Deuteronomio 11 - Biblia Dc en Mixe de Quetzaltepec

Wi'ix yë Tios myëjëtyën

¹ Tsoktë jawëtë yë mWintsënëty ets patuntë yë y'ënä'ämën tyiyajtën, yë y'aaw y'ayuk ets kyutujkën.

² Ja'aykyukëtë tii ja Wintsën mtukni''ixëjanëtëp, oy ja m'u'unk m'ëna'këty tyam ka'ap tja'akyukëtë ets ka'ap tnijawëtë. Mëmay mëtajtë wi'ix yë'ë myëjëtyën ets wi'ix winë tunyën.

³ Wi'ix mëj këjää jap winë tuunyën Egiptë, ko ja ëyo'on tyajkëtäky ma yajkutujkpën ets ma tu'kë'ëyë ja nyaax kyajpnën.

⁴ Näyjyëtu'un ma tyaj'o'ktaayën tëkokyë ja yajkutujkpë ja tsiptuunpëtëjkëty mëët tu'kë'ëyë ja kepy wintëkäämpë mëti'ipë myëtsiptuuntëpën ets ja kyëwaayëty ets ko tyajkiintaay jam ma Tsaptsmëjnëëmejyën, ma ënety miits myaj'ixjëtit myajpajëtitën. Yë Wintsën yë'ë ojts tyajkutëkooytyä'äy xëmëkyëjxm.

⁵ Mja'amyätstëp näjyëtu'un wi'ix mëët'ajtëtën jam të'ëts'itjotm ets wi'ix jampaat myajja'ajtëtën.

⁶ Wi'ix ojts tyajjaty tyajkëpetyën yë Datán ets Abiram, yë y'ëna'k yë Eliab, yë jyä'äy yë Rubén. Wi'ix ja naaxwiinyëtë y'ëwatsyën ets ojts jap kyënajxta'atë mëët tëkokyë ja y'u'unk y'ëna'këty, ja y'u'unk tyo'oxytyëjkëty, ja jyëën tyëjkëty ets tëkokyë jënu'un ënety winë tmëët'atën. Tyaapë ma jëtu'un jyä'äjty kyëpejtyën, wa'ats ojts yë Israel ja'ayëty t'ijxta'a tnija'awëtya'atë.

⁷ Miitsëty tëë kë'ëm xy'ixtë xynyijawëtë, jä'ä ko wa'ats xy'ijxtë tiijaty yë Wintsën të tunyën.

Ja näkyënu'kxë mëti'ipë jam itaanpën ma jempyë naaxwiinyëtën

⁸ Yë'ë mpatuntëp yë ënä'ämën tëyajtën mëti'ipë tyam të nmo'otën ets mëkta'aktëty, jëtu'unts akujk jotkujk xytyimniwa'aktëty ja it naaxwiinyëtë mëti'ipë nmo'ojantëpën.

⁹ Ets jëtu'un'äämpy nëjkx jam jeky mtsëënëtë mjuuky'atë, ma ja it naaxwiinyëtën mëti'ipë ojts ja Wintsën tukwinwanën ja m'ap m'okëty ets ja y'u'unk y'ëna'këty, jam jëtu'un ma ja jë'kxy pëky ka'ap y'ëmaaytyä'äkyën.

¹⁰ Ja it naaxwiinyëtë mëti'ipë miits mjä'ä'atantëpën, ka'ap jyëtu'unëty tä ja mëti'ipë jap Egiptë yajpatëpën, ma miits mtso'ontën; jap miits ijty kë'ëm ja mtëëmpt mniptëp ets jëkäm ja nëë xymyëtsoontë, mëti'ipë mtukyajxo'ktëpën ja mpëjktä'äkyëty, ma ja aay ujts jam yontën.

¹¹ E ja it naaxwiinyëtë mëti'ipë miits mniwa'akantëpën myëët'ajtyp ja kopkjot ets ja joyjyot; ja nëë tuu xëmë këtakp jam oyjyëna'ajëty.

¹² Ma tääpë it naaxwiinyëtën yë Wintsën yë'ë kë'ëm tyimkëwent'ajtyp ets xëmë jam yë kyënu'kxën tyajkëtä'äky oy tyimjëna'ajëty.

¹³ Pën miitsëty mkuuytyuuntëp ja y'ënä'ämën tyiyajtën mëti'ipë tyam të nmo'otën, pën mtsojktëp mja'awëtëp ja Wintsën mëti'ipë miits mTiosajtëpën ets pën m'ëwtajtëp winë aaw winëjot.

¹⁴ Yë'ë nëjkxëp t'a'ixë ets ja nëë tuu tyajminëty potmjoty ets xëkopkjoty, jëtu'un xyajpëtë'ëkëty mëj këjää ja tsajpmok, ja tsatym nyëë ets ja on ma ja mkam mtu'ujën.

¹⁵ Dios nëjkxëp jam kamwinm tu'uwinm tyajpëtsëmy yë aay ujts mëti'ipë jyë'kxtëp pyëktëpën yë mjëyujk mtsajpkaa ets miitsëty ka'ap nëjkx yë mjë'kx mpëky xyaj'ëmaaytya'aktë.

¹⁶ E miitsëty mëk mnäkyëwent'atëtëty, këtii myajwin'ëëntëty, këtiipë Wintsën nijëna'a xy'ëxmatstëty ets wiink wintsën xypyanëjkxtëkëtëty, xy'ëwtatëty, ëkë xywyinkoxtänëtëty.

