Deuteronomio 22 - Biblia Dc en Mixe de Quetzaltepec

¹ Ko pën nitu'uk muum t'ixëty yë myëku'uk yë tsyajpkaa ëkë kyupixyny mëti'ipë tëkoy'ijtpën, ka'ap tkuyu'utstëty, ënätyë nikajpxëty ets tmënëjkxëty ma ja myëku'ukën.

² E pën kajts t'ixy'äty ja nyiwintsën, ëkë ka'ap tnijawë maa tsyëënë, jyëkyäpëp tmënëjkxëty ja jëyujk tsajpkaa ëkë kupixynytyo'oxy ma tyëjkën. Jamts tmëët'atëty koonëm ja nyiwintsën y'ixta'ajëtëty, ëkë tnikajpxëty, tääts nëjkx tkë'ëmo'oy.

³ Näyjyëtu'un ko xypyaatëty tu'uk yë krukts ëkë wit ëkë oytyiijëty. Pën tii ënety pën të tyajtëkoy ets pën tpaatëty, këtii xykyuyu'utstëty, ënätyë xynyikajpxtëty.

⁴ Pën miitsëty mpatëp tu'uk yë jëyujk tsajpkaa muum tu'ujotm ets xy'ixtëty ko tëë kyëtäy, këtii jëtu'unyë xynya'ixtëty, putëkëtë ënätyë ets yajpëtë'ëktë.

⁵ Yë to'oxytyëjk ka'ap tjëkyepy tyajtunëty yë ye'etyëjk wit, ni yë'ë yë ye'etyëjk tkayajtunëty yë to'oxytyëjk wit. Jä'ä ko yë Wintsën y'ëxëëk'ijxyp yë ja'ay mëti'ipë jëtu'un ëtëtspën.

⁶ Ko pën tpaatëty tu'u'am, ëkë kepykyijxy yë joonpä'än mëët yë joontaak mëti'ipë y'u'unk nyimääpyën, ëkë mëti'ipë tsyaa nyimääpyën, ka'ap tjëkyepy tmënëjkxëty ma tyëjkën, ja joon u'unk, ëkë ja joontsaa mëët ja nyitaak.

⁷ Yi'iyë mëpaat tmënëjkxy yë joon u'unk, yë tyaak nëjkxëp tnajtsmajtsëyë. Jëtu'un jeky ets jotkujk jyuuky'atëty.

⁸ Ko pën tu'uk yë tyëjk tkojëty, jam tëjknëkëjxm nëjkxëp yë pya'a tnapojts'ëwtijtë, këtiipë jam pën y'awa'knaxëty ets pën pyokytyëkëty ma ja ja'ayëtyën mëti'ipë ënety tääpë ja jëën tëjk tyuktsëna'ayëtëpën.

⁹ Ma ja tsatym kyamën këtii jam tii ujts wiinkpë xynyi'iptëty, këtiipë mya'atëty ja jë'kxy pëky, mëti'ipë ënety jam të xypyän të xykyojtën.

¹⁰ Ko xyajyu'utëty yë mtsajpkaa, këtii yë'ë xytyukmëtsumëtëty yë krukts.

¹¹ Yë wit mëti'ipë ënety myajtuuntëpën, këtii xytyukpu'ëkëyëtëty yë wiink wit, tä yë juunwitën mëët yë u'kxywyit.

¹² Ma ja mnijänëtyën nëjkxëp taxkpëky xykyëxuytyë ja nyitsuumë'ëk.

Ti mëpaat yajtunyën ko tu'uk ja to'oxytyëjk ka'ap nyäkyëwent'atëtëty

¹³ Ko tu'uk yë ye'etyëjk twowëty tu'uk yë to'oxytyëjk ets tpëkëty t'uukëty, pën tëë ëka'any tmëët'aty ets ënät ok tukjotma'atëty.

¹⁴ Je'eyë wiinkjaty ja aaw ayuk tuknipëtsëëmnëty, y'ënanëty: Ya'atë to'oxytyëjk tëëjës njapëky nja'uuky e okës yam nijawë ko tëëtëm wiinkpë ye'etyëjk t'ëkmëët'ajtpë.

¹⁵ Ënet nëjkx ja to'oxytyëjk ja tyeety tyaak wyoownëjkxyë jam ma ja mëjja'aytyëjkëtyën ets yaj'ix yajnijawëty pën ya'atë to'oxytyëjk janty tëë yë wiink ye'etyëjk mëët y'ity.

¹⁶ Tääpë ja to'oxytyëjk nëjkxëp ja tyeety y'ënä'äny jam ma ja mëjja'aytyëjkëtyën: Ëjts tëëjës ya'atë nnëëx nkë'ëyäky ets tmëëtsëënëty ya'atë ye'etyëjk, e yë ye'etyëjk ka'ap t'ëkmëët'atanë ya'atë to'oxytyëjk.

¹⁷ Ets jëtu'un y'ënä'äny koos yë nnëëx tëë wiinkpë ye'etyëjk tmëët'aty, e tsyaatsës ya'atë wit nmëminy, mëti'ipë yajtuknija'apën ko yë'ë ka'ap yë ye'etyëjk të t'ëkmëët'ajtpë ko të nyätyu'uk'aty. Ënet ja wit twijtswa'kxëty ets ja mëjja'aytyëjk tuk'ixëty.

