Deuteronomio 14 - Biblia Dc en Mixe de Quetzaltepec

¹ Tëë xynyijawëtë, ko miitsëty mWintsën m'u'unk'ajtëtëp. Paaty këtii nëkoo mjot mnini'kx oy wi'ix xytyuntëty, këtii nëkoo xyajtsëtyut xyajwintëkoytyëty. Ni yë'ë mwaay mkopk ëxaty xykyatuntëty ko pën y'ookëty tyëkoyëty.

² Jä'ä ko yë mWintsën Tiosëty yë'ë të y'ënä'äny, ko miits mjä'ä'ata'anëtë. Paaty kë'ëm të mtimwin'ixëtë ma wiinkëtypë ja naax kajpnën ets yë'ë mjä'ä'ata'anëtë.

Mëti'ipë jëyujk mëpaat yajtsu'utsyën ets mëti'ipë ka'apën.

³ Këtii tii xyjyë'kxtëty mëti'ipë ëxëëkën.

⁴ Tyaa këxja'ay myiny ets xynyijawëtëty mëti'ipë jëyujk mëpaat xytsyu'utstën. Jyëkyäpëp xytsyu'utstëty yë tsajpkaa, tsajppax, kupixyny,

⁵ ets ja jëtyu'u u'unk, pax, tsajppax mëti'ipë aayjoty ujtsjoty yajpatëpën ets oymyëti'ipë jëyujkëty mëti'ipë wajmëëtën.

⁶ Jyëkyejpy xytsyu'utstëty tëkokyë yë jëyujk mëti'ipë apu'uyëpën, mëti'ipë yë tyekyxyooky amäjtsk ëkë axeenyën.

⁷ E ja jëyujk mëti'ipë mëpaat ka'ap xytsyu'utstën, oy jya''apu'uyëtë, ëkë oy ja tyekyxyookyëty jyaxeenyëty. Yë'ë jëyujk jëku'ux, mëj tsuk ets tsik ka'ap mëpaat xytsyu'utstë oy jya''apu'uyëtë ets oy yë tyekyxyooky jya''axeeny'atë.

⁸ E ëtsëm näjyëtu'un jyamëët'ajtyp axeeny yë tyekyxyooky, je'eyëp ko ka'ap y'apu'uyë, këtii xytsyu'utstëty. Tääpë jëyujk ëxëëkjëyujk mëpaat xyajnaxtë ets këtii yë nyi'kx kyopk xytsyoonëtëty ko ënety muum të y'ooky.

⁹ Yë nëë jëyujk jyëkyejpy xytsyu'utstëty. Yë'ë mëti'ipë jam yë kyäknën ets nyimeenyën.

¹⁰ E pën kajts tii yë kyäkn ets ka'ap näjyëtu'un tmëëtëty yë nyimeeny këtii xytsyu'utstëty, ëxëëk tääpë nëë jëyujk xytyijtëty.

¹¹ Yë joon jëyujk, oymyëti'ipëty, pën oytsyu'tsnë jyëkyejpy xytsyu'utstëty.

¹² E tii tëy ka'ap mëpaat xytsyu'utstë yë witsn, me'ky, pajkjëpip, wojny,

¹³ patutk

¹⁴ lut, wëëky,

¹⁵ yutyk, ju'k, wääk'oo, nëë'apatë,

¹⁶ pix, jëpityë, kexyky,

¹⁷ tsu'kxy, këwayerë, pooplaan,

¹⁸ wojny, ënääwkëtsey ets tëëxy.

¹⁹ Tëkokyë yë tsukts aak ëxëëk yë nyäxy, ka'ap mëpaat xytsyu'utstë.

²⁰ Yë joonëty mëti'ipë të yajnikajpxtën ko tsyu'utsëty, jyëkyejpy xytsyu'utstëty.

²¹ Yë jëyujk najts'ookë këtii xytsyu'utstë. Wa'ats mnäyaj'itëtëty, jä'ä ko miitsëty yë'ë yë Wintsën mkajpn'ajtëtëp. Pën yajpatp yë jaaypyaat jaaypyo'kxy ma miitsëtyën, yë'ë jyëkyäjptëp tsu'utstëty, nän jyëkyejpy xytyukmëtooktëty ja jaaypyaat jaaypyo'kxy mëti'ipë tu'u'am'ajtëpën. Yë tsajppax u'unk tsu'utsy këtii xyajkëëwjëtitëty mëët yë tyaak yë tyi'tsk nëë.