¹⁷ Jä'ä ko jëtu'unpë ja winma'any xypyaatëty, yë Wintsën nëjkxëp mëk mtukjoot'anpëkëtë ets ka'ap nëjkx yë nëë tuu t'ëkkäjxnë ma ja kam tu'ujën, jëtu'un'äämpy nëjkx mjë'kx kyutëëtsëtë ets ka'ap xy'ëkmëët'ajnëtëty tii mkaytyëp m'uuktëp ets m'o'kta'a mtëkooytya'atëty ma ya'atë oynyaax oykyamën, mëti'ipë ja Wintsën mo'ojanëtëpën.

¹⁸ Ya'atë aaw ayuk yë'ë xëmë mjot'atëp, ets mmëmay mmëtajtëp; jëtu'un xytyimmëët'atëty tä jeexyë jam mkë'ëkëjxm ets mwinpokëjxm xymyëët'atën këxtsumy.

¹⁹ Yë m'u'unk m'ëna'këty nëjkxëp xytyuk'ëwaanëtë ets xytyukni''ixëtë ya'atë aaw ayuk, wä'än tjamëty ma mjëën mtëjkëtyën, ma në'ë tu'ujën, ëkë ma ënety ma'ajan mpo'kxanëtën; näjyëtu'un ko ënety ma'aypyëtë'ëktë.

²⁰ Nëjkxëp jam xykyëxja'atë ma mtëjkxenyëtyën ets ma mtëjk'akajëtyën.

²¹ Jëtu'unts miitsëty ets ja m'u'unk m'ëna'këty nëjkxëp jeky mjuuky'atë ma ja it naaxwiinyëtën mëti'ipë ja Wintsën tyukwinwa'anëyën tmo'oja'any ja m'ap m'okëty, jëtu'un tä ja tsajp ets ja naaxwiinyëtë jeky y'ijtëwtën.

²² Pën miitsëty mpatuuntëp ya'atë ënä'ämën tëyajtën, mëti'ipë tyam ntuk'ënä'ämtëpën ets xypyatuntëty ets pën mtsojktëp mja'awëtëp yë Wintsën mëti'ipë miits mTiosajtëpën ets yë'ë xypyanëjkxtëty tëkokyë yë nyë'ë tyu'u,

²³ yë Wintsën yë'ë nëjkx kë'ëm t'ëxkäjxta'ay ja ja'ayëty, mëti'ipë tyam jam tsënaaytyëpën, ma ja it naaxwiinyëtën mëti'ipë mniwa'akantëpën ets miitsëty jëtu'un'äämpy nëjkx akujk jotkujk xytyimniwa'aktë ja naax kajpn ma janty may ja ja'ay tsyëënëtën ets amëk jotmëkëty.

²⁴ Ma ënety miitsëty mnajtswa'akëtën, jam nëjkx mtsënaaytyaknpëktë, yë mtsëpa'anëty jam nëjkx y'ëwtity të'ëts'itjotm, nyaxëty jam Líbano ets tsyoonëty jam ma Éufrates mëjnëë jyënäkyën ets tyimja'tëty ma ja mejyën naax akujkpë.

²⁵ Ni pën nëjkx xykyayajmëta'aktë ko ënety mtsiptuntë. Jä'ä Ko yë Wintsën yë'ë yajkëta'akäämpy yë mëktsë'ëkë ma mmëtsiptëjkëtyën ma ënety muum mnaxtën, jëtu'un tä të twinwanën.

²⁶ Ya'atë xëëwës npëjktä'äky ma miitsëtyën yë kënu'kxën ets pojkën ets xywyin'ixtëty mëti'ipë mtsojktëp.

²⁷ Mpaatëp ja näkyënu'kxën pën mpatuuntëp mëti'ipë yë Wintsën të tni'ënä'ämën tyampë të ntuk'ëwaanëtën.

²⁸ E pën wiink tios mpanëjkxtëjkëtyëp ets ënety yë'ë xy'ëwtajnëtë ets xymyëtuunëtë, tä jeexyë yë'ë xy'ëwtatën ja mëtëypyë ja Wintsën, jää näpyokë nëjkx y'ity.

²⁹ Ko ënety yë Wintsën mëti'ipë miits mTiosajtëpën jam të myajja'tëtë ma tääpë it naaxwiinyëtën mëti'ipë mjä'ä'atantëpën, yë näkyënu'kxë jam nëjkx xykyëxkajpxtë ma Guerizim kopkën, e yë näpyokë jam nëjkx xykyëxkajpxtë ma Ebal kopkën.

³⁰ Ya'atë mäjtskpë kopk jam yajpaaty nëë'awinaxy ma Jordán nëëjën, jamtsow yajpaaty anajnytsyow ma Canaán ja'ayëty tsyëënëtën jam joyjyotm. Yë'ë mëët nyäwyinku'ixëty yë Guilgal yë y'itjot, winkon ma ja xojjotmën jampë yajpaatyën Moré.

³¹ Wäänë yjaak'ita'any ets xytyuknaxtëty yë Jordán mëjnëë ets xynyiwa'aktëty ja naaxwiinyëtë mëti'ipë yë Dios mo'ojanëtëpën. Ko ënety të xynyiwa'knëtë tääpë it naaxwiinyëtë ets ënety jam mtsënaaynyëtë.

³² Yë'ë mkuuytyuntëp xëmë ya'atë ënä'ämën tëyajtën ets ya'atë aaw ayuk mëti'ipë tyam të ntuk'ëwaanëtën ets të ntuknijawëtën.