Deuteronomio 21 - Biblia Dc en Mixe de Quetzaltepec

Ko tu'uk yë ja'ay y'ookëty ets ka'ap yajnijawëty pën të yaj'ookyë

¹ Jam ma ja it naaxwiinyëtën mëti'ipë yë Wintsën mo'ojanëtëpën, ko tu'uk yë o'kpë yajpaatëty jam muum kamwinm tu'uwinm, mëti'ipë ja'ay të yaj'ookyën ets ka'ap yajnijawë pën të yaj'ookyë.

² Yë mëjja'aytyëjkëty ets kutuunktëjkëty nëjkxëp t'ixtë ja o'kpë ets tpaye'eytyëty tiikajpn winkon yajpatp.

³ Ënet tu'uk ja tsajpkaa ayääkë t'ëxta'atëty mëti'ipë ka'ap tyunyëmën, mëti'ipë ka'ap yë tsajpkaa tyuunpäjn yajtukuwëënyëmën,

⁴ ets tyajnëjkxtëty ma tu'uk yë nëëwokën, mëti'ipë nëëmëëtën ets ka'ap jam pën nyi'ipy kyojy, jam tyaj'ooktëty ja tsajpkaa, jëtu'unyë nëjkx tyo'ktëjtë.

⁵ Ënet ja Leví ja'ayëty mëti'ipë teety'ajtëpën wyinkontëty ma Wintsënën, mëti'ipë ja Wintsën të wyin'ixëtën ets jap yajpaatëty ma ja Wintsën yaj'ëwtatyën ets yajmëtunyën. Yë'ë ja kënu'kxën yajnaxtëp mëët ja Wintsën ja xyëëw ets tnikajpxtëty tii mëpaat yajtunyën, oy ënety pën jyajoot'anpëky, ëkë wi'ix jya'ëna'any.

⁶ Ënet ja mëjja'aytyëjkëty jam ja kyë'ë tkëxkontëty ma ja tsajpkaa ooky ja nyini'kxën, mëti'ipë jam kukajpnajtëpën wiinkonpë ma yajpaatyën ja o'kpë.

⁷ Ets nëjkx nikajpxtë: Ka'ap y'ëëts'atë ya'atë ja'ay të nyaj'ooktë ets ka'apës të n'ixtë pën të yaj'ookyë.

⁸ E paaty yam myajpëjktsoy Wintsën, pokymyä'kx yë naax kajpn, yë Israel kajpn, mëti'ipë të xyjyuutyën jam ëyo'ontum. Ets këtii yë'ë xypyoky'ixëty mëët ko ya'atë ja'ay të y'ooky, mëti'ipë ka'ap tii poky të tunyën. Jëtu'un'äämpy nëjkx ja Wintsën ja nëë poky tme'kxy mëët ma ya'atë ja'ay të y'ookyën.

⁹ Jëtu'un ënety miitsëty oy winë xytyuntë ma ja Wintsënën ets xyajjëwa'aktë ja nëë poky mëti'ipë të jyam'atyën ko ya'atë ja'ay të y'ooky.

Tii mëpaat yajtunyën ko tu'uk yë to'oxytyëjk tsipjotm yajmatsëty

¹⁰ Ko ënety mtsiptuntë ma mëtsipëtyën ets Wintsën myajmëta'akëtëty ets nëjkx may xytsyumtë xymyatstë ja mëtsiptëjkëty.

¹¹ Ets jam pën ma miitsëtyën t'oy'ixëty tu'uk yë to'oxytyëjk, mëti'ipë ënety të yajtsumyën ets yajxon tsojkën'atëty, mëët ko y'oyëty tsyujëty ets twowëty ko tëë jyot wyinma'any tpëjktä'äky ko tmëëtsëënëja'any.

¹² Nëjkxëp twoownëjkxy ma tyëjkën ets t'ënëëmëty wä'än yë kyuwaay tnëkä'pta'ay ets kyë'ëxooky näjyëtu'un.

¹³ Nëjkxëp tjeny ja wyit mëti'ipë ënety myëët'ajtypyën ko të yajmatsy ets jam wyë'ëmëty ma ja ye'etyëjk ja tyëjkën. Tu'kpo'o nëjkx tnijë'ëy tniyä'äxy ja tyeety tyaak. Ko ënety jëtu'un tu'kpo'o të nyäxy, ënät ja Israel ja'ay nëjkx tmëët'atynyëm ets tmëëtsëënëty ja to'oxytyëjk.