Wi'ix mëpaat tu'kpëky yajëpëkyën ma ja majk pëkpyën

²² Ko winjëmëjt yë mpëjktä'äky xyajpëtë'ëktëty, nëjkxëp wäänë xypyupëktë mëti'ipë ja Wintsën mo'otëpën.

²³ Mëti'ipë ënety mpupëjktëpën oy yë'ëjëty yë tsajpmok, tsatym nyëë, ëkë on; ëkë wä'än yë'ëjëty ja më''ëka'anypë myinyën naaxwiiny, ejxtëm ja mjëyujk mtsajpkaajëtyën, mtsajppaxëty, ëkë mkupixynyëty, jam nëjkx xytsyu'utstë xyjyë'kxtë jam wyintum ma ja mWintsënëtyën, ma ja it naaxwiinyëtën mëti'ipë ënety yë'ë kë'ëm të twin'ixyën ets jam yaj'ëwtat yajmëjjawëty. Jëtu'un'äämpy xytyukjatëty wi'ix mëpaat ja Wintsën xëmë xywyinkutsë'ëkëtën.

²⁴ Pën yë Dios mkënu'kxëtëp ënety mëët yë mpëjktä'äkyëty ets xyjyayaka'antëty ma tu'kpëky yajëpëkyën ja majk pëkpyë, e jëkäm ja it naaxwiinyëtë yajpaaty mëti'ipë të twin'ixyën ma yajmëjjawëtyën.

²⁵ Jyëkyejpy xytyooktëty mëti'ipë ënety myakantëpën ets ja nyimeeny mëti'ipë ënety ja ja'ay tyukujuupyën yë'ë mmënëjkxtëp jam ma ja it naaxwiinyëtën mëti'ipë ënety ja Wintsën të twin'ixyën.

²⁶ Yë'ë mtukjuyëp tii ënety m'a'ijxëpën. Jyëkyejpy xyjyuyëty yë tsajpkaa, tsajppax, kupixyny, tsatym nyëë, ëkë oytyiinëëjëty mëti'ipë tëë xyunyën; mijts kë'ëm m'ixëp tii ënety mjuyäämpy, yë'ëts mtsu'utstëp mjë'kxtëp jam Wintsën wyintum mëët ja m'u'unk m'ëna'k, m'u'unk mto'oxytyëjk ets jëtu'un'äämpyts xyaj'apaatëtëty tu'uk ja xëëw.

²⁷ Yë Leví ja'ayëty mëti'ipë yajpatëpën ma mnaax mkajpnëtyën, këtii ijxtëkoy ja'atyëkoy xyaj'itëty. Miitsëty wa'ats xynyijawëtë, ko yë'ëjëty ka'ap yë nyaax kyamëty tmëët'atë tä miitsëtyën.

²⁸ Wintëkëëk jëmëjt ëpëky xypyëjkta'akëty ma ja tu'kpëkpyë yajëpëkyën ma ja majk pëkpyën; mëti'ipë ënety mjëpëjkpyën winjëmëjt ma ja mpëjktä'äky y'ity wyintëyën ets xynyipëjkpätëty ma tu'uk ja it naaxwiinyëtën kajpntum.

²⁹ Yë'ë mo'otëp yë Leví ja'ayëty, ko ënety mnimin mnija'tëtë. Miits tëë xynyijawëtë, ko yë'ëjëty ka'ap tii nyaax kyamëty jëtu'un tä miitsëtyën; yë'ë nëjkx xymyo'otë yë jaaypyaat jaaypyo'kxyëty, ku'ooky'u'unkëty ets ku'ooky tyo'oxyëty ets jëtu'un näjyëtu'un yajpaatëty ku'uxyë jotkëtä'äky. Yë Wintsën nëjkxëp mkënu'kxëtë ets mjuuky'atëty mëjwiin këjää ko ënety jëtu'un xytyuntë.