Deuteronomio 12 - Biblia Dc en Mixe de Quetzaltepec

Ja tu'kpajkpë ja tsajptëjk

¹ Ya'atës jëtu'un ënä'ämën'ajtp tëy'ajtën'ajtp, mëti'ipë mtuntëpën ko ënety jam mjuuky'ajnëtë ma ja it naaxwiinyëtën mëti'ipë ja Wintsën mo'ojanëtëpën, mëti'ipë y'ëwtajtën yë mteety m'apëty.

² Yajkutëkooytya'atë tëkokyë yë it naaxwiinyëtë, ma ja'ayëty t'ëwtatën yë wyintsënëty, mëti'ipë tsënaaytyëpën jam ma it naaxwiinyëtën, mëti'ipë mjä'ä'atantëpën. Tukpu'ujëtya'atë yë y'awinaxëty, mëti'ipë myëët'ajtëpën jam tunkëjxm kopkëjxm, tu'u'am ëkë jampë muum kepypya'tkë'ëm yajpaatyën.

³ Mjijtë'ktaayëtëp yë pyotsyëty ma ja wintsë'kën tyaktën, piw nuuk tuunta'atë yë tsaa ets nino'oktë yë kepy tsyetsy ets yajkutëkooytya'atë tëkokyë mëti'ipë y'ëwtajtëpën. Nitii xykyayajwë'ëmtëty mëti'ipë y'ëwtajtëpën ets jëtu'un ka'ap nijëna'a y'ëkyajja'amyäjtsnëtëty.

⁴ Jä'ä ko yë Wintsën mëti'ipë Tios'ajtpën, ka'ap jyëtu'unëty yaj'ëwtaty.

⁵ Ma miits yë mja'ayëtyën, yë Wintsën nëjkxëp twin'ixy tu'uk yë it naaxwiinyëtë ma nëjkx yaj'ëwtatyën, e miitsëty jam nëjkx mnëjkxtë.

⁶ Jam nëjkx yë Wintsën xytyukwintsë'ëkëtë yë jëyujk. Nëjkxëp yë Wintsën jam xymyo'otë yë tu'kpëkpyë yajjëpëkyën ma ja mmajkpëkpyën ets tii ënety miitsëty mo'ojantëpën. Yë'ë nëjkx xykyë'ëmo'otë ja mjëyujk mtsajpkaajëty, mëti'ipë më''ëka'any të myinyën naaxwiiny.

⁷ Jam mkaytyëty m'uuktëty ma ja mWintsën Tiosën ets mëët ja m'u'unk m'ëna'këty ets ja mjëëky mëku'ukëty, nëjkxëp xytyukxon xytyuk'itë ja mjë'kxy mpëkyëty mëti'ipë ënety të y'ity të wyintëyën ets ja mWintsën të tkënu'kxyën.

⁸ Jam ka'ap nëjkx tii xy'ëktuunëtë tä yaa tyam winë xytyuntën, ma aak kë'ëmwinma'any tii yajtunyën.

⁹ E tëyajtën ko miitsëty ka'ap jam mja'tënëm ma ja it naaxwiinyëtën ma nëjkx akujk jotkujk mjuuky'atën, ma ja Wintsën mo'oja'anëtën.

¹⁰ E ko ënety të xytyuknajxnëtë ja Jordán mëjnëë ets jam myajpatnëtëty ma ja it naaxwiinyëtë mëti'ipë ja Wintsën mo'ojanëtëpën ets ka'ap maa y'ëkyajpatnëtë ja mëtsipëty, nitii tsë'ëkë maa kya'ëk'ijtnëty.

¹¹ Ja it naaxwiinyëtën mëti'ipë ënety ja Wintsën të twin'ixyën ets jam yajpaata'any, nëjkxëp ja wyintsë'kën xymyo'otë mëti'ipës yam të nikäjpxyën. Nëjkxëp xytyukwintsë'ëkëtë ja jëyujk mëti'ipë myaj'ooktëpën ets xynyino'oktëty. Nëjkxëp näjyëtu'un xymyo'otë yë ayajk ako'onën ets tu'kpëkpyë yajëpëkyën ma ja majk pëkpyën ets ayajk ako'onën mëti'ipë të xytyukwinwanëtën ets xymyo'oja'antë.

¹² Nëjkxëp tu'uk yë mëj xëëw xyaj'apaatëtë ma ja Wintsën xymyëjjawëtëtyën, mëët ja m'u'unk m'ëna'këty, ja mtuunpëty ets Leví ja'ayëty. Miits wa'ats xynyijawëtë, ko yë'ëjëty ka'ap yë nyaax tmëët'atë.

¹³ Miitsëty yë'ë mnijawëtëp, ko këtii oy namaa yë jëyujk'ooky xynyino'oktëty mëti'ipë yë Wintsën ntukwintsë'ëkëtyëpën.

¹⁴ Ko tii yë Wintsën xytyukwintsë'ëkëja'antëty, jam xymyo'otëty ma ënety yë'ë kë'ëm të twin'ixyën. Jam nëjkx xytyuntë tëkokyë ya'atë mëti'ipë yam të ntuk'ëwaanëtën.

¹⁵ E pën miits mtsu'utsan mjë'kxantëp yë mjëyujk mtsajpkaajëty, jyëkyejpy xyaj'ooktëty oyjyëna'ajëty jam ma mnaax mkajpnëtyën. Jyëkyejpy jëtu'unyë xytsyu'utstëty oy ënety ja Dios jëyëjp të xykyamo'otë.