¹⁸ Ënet nëjkx ja ye'etyëjk tmatstë ets tëytyuntëty, mëët ko ënety nëkoo tniwaanpety ja to'oxytyëjk.

¹⁹ Ets nëjkx ja kukëpäjtën tuknipëktë mëko'px ja meeny, aakyë'ë poop pujxn. Yë'ë yajmo'ojëp ja to'oxytyëjk ja tyeety, mëët ko ja to'oxytyëjk ënety nëkoo je'eyë të yajniwaanpety ma ja Israel kajpnën. Ja ye'etyëjk nëjkxëp ja to'oxytyëjk tmëëtsëënë ets ka'ap tjëkyepy nijëna'a t'ëxmatsëty.

²⁰ E pën janty tëy ko tëë ja to'oxytyëjk wiinkpë ja ye'etyëjk t'ëkmëët'ajtpë.

²¹ Yajpëtsëmtëp jap ma ja tyeety ja tyëjkën ets tkuka'atstëty. Mëët ko ënety jëtu'unpë ja nëë poky tmëtëkë ma ja Israel kajpnën ets ko nëkoo ja tyeety tyaak tyajnipäxëtëkë. Ko jëtu'un ja pyoky tkumëtowëty, jëtu'un ënety kyayaj'ijxtä'äky ja ëxëëktu'un ëxëëkajpxën ma miitsëtyën.

²² Pën tu'uk yë ye'etyëjk myëët'ajtyp yë to'oxytyëjk mëti'ipë pëkynyën ets nimäjtsk yajkupaatëtëty. Nimäjtsk nëjkx yajkuka'atstë, jëtu'un ka'ap yaj'ijxta'akëty ja ëxëëktu'un ëxëëkajpxën ma ja Israel kajpnën.

²³ Pën tu'uk yë to'oxy'ëna'k jam yë nyijämyëët'ajtpë ets muum yë wiink ye'etyëjk pyaatëtëty ets myëët'atëtëty,

²⁴ nimäjtsk nëjkx jam yajwoownëjkxtë ma ja kutuunktëjkën ets nëjkx nikajpxtë pën o'ktëp tyaapë ja'ayëty nimäjtskpë. Ja to'oxytyëjk nëjkxëp y'ooky mëët ko ka'ap ja putëjkën të t'amëtoy ets kajpntum të jyayajpaaty. Ets ja ye'etyëjk nëjkxëp y'ooky, mëët ko ja myëye'etyëjk ka'ap të tmëj'ixy, nimäjtsk kuka'atsy nëjkx y'ooktë. Jëtu'un ka'ap ja ëxëëktu'un ëxëëkajpxën xy'ijxta'aktëty ma ja Israel kajpnën.

²⁵ Pën tu'uk yë ye'etyëjk pyätyp muum tu'uk yë to'oxytyëjk kamjotm mëti'ipë ënety jamnë yë nyijämyëët'ajtpë ets atsip tmëët'atëty. Ko jyëtu'un'atëty yi'iyë nëjkx ja ye'etyëjk y'ooky mëti'ipë ënety ja to'oxytyëjk të t'atsip'atyën.

²⁶ Ja to'oxytyëjk ka'ap wi'ix yajtunëty, jä'ä ko yë'ë nitii tuuntëko'oyën të tkatuny mëti'ipë mëpaat tku'ookën. Ja to'oxytyëjk mëti'ipë të yaj'atsip'atyën jëtu'un tpaaty tä jeexyë tu'uk yë ja'ay të yaj'ookyën.

²⁷ Ya'atë to'oxytyëjk jä'ä ko atu'uk ënety jam yajpaaty kamjotm tu'ujotm, oyxyëp të jyayujkyaxpë, ni pën jeexyë të kyaniminyë ets jeexyë të pyutëkëty.

²⁸ Pën tu'uk yë ye'etyëjk pyätyp tu'uk yë to'oxytyëjk ëna'kpë, mëti'ipë atu'uk'ajtpën ets ka'ap yë ye'etyëjk tmëët'atynyëm ets t'atsip'atëty, oy ënety ka'ap nijëna'a ja pëjkën ukën të tkatukwinwanë ets nëjkx yajkupatënyë ëkë yajnijawëty,

²⁹ yë ye'etyëjk kopkpëky ko nëjkx tkuyäky tkukëpety mëti'ipë ënety të tunyën. Jä'ä nëjkx tmo'oy ja u'unkteety wëxtyikxy majk ja meeny, aakyë'ë poop pujxn meeny. Jä'ä ko tëë ënety tyaj'ëxëëktëkë ja to'oxytyëjk, kopkpëky ko nëjkx twoy ets tmëëtsëënëty ets ka'ap tjëkyäpëty t'ëxmatsëty nijëna'a.

³⁰ Ni pën tkajëkyäpëty tmëëttsëënëty ja to'oxytyëjk mëti'ipë ja tyeety tyo'oxytyëjk'ajtypyën. Jä'ä ko jëtu'un y'ëtë'ëtsëty, ja tyeety ënety ja myëyajtën wyintsë'kën yajtëkooyëp.