Deuteronomio 16 - Biblia Dc en Mixe de Quetzaltepec

Ja xëëw mëti'ipë winjëmëjt yajtuunpën

¹ Ko yë Abib po'o tpaatëty jää xynyixëëwtuntëty yë ëmaayxyëëw, ma ja Dios xymyëjjaw xyjyäänty jyawëtëtyën, jä'ä ko miits wa'ats xynyijawëtë ko jä'ä tsu'um ojts yë Dios jap Egiptë mjuutëtë.

² Ma ja ëmaayxyëëwën yë'ë nëjkx yë Dios xytyukwintsë'ëkëtë yë kupixyny ets tsajpkaato'oxy, jam nëjkx xymyënëjkxtë ma ja it naaxwiinyëtën mëti'ipë ënety yë'ë të twin'ixyën ets jam ja xyëëw yaja'amyätsëty.

³ Ja jëyujk mëti'ipë ënety të wyintsë'kën'atyën yë'ë mtukpakaytyëp ja nyitsu'utsy yë tsajpkääky ka'apë tsyooymyëëtëtyën, wëxtujk xëëw y'itëty yë'ë mkaytyëp yë tsajpkääky ka'apë tsyooymyëëtëtyën, tääpë jëtu'unpë tsajpkääky jä'ä yajja'akyukë ëyo'owën jotëko'oyën mëët ko jap Egiptë poj'am mtso'ontë ets ka'ap ojts wintëy m'ëkkaay m'ëk'uknëtë jä'ä ko mjotëkooytyëp ënety. E jëtu'un'äämpy wi'ix jap Egiptë mtso'ontën mapaat mjuuky'atën.

⁴ Wëxtujk xëëw y'itëty nimaa tsooy kyayajpaatëty mëti'ipë jëtsy tyuktijëtijtëpën ma mjëën mtëjkën ets ma mnaax mkajpnën. E ja jëyujk mëti'ipë ënety të wyintsë'kën'atyën ma më''ëka'any ja wëxtujk xëëwpë tsyo'ontä'äkyën, këtii ja nyitsu'uty xyajwë'ëmëty ets komjëpom xytsyu'utsa'anëty.

⁵ Ja wintsë'kën mëti'ipë myajktëpën ma ëmaayxyëëwën, ka'ap tjëkyepy oymyaajëty xyaktëty

⁶ Jämyë xyaktëty ma ja it naaxwiinyëtën, mëti'ipë ënety yë'ë kë'ëm të twin'ixyën ets ja xyëëw jam yajmëjjawëty; yë wintsë'kën jënäkyxyëëw mëpaat yë Wintsën mëti'ipë mTiosajtëpën xymyo'otë, ma ja xëëw tyimtun'akëtaknën, jä'ä ko jä'ä xëëw jap mtso'ontë Egiptë.

⁷ Ja tsu'utsy mëti'ipë të wyintsë'kën'atyën, jëyëjp xyajkë'ëwtëty ets xytsyu'utstëty, ma ja it naaxwiinyëtën mëti'ipë ënety ja Wintsën mëti'ipë mTiosajtëpën kë'ëm të twin'ixyën, tääts komjëpom mnëjkxnëtëty ma mtëjkëtyën.

⁸ Tëtujkxëëw xykyäytyëty ja tsajpkääky ka'apë tsyooymyëëtëtyën, e ko wyëxtujkxëëwpätëty jää tu'uk ja xëëw xyaj'apaatëtëty ma ni'ëmukë myajpaatëtyën ets ja Wintsën mëti'ipë mTiosajtëpën xymyëjjawëtëty, ma tääpë xëëwën nitituunk xykyatuntëty.

⁹ Ko ënety wëxtyikxy ja taxtujk xëëw të nyäxy, jä'ä xëëw ma ënety ëka'any ja pëjktä'äky yajtuunk'atyën, ma ja tsajpmok myukyën.

¹⁰ Jää xyajtso'onta'aktëty ja xëëw ma yajnixëëwtunyën wëxtujk sëmaanpë ja pëjktä'äky ets ja Wintsën jää yajmëjjawëty; ma ja xëëw ënety tyunyë jyätyën nëjkxëp xyaktë yë m'ayajk m'ako'onënëty ets oytyiijëty tii ënety yë Wintsën mtukmëjjawëjantëpën.

¹¹ Jëtu'un nëjkx ja Wintsën tu'uk ja myëjxëëw xyaj'apaatëtë jam ma ja it naaxwiinyëtë kë'ëm të twin'ixyën ets ja xyëëw jam yaja'amyätsëty; ko tyaapë xëëw xyaj'apaatëtëty, tam'ajtp ënety ja m'u'unk m'ëna'këty, mëtuunpë, Leví ja'ayëty, jaaypyaat jaaypyo'kxy, ku'ooky'u'unkëty ets ku'ookytyo'oxëty.

