Deuteronomio 18 - Biblia Dc en Mixe de Quetzaltepec

Mëti'ipë patëtëpën yë teetytyëjkëty ets Leví ja'ayëty

¹ Yë Leví ja'ayëty mëti'ipë teety'ajtëpën, yë'ë yaj'antijtëp tëkokyë yë Leví ja'ayëty, ka'ap nëjkx yë nyaax kyam tmëët'atë, tä yë wiinkëtypë Israel ja'ayëtyën. Yë'ë nëjkx nyätyuk'ixëtë mëti'ipë ënety ja ja'ay myëmiintëpën ets ja Wintsën jä'ä tukwintsë'ëkëtë.

² Yë Leví ja'ayëty ka'ap nëjkx yë kyuma'ayën nyikääkëtë tä yë jyiiky myëku'ukëtyën. Jä'ä ko yë'ëjëty mëj kuma'ayën tu'uk myëët'ajtëp, mëët ko tmëtuntë yë Wintsën, jëtu'un ijxtëm yë'ë kë'ëm të tnikäjpxyën.

³ Ma ja'ay ja wintsë'kën tyaktën, tä yë tsajpkaajën ëkë kupixyny mëti'ipë ja teetytyëjkëty paat'ajtëpën yë tyaapë. Yë'ë nëjkx tjä'ä'atë ja jëxk, ja y'apajk ets ja myox.

⁴ Näyjyëtu'un ja aaytyëëm ujtstëëm, ja aaypyajk ujtspajk, tä yë tsajpmokën, tsatsymnyëëjën ets on mëti'ipë ëka'any yajpëjkë'kpën; näjyëtu'un ja u'kxywyit mëti'ipë ëka'any ja ja'ay nyëëke'pyën ma ja kyupixynyën.

⁵ Jä'ä ko yë Wintsën yë'ë kë'ëm të wyin'ixëtë ma jyiiky myëku'ukëtyën ets tmëtuntëty oy tsuj, näjyëtu'un ja y'u'unk y'okëty ets xëmëkyëjxmën y'itëty.

⁶ Ko tu'uk yë Leví ja'ay nyëjkxa'anëty ma ja it naaxwiinyëtën mëti'ipë ënety ja Wintsën të twin'ixyën, oymyaakajpnëty tsyoonëty,

⁷ jyëkyejpy oy maa tyeety'atëty mëët yë Wintsën xyëëwkyëjxm, jëtu'un tä myëku'uktëjkëtyën mëti'ipë ënety jam tuuntëpën, tmëtuntë ja Wintsën.

⁸ Näyjyëtu'un nëjkx tjä'ä'aty ja jë'kxy pëky, tä ja myëku'uktëjkëtyën, ëpëky mëti'ipë ënety ja tyeety tukumaayëpën.

Ma yaj'akajpxtukyën ets këtii oy tii t'ëwtatëty

⁹ Ko ënety jam të mja'ajnëtë ma ja it naaxwiinyëtën mëti'ipë ja Wintsën mo'ojanëtëpën, këtii ja ëxëëkpë tu'unën kajpxën xytyuuntëpëty, tä ja ja'ayëtyën ma tampë ja naax kajpnëtyën.

¹⁰ Ma miitsëtyën ni pën yë y'u'unk tkakë'ëyakëty ets nyitoyëty ëkë wyintsë'kën'atëty. Ka'ap mëpaat pën tuunk'aty yë xëëwmääpyë tuunk, najtsja'awëk, ëkë kajpxpojkën.

¹¹ Ets ni yë'ë mëpaat tkatuunk'atë yë patooy panajxpë tuunk, ëkë ma ja'ay yë o'kpë tyajmëtyä'äkyën, ma poj ënääw tmëkäjpxyën, ëkë ma ja'ay winë je'eyë tnajtsjawën.

¹² Jä'ä ko yë Wintsën ëxëëk yë jëtu'unpë t'ixy. E pën yë Wintsën y'ëxwojptääpy yë ja'ay ma ja nyaax kyajpnën, yë'ëkyëjxm t'ëxwojpta'aja'any ko ja ëxëëktu'un ëxëëkajpxën tyajtu'uye'eytyë.

¹³ Miitsëty mëtëy mëpaat mjuuky'atë Dios wintum.

¹⁴ Tääpë ja'ayëty mëti'ipë jam tsënaaytyëpën ma ja it naaxwiinyëtën mëti'ipë miits mjä'ä'atantëpën, ko tii tnijawëja'antë, yë'ë ënätyë nyinëjkxtëp yë najtsja'apë ëkë xëëwmääpyë, e yë Wintsën ka'ap t'ëwa'atsy ets miitsëty näjyëtu'un m'ëtë'ëtstëty.

Ja käjpxynyajxpë mëti'ipë minaanpën

¹⁵ Yë mWintsën Tiosëty yë'ë yaj'itäämpy ma miitsëtyën tu'uk yë käjpxynyajxpë tä ëjtsën ets yë'ë mmëmëtowtëp.

¹⁶ Ya'atë ojts yë Wintsën xy'amëtowtë ma ja Horeb kopkën. Jä'ä xëëw ma ënety jam ni'ëmukë myajpaatën ets m'ënantë: Ëëtsëty ka'apës ntsoktë etsës yë Wintsën xymyëkajpxtëty mëët yë mëj jëën, mëti'ipës n'ijxtëp nkoowtëpën, këtiipës n'ooktëty.

¹⁷ Ënätës yë Wintsën xy'ënëmaay: Oyës njawë tä yë'ë të y'ëna'antën.

¹⁸ Ëjts nyaj'itäämpy tu'uk yë käjpxynyajxpë tä mijtsën ma yë'ëjëtyën, mëti'ipë myëkunaax'ajt myëkukajpn'ajtëpën ets nëjkx tyukmëtowëtë mëti'ipës ënety ëjts të ntuk'ëne'emyën tnikajpxëty ets tkajpxnajxta'ajëty ijxtëmës të ntuk'ëne'emyën.

¹⁹ Ja ja'ay mëti'ipë ka'ap tmëpëkyën ets ka'ap tmëmëtoyën tääpë käjpxynyajxpë, mëti'ipë ënety të tnikäjpxyën ëjts yë n'aaw n'ayukës, nëjkxëpës ja n'amëtoy tiikyëjxm ko jëtu'un y'ëti'itsy.

²⁰ E ja käjpxynyajxpë mëti'ipë kë'ëmwinma'any kajpxp mëtyakpën mëët nxëëwkyëjxmës ets tnikajpx tnimëtya'akëty mëti'ipës ka'ap të ntuk'ëne'emyën ets wiink tios tnikajpx tnimëtya'akëty, tääpë ja'ay nëjkxëp y'ooky tyëkoy.

²¹ E pën miitsëty mmaaytyëp mtajtëp: ¿Wi'ix nija'awëmëty mëti'ipë të yajkäjpxyën pën ka'ap yë'ëjëty Wintsën ja y'aaw y'ayuk? Ya'atë mtuknijawëtëp.

²² Pën tëë ja käjpxynyajxpë tjanikäjpxy mëti'ipë ja Wintsën tyunäämpyën, ëkë mëti'ipë të tuknipëjktaakën ets ka'ap y'ëk'atëëwnë. Yë'ë mtuknijawëtëp ko ka'ap ënety Wyintsënëty të tnikäjpxy, ja käjpxynyajxpë paatykyëjxm jëtu'un të y'ënä'äny jä'ä ko mëj këjxm nyäyajnaxa'anyë, paaty miitsëty këtiimës mtsë'ëkëtëty.