëtë nëë ets nitu'ktukyën yë kääky ëkë tojkx. Ni'ikyë yë Balaam tmeenymyooytyë, yë Beor yë myaank, mëti'ipë jam tso'onën Petor, ma ja Mesopotamia naaxwiinyëtën ets jeexyë mpojkëtë.

⁵ E yë Wintsën ka'ap ojts tmëtoowkukë ja Balaam ja y'aaw y'ayuk, ni'ikyë tyaj'awinpijty näkyënu'kxë. Jä'ä ko yë Wintsën mëk yë mtsokëtë mjawëtë.

⁶ Paaty miitsëty këtii mëët oy'aaw oy ayuk xymyëët'attëty ets këtii mëët nijëna'a mnäy'oyjyawëtëty.

⁷ Yë'ë tëy yë Edom ja'ayëty, këtii jëkäm jëxkë'ëm xyajwë'ëmtëty jä'ä ko mëku'uk'ajtëp yë'ëjëty. Näyjyëtu'un yë Egiptë ja'ayëty këtii jëkäm jëxkë'ëm xyajwë'ëmtëty, jä'ä ko ojts jap tëëyëp mtsëënëtë.

⁸ Ja mëtëkëëk'okpë ënety nyajtsmin nyajtsja'tëtën naaxwiiny jyëkyäpëp tsyënaaytyaknpëktëty ma miitsëtyën, ma ja Wintsën ja nyaax kyajpnën.

Ma yajnimëtyä'äkyën ma ja'ay jyëtity y'ujts ye'eyën

⁹ Ko mëët mtsippaatëty yë mëtsiptëjkëty ets muum mtsënaaytyaknpëktëty, këtii tii xytyuntëty mëti'ipë ëxëëk këxë'kpën.

¹⁰ Pën yë ye'etyëjk të tyukjënäkyë yë myëjaaw ets tëë nyäyaj'ëxëëkëty koots. Ënätyë tsyoonëty ma ja ja'ajtakn jam xymyëët'atën ets tu'kxëëw muum jëkäm y'itëty. Tsuunëm jam jatëkok wyimpitëty.

¹¹ Jënäkyxyëëw nëjkx ja wyit tpujy. E ko ënety ja xëëw të kyëtaknë, täänëm jatëkok jya'tëty ma ja ja'ajtakn tmëët'atën.

¹² Ko pën jyëtita'anëty, ëpëky mëpaat ja it naaxwiinyëtë muum xy'ixtë ma mjëtitëtyën.

¹³ Xëmë ko mnëjkxtëty jëtijtpë, mmënëjkxtëp tu'uk yë kepy jëjpxu'unypë, mëti'ipë mtuknitajëtëp ko ënety mjëtita'antë. Ko ënety të mjëtijta'atë tääts xynyitajkojnëtëty ja ëxëëkpë.

¹⁴ Jä'ä ko yë Wintsën najxp tëjkëp ma miitsëtyën ets ma m'itën, yë'ë mkëwent'ajtëtëp ets yë'ë myajmëtakëtëp ma mëtsiptëjkëtyën, paaty wa'ats mëpaat yë it naaxwiinyëtë xyaj'itë, këtiipë twiink'ixëty, jä'ä ko tii oy tka'ixëty tsojk jam jyëwa'akëty.

Tii mëpaat yajtunyën mëët ja ja'ay mëti'ipë käktsokpën

¹⁵ Pën tu'uk yë mëtuunpë kyukekpy yë wyintsën ets myinëty ma miits yë mjëën mtëjkëtyën ets t'amëtowëty xyajkäktso'oktëty, këtii xykyë'ëyaktëty ma ja wyintsënën.

¹⁶ Ixmatstë wä'än tjuuky'äty ma miitsëtyën, yë'ë nyija'ap maa jyuuky'ata'any, ni pën mëpaat nëkoo kyayajjotkëxyë ets kyane'emyë.

Ma yaj'akajpxtukyën ets këtii ja ja'ay ja jyot nyini'kx tookëty

¹⁷ Nitu'uk yë ye'etyëjk ets nitu'uk yë to'oxytyëjk mëpaat tkatuunk'aty ets jyot nyini'kx tookëty, jam ma ja tukmuk tukxu'umtën ja ka'apë wyintsënëtyën.

¹⁸ Këtii xykyupëktëty ets jap ma ja Wintsën ja tsyajptëjkën pën tkëpätëty ja y'ayajk y'ako'onën ëkë ja wyaantakën mëët ja meeny mëti'ipë ënety jam pyätypyën ma ja jyot nyini'kx tookyën. Jä'ä ko tääpë tu'unën kajpxën y'ëxëëk'ijxyp yë Wintsën.

¹⁹ Yë jaaypyaat jaaypyo'kxy jyëkyäpëp xytyukmatstëty ets tyakëty ja meeny'u'unk. E yë'ë tëy yë mëkunaax mëkukajpn këtii mëktä'äky xytyukmajtsë'ëkëty ja meeny'u'unk, ëkë oy yë'ëjëty yë jë'kxy pëky, ëkë oytyiijëty mëti'ipë ënety të xytyuk'ënu'kxyën. Jëtu'un nëjkx ja Wintsën mkënu'kxëtë mëjwiin këjää, oy tii xytyimtuntëty.

²⁰ Yë jaaypyaat jaaypyo'kxy jyëkyejpy xy'amëtowtëty ja meeny'u'unk, pën tëë tii xytyuk'ënu'kxtë; yë'ë tëy mëkunaax mëkukajpnëty ka'ap mëpaat mëktä'äky xy'amëtowtë ja meeny'u'unk. Jëtu'un'äämpy yë Wintsën nëjkx mëj'äämpy mkënu'kxëtë.

²¹ Ko yë Wintsën tii xytyukwinwanëtëty, këtii nëkoo jeky xyajpo'oxtëty, ëkë m'ëna'antëty ets ka'ap xy'ëkyakanëtë mëti'ipë ënety të xywyaanta'aktën. Jä'ä ko yë Wintsën tsojk ka'ap t'oyjyawëty ets nëjkx mtukpoky'atëtë ko ënaty xykyatuntë mëti'ipë të xywyaanta'aktën.

²² Pën ka'ap tii yë Wintsën xytyukwinwanëtë, nitii poky miits mkapaatëtëty.

²³ E pën kë'ëmwinma'any miits yë Wintsën ënety tii të xytyukwinwanëtë, kopkpëky ko xyaj'ëtuktëty ja mwaantakënëty.

²⁴ Ko muum mtëkëtëty kamjotm ma mëku'uk yë tsatsymkyam tmëët'atyën, jyëkyejpy xyjyë'kxtëty yë tsatym jënu'un xytyimjë'kxa'anyën. Yë'ë ko ka'ap tjëkyepy wäänë xymyënëjkxtëty ma mtëjkëtyën.

²⁵ Näyjyëtu'un ko muum mtëkëtëty ma mëku'uk yë tsajpmokam tmëët'atyën, jyëkyejpy yë tsajpmok xywyixtëty, jëtu'unyë kë'ë'am tä ënety xytsyoktën. Yë'ë tëy ka'ap yaj'ëwa'atsy, ko xytyëjë'knëtëty ëkë ko xypyujxë'knëtëty.