¹² Yë'ë xëmë mkaja'atyëkoytyëp ko ojts jap Egiptë mëtuntë m'ëyowtë. E paatykyëjxm tuntë ijxtëm ya'atë ënä'ämën tyam myajmo'otën.

¹³ Ma ënety të xyajpëtë'kta'atën ja mtsajpmokëty ets të xywyinma'tsta'atën ja m'tsatsym tëëmëty, ënät nëjkx jä'ä xyajtso'onta'aktë ja xëëw ma yajnixëëwtunyën ja tëjk, mëti'ipë nixo'omyën ets jä'ä ja xëëw jyäkëty wëxtujk xëëw.

¹⁴ Ma tyaapë xëëw tyunyë jyätyën miits xoonta'aktëmës jää mëët yë m'u'unk m'ëna'këty, mëtuunpë mkupëjkpëty ets näjyëtu'un yë Leví ja'ayëty; jaaypyaat jaaypyo'kxyëty, ku'ooky'u'unkëty ets ku'ooktyo'oxy mëti'ipë tsënaay juuky'ajtëpën ma mnaax mkajpnëtyën.

¹⁵ Ma ya'atë xëëwën mëti'ipë tuunëpën jajtëpën, yë Wintsën yë'ë nëjkx xymyëjjaw xyjyääntyjyawëtë ets wëxtujk xëëw y'itëty. Jam nëjkx xynyixëëwtuntë ma ja it naaxwiinyëtën mëti'ipë ënety yë'ë kë'ëm të twin'ixyën. Jëtu'un ja Wintsën mëj'äämpy tkënu'kxëty ja mpëjktä'äkyëty ets ja mëti'ipë mnitu'unëtyëpën ets miits myajpaatëty janty tsuj janty xoontä'äky.

¹⁶ Tu'kë'ëyë ye'etyëjktëjk tëkëëk'ok jam nyäwya'këxë'ëkëtëty Wintsën wyintum tu'kjëmëjtpë. Jam ma ja it naaxwiinyëtën mëti'ipë ënety yë'ë kë'ëm të twin'ixyën. Jää nëjkx jam nyäwya'këxë'ëkyë ma ënety ja tsajpkääky ka'apë tsyooymyëëtëtyën yajnixëëwtunyën, ma yajnixëëwtunyën ja pëjktä'äky wëxtujk sëmaan ets ma yajnixëëwtunyën ja tëjk nixo'omy. Ni pën tkajëkyepy tninëjkxëty ja Wintsën jëtu'unyë ets ka'ap tii tmënëjkxëty ets tukwintsë'ëkëty.

¹⁷ Pën ënety jam nëjkxp kopkpëky ko tmënëjkxëty ja y'ayajk y'ako'onën, jëtu'un tä ënety ja Wyintsën të kyënu'kxyën ets të nyi''ijxkëtä'äkyën.

Ja nyiwinma'any wi'ix mëpaat oytyiijëty yajnipaye'ey

¹⁸ Nikajpxpätë yë ja'ayëty mëti'ipë kutuunk'atëpën ma ja naax kajpnën mëti'ipë yë Wintsën mo'ojanëtëpën ets yë'ë myëku'uk tnikopk'atëty ets tnipaye'eytyëty yajxon ja jyiiky myëku'uk ja nyëë pyokyëty ets ja y'amay jyotmayëty.

¹⁹ Këtii yë tëyajtën xyajma'atëty, këtii yë ja'ay tu'uk xy'oyjyawëtëty ets tu'uk xy'ëxëëk'ixtëty, ko tëyajtën winë xynyipaye'eya'antëty, këtii ja'ay mnätyukwin'ëënëtëty ko yë wit meeny mjamo'oja'anëtëty ets jëtu'unyë ja pyoky xyajninaxtëty. Jä'ä ko jëtu'unpë yajwinma'anytyëkoopy yë wijyjyä'äytyëjk ets ka'ap tii oy t'ëkkajpxnëtë mëti'ipë oy ja jyot wyinma'anyëtyën.

²⁰ Tëyajtën mëpaat winë xytyuntë ets jëtu'un mjuuky'atëty jotkujk ets xypyaatëty ja naax kam mëti'ipë yë Wintsën mo'ojanëtëpën.

²¹ Këtii nitii kepy xykyojtëpëty ets m'ënantëpëty yë'ë xy'ëwtata'antë jam winkon ma Wintsën yë wyintsë'këntyaknën.

²² Këtii nitiipotsy xyajpëtë'ëktëty ets jam yë wiink wintsën xy'ëwtatantëpëty. Jä'ä ko yë Wintsën y'ëxëëk'ijxyp yë jëtu'unpë.