¹⁴ E pën ok ka'ap t'ëk'oy'ijxnë ja to'oxytyëjk, jyëkyäpëp t'ëxmatsëty ets wyë'ëmëty ja to'oxytyëjk ëwaatsëtum oy maa nyëjkxa'anëty. Je'eyëp ko ka'ap tjëkyepy tookëty, ëkë pën tmo'ojëty, tääts je'eyë muum jyaak mëtunëty. Jä'ä ko tëë ënety tyaj'ëxëëktëkë.

Mëti'ipë ja kä'äxkopk patëpën

¹⁵ Pën tu'uk yë ye'etyëjk myëëttsënääpy mäjtsk yë to'oxytyëjk, tu'uk ja mëti'ipë mëk tsyojkpyën ets tu'uk y'ixtijpy. E ya'atë nimäjtskpë to'oxytyëjk aaktam yë myaankëty mëti'ipë ja ye'etyëjk mëët t'u'unk'atyën; mëti'ipë ëka'any ja myaank ojts myinyën naaxwiinyëtë, jä'ä ja to'oxytyëjk mëti'ipë ka'ap nëkooyë yajtsokyën.

¹⁶ E ko ënety tyajwa'kxa'any ja näykyumayë, ka'ap tjëkyepy jä'ä tmëjpëjkta'akëty ja to'oxytyëjk ja myaank mëti'ipë tsyojkpyën jya'apën. Jä'ä ko nëjkxëp ja jyoot'anpëky ja to'oxytyëjk ja myaank mëti'ipë ka'ap tsokyën ets jä'ä kä'äxkopk.

¹⁷ Ya'atë kä'äxkopk nëjkxëp ni'ik yë kyuma'ayën yajmo'oy mëti'ipë patëpën. Jä'ä ko yë'ë ënety ëka'any yajwinkëxë'kpy ja jyot myëjaaw ja ye'etyëjk mëti'ipë patëpën ets ja kyuma'ayën kujkwä'kxy nyi'ikëty, jä'ä ko yë'ë kä'äxkopk'ajtp.

Wi'ix mëpaat yajtëytyunyën ja u'unk ëna'k käjpxy kumëtoownajxpë

¹⁸ Ko pën yë myaank kyamëtowëty ets kyäjpxykyumëtoownaxëty, oy wi'ix ja tyeety tyaak jya'ënë'ëmxëty ets oy jyatëytyunëtëty ets ni yë'ë tkamëjpëjkta'akëty.

¹⁹ Jëtu'umpë ja u'unk ëna'k jam mëpaat yë tyeety tyaak myënëjkxyë ma ja mëjja'aytyëjkën mëti'ipë ënety kutuunk'ajtëpën ma ja naax kajpnën,

²⁰ ets tukmëmëtya'akëty, t'ënëëmëty: Ya'atë nmaankës ka'ap myëtoy, je'eyë kyäjpxykyutëjy; ka'apës xymyëmëtowtë oy tii jyayajtuk'ëne'emy, tëë yë jyot wyinma'any tyajtëkooynyë ets je'eyë xëmë y'uknë myukënë.

²¹ Ënet nëjkx ja kunaax kukajpn tkuka'atstë ya'atë jëtu'unpë ja yä'äy'ëna'k. Jëtu'un'äämpy ka'ap yaj'ijxta'akëty ja ëxëëkajtën ma ja naax kajpnën, e ko ja Israel ja'ayëty nijawëtëty, myëët'atëp ja tsë'ëkë.

Ma myinyën kanaakpëky ja ënä'ämën

²² Pën tëë yajni'ënä'ämë ets tu'uk yë ye'etyëjk y'ookëty kutëy kepykyijxy, mëët ko ja mëjpoky të tuuntëkoy.

²³ Yë jyot nyini'kx ka'ap mëpaat wyi'imy tu'ktsuupaat këxtëy ma ënety të y'ookyën, ënätyë xyajnaaxtëkëtëty ko ënety të tsyu'ujënyë jä'ä xëëw. Jä'ä ko yë Wintsën mëti'ipë mTiosajtëpën pyojkpy yë ja'ay mëti'ipë kutëy o'kpën kepykyijxy, miitsëty ka'ap mëpaat nëkoo ja it naaxwiinyëtë xyaj'ëxëëkëtë mëti'ipë ja mWintsën mo'ojanëtëpën ets xyjyä'ä'atëty.