Deuteronomio 17 - Biblia Dc en Mixe de Quetzaltepec

¹ Këtii yë Wintsën xytyukwintsë'ëkëty yë tsajpkaayä'äy ëkë kupixyny'u'unk, mëti'ipë ka'ap y'oyëty myëkëtyën, ëkë pën ka'ap kyä'pxyëty, jä'ä ko ka'ap t'oyjyawë jëtu'unpë.

² Pën yajnija'ap muum kajpntum tu'uk yë ye'etyëjk ëkë to'oxytyëjk yë'ë tyuunpy mëti'ipë yë Wintsën ka'ap t'oyjyawën ets jëtu'un ka'ap t'ëkwinkutsë'kënë ja käjpxytyu'unën,

³ ets t'ëwtajtnëty ja wiink wintsën, ëkë twinkoxtënaaynyëty oytyiijëty, tä yë xëëw, po'ojën, ëkë mëtsa'ajën, aakyë'ë mëti'ipë yë Wintsën ka'ap nt'oyjyawën ets ka'apë të tni'ënä'ämën.

⁴ Ko ja jëtu'unpë xymyëtoy'atëty, yajxon mëpaat xynyipaye'eytyë. E pën janty tëy ko tëë ja jëtu'unpë yajtuny yajkäjpxy ma ja Israel ja'ay ja nyaax kyajpnën mëti'ipë ka'ap yë Wintsën t'oyjyawën.

⁵ Jam nëjkx ja ja'ay xywyoownëjkxtë ma kutuunkën, mëti'ipë jam yajpatpën ma ja kajpnën ma ja ja'ay tsyëënën, mëti'ipë ënety ja jëtu'unpë të tuuntëkoyën ets nëjkx yajkuka'atsy.

⁶ Ko yë kutuunk tni'ënä'ämëty ets tu'uk yë ja'ay y'ookëty. Ënet y'ookëty pën jam'ajtp nimäjtsk nitëkëëk yë ja'ay mëti'ipë ja myëku'uk të t'ixyën tyuuntëkoy. E pën tu'uk je'eyë ja ja'ay mëti'ipë ja myëku'uk nyikäjpxypën, ka'ap tjëkyepy yë kutuunk pën tëytyunëty ëkë tni'ënä'ämëty ets y'ookëty.

⁷ Mëti'ipë ënety ja myëku'uk të tnikajpxtën, yë'ë ëka'any xajjë'ëkëp ets oknëm ja mayjyä'äyëty. Jëtu'un'äämpy ka'ap jyam'atëty ja ëxëëktu'un ëxëëkajpxën ma miitsëtyën.

⁸ Pën tsip oy ja nëë poky mëti'ipë yajnipaye'eyaanpën, ijxtëm ko pën ja myëku'uk tyaj'ooky, ëkë mëët të tsyiptuny, ko ënety pën të nyäyajtsëtyutyë, ëkë pën wi'ix të nyätyunyë jam kajpntum; jam mnëjkxtëty poj'am ma ja Wintsën ja y'it nyaaxwiinyëtën mëti'ipë të twin'ixyën,

⁹ ets xytyuk'ëwaanëtëty ja teety, ja Leví ja'ay, ëkë ja kutuunk mëti'ipë ënety jam tuunpën. Yë'ë nyikajpxtëp wi'ix mëpaat ja ja'ay yajtuny mëti'ipë të tyuuntëkoyën,

¹⁰ ets jëtu'un nëjkx xytyuntë tä ënety të tnikajpxtën.

¹¹ Jëtu'un xytyuntëty, tä ënety yë'ë mtuk'ënä'ämëtën, wi'ix ja ja'ay tkukëpätëtyën ja nyëë pyoky ets wi'ix yajtëytyunëtyën, nitii nëjkx xykyayajtëkatstë.

¹² Mëti'ipë ja ja'ay ka'ap kyäjpxymyëtoyën, wiinkjaty winë tuny ets ka'ap tmëjpëjktä'äky ja teety ja y'aaw y'ayuk, mëti'ipë jam myëtuumpyën ja Wintsën ets ka'ap tmëjpëjktä'äky ja yajkutujkpë ja y'aaw y'ayuk, jëtu'unpë ja'ay nëjkxëp y'ooky. Jëtu'un ka'ap yaj'ijxta'akëty ma ja Israel ja nyaax kyajpnën ja mëti'ipë ja ëxëëkpë tyuunpy kyäjpxypën.

¹³ Jëtu'un'äämpy ja naax kajpn tmëët'atëty ja tsë'ëkë ko jëtu'un tnijawë'atëty këtiipë wiinkjaty winë y'ëkyajtuunëty.

Ma yajnikäjpxyën pën mëpaat yajkutujkpë'atyën

¹⁴ Ko ënety jam të mja'ajnëtë ma ja naax kajpnën mëti'ipë ja Wintsën mo'ojanëtëpën, tëëpë xynyitsiptuntë ets jam mtsënaaynyëtë ets jëna'a m'ëna'antëty: Yë yajkutujkpë ëëts tu'uk ntsojktëp, mëti'ipë xy'ënä'ämtëpësën, jëtu'un ijxtëm muum yë yajkutujkpëtëjk yajpaatën.

¹⁵ Yë'ë myajm'ënä'ämtëp tu'uk yë ja'ay mëti'ipë kunaax kukajpnën ets mëti'ipë ënety ja Wintsën wyin'ijxypyën. Ka'ap mëpaat y'ëne'emy yë ja'ay ma miitsëtyën, mëti'ipë wiink naax wiink kajpn tso'onpën ets ka'ap xymyëkunaax'at xymyëkukajpn'atë.

¹⁶ Ja ja'ay mëti'ipë ënety ënä'ämpën, ka'ap mëpaat nëkooyë kyëwaay tmëët'aty ets ni tkakäxëty yë ja'ay jap Egiptë ets tyajmayëja'anëty ja kyëwaay. Jä'ä ko yë Wintsën tëë m'ënë'ëmxëtë ko ma tääpë në'ë tu'ujën nijëna'a jää mka'ëkwinpijnëtëty.

¹⁷ Ka'ap mëpaat nëkooyë yë to'oxytyëjk tmëët'aty, këtiipë nyäyajkujo'opëtëty ets pu'ts pujxn poop pujxn ka'ap nëkooyë tmëët'atëty.

¹⁸ Ja yajkutujkpë mëti'ipë tuunktsëëmë'kpën, nëjkxëp tu'uk ja noky tyajnijaaytyu'utyë ma ja ënä'ämën tëyajtën myinyën, mëti'ipë ja teety ëkë ja Leví ja'ayëty kyë'ë'am'ajtëpën.

¹⁹ Tääpë noky xëmë tkajpxëty winjëpom mapaat jyuuky'ätyën ets tjatëty wi'ix yë Wintsën twintsë'ëkëtyën. Wyintsë'ëkëp ja ënä'ämën tëyajtën mëti'ipë jap miinpën ma nokyën ets pyatunëp jëtu'un.

²⁰ Këtiipë mëj këjxm nyäpyëjkta'akëtëty ma ja myëku'uktëjkën ets këtiipë tja'atyëkoyëty ya'atë ënä'ämën tëyajtën. Jëtu'un'äämpy jekpyaat y'ënä'ämëty ets näjyëtu'un ja y'u'unk y'ok tyuka'ajëtëty ja jëtu'unpë ja tuunk.