¹⁶ Yë tëy yë nye'pny këtii xyjyë'kxëtëty, mnitajtëp naaxkëjxy.

¹⁷ Ka'ap xykyäyëty ma mnaax mkajpnën ja tu'kpëkpyë yajjëpëkyën ma ja majk pëkpyën, mëti'ipë yë Wintsën mo'ojantëpën, ijxtëm yë tsajpmokën, tsatym nyëë, on, jëyujk tsajpkaa y'u'unk mëtu'ukpë, mëti'ipë ayajk ako'onën'ajtpën ma Wintsën të xytyukwinwanën.

¹⁸ Ko tyaapë xyjyë'kxa'antëty ma mWintsën Tiosëtyën ets xyajtuna'antëty mëti'ipës yam nikäjpxypën, jam mëpaat xyjyë'kxtë ma ënety yë Wintsën të twin'ixyën ja it naaxwiinyëtë, mëët ja m'u'unk m'ëna'këty ets ja Leví ja'ayëty. Jëtu'un xytyukxon xytyuk'itëty, mëti'ipë ënety të xynyitunën.

¹⁹ Ma jam myajpaatën naaxjotm kajpnjotm nijëna'a xykyaja'atyëkoytyëty yë Leví ja'ayëty.

²⁰ Ko ënety ja Wintsën të tyajwintu'upëjkta'aynyë ja mnaax mkajpn jëtu'un tä të tnikäjpxyën, miits mjëkyäjptëp xytsyu'utstëty yë mtsajpkaajëty ëkë oy tyimtiijëty ets oy tyimjëna'ajëty.

²¹ Pën ja it naaxwiinyëtë jëkäm wyi'imy ma ënety ja Wintsën të twin'ixyën, miitsëty mjëkyäjptëp yë tsajpkaa ets tsajppaxy xyaj'ooktëty ets xytsyu'utstëty, mëti'ipë ja Wintsën mooyëtëpën, ma ënety jam myajpaatën.

²² E jëtu'un nëjkx xytsyu'utstë, tä yë ja'ay tsu'utsyën yë wëëky ëkë oymyëti'ipë joonëty. Jyëkyäpëp nëjkx kyäytyë tsyu'utstë yë ja'ayëty mëti'ipë wa'ats yajpatëpën ets mëti'ipë ka'ap wya'ats'atën.

²³ Yë'ë tëy yë nye'pyny këtii xyjyë'kxëtëty, jä'ä ko yë'ë juukyajtën'ajtp. Paatykyëjxm ka'ap mëpaat yë ne'pyny mëti'ipë juukyajtën'ajtpën xy'ajë'kxmuktë mëët yë nyitsu'utsy.

²⁴ Yë ne'pyny naaxkëjxy nëjkx xynyitajtë.

²⁵ Këtii yë ne'pyny xyjyë'kxtëty ets jotkujk mjuuky'atëty, näjyëtu'un yë m'u'unk m'ëna'këty mëët ko ënety ja Wintsën ja y'aaw y'ayuk xypyatuunëtë.

²⁶ E pën tëë xytyuknipëjktaakëtë ets m'ayajk m'ako'onën xyaka'antë, ëkë tëë tii yë Wintsën xytyukwinwanëtë, jam nëjkx xyaktë ma ënety ja it naaxwiinyëtë të twin'ixyën.

²⁷ E jam ma wintsë'këntyaknën, jam xymyo'otëty ja Wintsën tii ënety mo'ojantëpën. Pën yë'ë jëyujk'ooky, jam nëjkx xyajnitoytyë ma ja nyipotsyën ma ja wintsë'kën yajyäkyën. Yë jëyujk ne'pny nëjkxëp xytyuknixijkxtë ja Wintsën mëti'ipë miits mTiosajtëpën ja wyintsë'këntyakn, e yë nyitsu'uty jyëkyejpy xytsyu'utstëty.

²⁸ Mëtowtëp ets mpatuntëp jëtu'un, mëti'ipë yam ntuk'ënä'ämtëpën. Jëtu'un jotkujk xëmë mjuuky'atëty, näjyëtu'un yë m'u'unk m'ëna'këty, mëët ko ënety xytyuntë mëti'ipë oyën ets tëyajtën, mëti'ipë y'oy'ijxypyën mWintsën Tiosëty.

Ma yaj'akajpxtukyën ets këtiipë wiink wintsën yaj'ëwtatëty

^29-30 Ko ënety ja Wintsën tëë tyajkutëkooytyä'äy ja naax kajpn mëti'ipë miits mniwa'akantëpën ets jam mtsënaaynyëtë. Ijxkëm näjyëtu'un xytyuuntëpë winë tä yë'ëjëtyën ets ja wyintsënëty xy'ëwtajnëtëty.

³¹ E miitsëty këtii jëtu'un winë xytyuntëty ma mWintsën Tiosëtyën, tä yë'ëjëty y'ëtë'ëtstën. Jä'ä ko yë'ëjëty aakjëtu'un winë tuntë tä yë Wintsën t'ëxëëk'ixyën. Yë'ëjëty ëxëëk y'ëtë'ëtstë y'ëna'antë ko yë tyiosëty tmëjjawëtë; yajknëtëp ja y'u'unk y'ëna'këty ko ja wyintsënëty ja wyintsë'kën tmo'oja'antë.

³² Tiits miitsëty yë'ë xëmë mtuntëp mëti'ipë të ntuk'ënä'ämtën, këtii nitu'uk xyajni'ikëtëty ets nitu'uk xykyajëpëktëty.