Deuteronomio 19 - Biblia Dc en Mixe de Quetzaltepec

Kajpn ma ja'ay kyäktso'oktën

¹ Ko ënety ja Wintsën të tyajkutëkooytyä'äy ja naax kajpn, mëti'ipë jam yajpatëpën ma ja it naaxwiinyëtë mëti'ipë miits mjä'ä'atantëpën ets jam ja mnaax mkajpnëty ets ja mjëën mtëjkëty ënety të xypyëjktaknëtë.

² Nëjkxëp tëkëëk ja naax kajpn xyajwë'ëmtë ëpëky, ma ja it naaxwiinyëtën mëti'ipë ënety ja Wintsën mooyëtëpën.

³ Ets ja në'ë tu'u mëti'ipë jam ja'tëpën, yajxon nëjkx xyaj'oyëtë. Tëkëëkpëky xyajwa'kxtë ja it naaxwiinyëtë mëti'ipë ja Wintsën mooyëtëpën, jam kyäktso'oktëty oypyënëty, ko pën ja myëku'uk tyaj'ook tyajtëkoyëty ets ka'ap tsyokyëty tuny.

⁴ Pën ënety ja myëku'uk të tyaj'ooky, jyëkyäpëp jam kyäktso'okëty, pën ka'ap ënety tsyokyëty tuny ets ka'ap ma ja myëku'uk të tmëjëën'aty të tmëtsip'aty.

⁵ Tä npëjktakmëtyën tu'uk yë ijxpät ko nimäjtsk yë ja'ay nyëjkxtëty ja'axypyujxpë ets nitu'uk pën yë jyätyë kyuka'atu'utëty ets jam jya'tëty ma ja myëku'uk ja kyëpajkën ets y'ookëty. Ja mëti'ipë ja myëku'uk të tyaj'ookyën, jyëkyäpëp jam kyäktso'okëty ma ja kajpnën mëti'ipë ënety yë'ëkyëjxmën të nyikojë.

⁶ Jä'ä ko pën ka'ap ma ja naax kajpn yajpaaty, ma mëpaat ja ja'ay kyäktso'okyën ets yeny oy ja tu'u. Mëti'ipë ja myëku'uk ënety të y'ookyën tsojk poj'am tpatsoonëty mëti'ipë ënety të yaja'ay'ookyën ets näjyëtu'un tyaj'o'okwinpitëty. Tyam ja tu'ukpë ka'ap ënety ja myëku'uk tsokyëty tuny ets ka'ap maa nyämyëtsip'atëtë.

⁷ E paatykyëjxm yam ntuk'ënä'ämtë ets ëpëky xypyëjkta'aktëty tëkëëk yë kajpn.

⁸ Ko ja Wintsën tyajmëj tyajkëjääjëty ja mnaax mkamëty, jëtu'un tä tukwinwa'anëyën ja m'ap m'okëty,

⁹ näjyëtu'un nëjkx tëkëëk ja tsoktakn kajpn xyajni'ikëtë, ëpëky ja tëkëëkpë mëti'ipë jamën. Ënet jyëtu'un'atëty pën mpatuuntëp ja ënä'ämën tëyajtën mëti'ipë yam nmooytyëpën, ko xytsyoktëty xyjyawëtëty yë Wintsën mëti'ipë mTiosajtëpën ets ja nyë'ë tyu'u xëmë xypyanëjkxëtëty.

¹⁰ Jëtu'un ka'ap pën ja ne'pyny tam tjä'ätsëty nanëkokyëjxm ma ja naax kajpnën mëti'ipë ja Wintsën mo'ojanëtëpën ets ka'ap pën pyokytsyëëmë'ëkëty ets ja käjpxy y'ëna'anëty yaja'ay'o'kpë.

¹¹ E pën ja ja'ay jëtu'unyëm ja myëku'uk tmëtsip'ajtpë, ko muum të twinkuye'eyë, tääts ënätyë të tyaj'ooky ets ënätyë jam kyäktso'okëty ma ja tsoktakn kajpnën.

¹² Ja mëjja'aytyëjkëty yë'ë nëjkx tni'ënä'ämëtë ets tääpë ja'ay yajtsum yajmatsëty. Tääts tkë'ëyaktëty ma ja ja'ay ja myëku'uktëjkën mëti'ipë ënety të y'ookyën ets nëjkx näjyëtu'un y'ooky.

¹³ Jëtu'umpë ja'ay këtii xypya'ëyowtëty, ko jëtu'un xytyuntëty yë'ë ënety m'ëtujktëp ets ka'ap ja jot ne'pyny nëkoo pën tam tjä'ätsëty ma ja Israel kajpnën; ko jëtu'un xytyuntëty, oy nëjkx winë mwinpëtsë'ëm njëjppëtsë'ëmxëtë.

¹⁴ Ja tsëpa'an mëti'ipë ja m'ap m'ok pyëjktaktën ma ja mmëëjëën mëtëjkën, ëkë ma ja mmëkam mmëtu'ujën, nëjkxëp xywyinkutsë'ëkë ets këtii nëkoo xymyëmayëty. Jä'ä ko oy tsuj yë Wintsën tsoky mjuuky'atëty jam ma ja it naaxwiinyëtën mëti'ipë mo'ojanëtëpën.

Wi'ix mëpaat yajtunyën ja ja'ay mëti'ipë winë tëkatsy nyikäjpxypën

¹⁵ Ko je'eyë ja ja'ay tu'uk y'itëty mëti'ipë ja nëë poky nyikajpxëpën, ijxtëm ko ënety muum ja ja'ay ja myëku'uk të tyaj'ooky, ma të tyuuntëkoy të kyajpxtëkoyën, ëkë ma tii poky të tunyën. Ënet mëpaat yajmëpëky ja nëë poky, pën nimäjtsk nitëkëëk y'ity ja mëti'ipë poky nyikajpxtëpën.

¹⁶ Ko tu'uk yë ja'ay mëti'ipë ëxëëk yë jyot wyinma'any jya'apën tniwaanpätëty ajotkumonë yë myëku'uk ets oy tii poky tuknitijëty.

¹⁷ Nimäjtsk yajwoownëjkxtëty ma ja Wintsën yajmëkäjpxyën, näjyëtu'un ma ja teetytyëjkëtyën ets ma ja kutuunktëjkëtyën, mëti'ipë jam tuuntëpën jä'ä xëëw jä'ä jëmëjt.

¹⁸ Ja kutuunktëjkëty yajxon nëjkx tnipaye'eytyë ya'atë jotmay, pën janty tëy; e ko ënety kyatëyëty, jëtu'un ijxtëm ja ja'ay ja myëku'uk tnikäjpxyën,

¹⁹ ja ja'ay mëti'ipë ënety ja myëku'uk nëkoo nyiwaanpejtypyën, jëtu'un nëjkx yajtëytyuny, tä ënety yë'ë të jya'ëna'anyën ets jeexyë ja myëku'uk yajtëytyuny. Ko nëjkx jëtu'un xytyuntë yë'ë ënety mka'ijxtaktëp ja ëxëëktu'un ëxëëkajpxën ma miitsëtyën.

²⁰ Ko nëjkx ja ja'ay tnijawëtë ja jëtu'unpë nëjkxëp y'ëna'antë: Kajtëm y'oyëty ko jëtu'un nja'ay'ajtmëty ets nëjkxëp ja tsë'ëkë tmëët'atë, këtiipë jëtu'un y'ëtë'ëtstëty.

²¹ Këtii pa'ëyo'owën xymyëët'atëty: nitsiptun ja juukyajtën, wiin, tëts, kë'ë, teky.