Deuteronomio 10 - Biblia Dc en Mixe de Quetzaltepec

Ja käjpxytyu'unën ja jemypyë

¹ Ënätës yë Wintsën xy'ënëmaay: Oytyun kë'ëm mäjtsk yë tsaatsetsy, jëtu'un tä ja mëjëyëjpë y'ijtyën ets xy'oytyunëty tu'uk yë kaaxë, yë'ë kepy tsyetsy myajtunëp ets xymyëpätëty jam kopkëjxm maas ëjts nmëtya'aka'anyën mëët mijts.

² Ëjts nkëxja'ajäämpy ja aaw ayuk ma tääpë tsaatsetsyën, jëtu'un tä y'ijtyën ja mëjëyëjpë mëti'ipë ojts mijts xytyukpu'ujën ets jap xypyëjkë'ëkëty ma ja kaaxën.

³ Ënätës ojts n'oytyuny ja kaaxë mëti'ipë acacië kepyën ets ojts mäjtsk një'ëtwä'kxyës yë tsaa etsës nmëpejty jam kopkkëjxm.

⁴ Tä ojts ja Wintsën jam tkëxja'ay ja majkpë ja ënä'ämën tëyajtën ma ja tsaatsetsyën, mëti'ipë mëtoowtën ma ja kopkën, ko ojts kyäjpxy jëënjoty ma ënety jam ni'ëmukë nyajpatëmën. Tëës ja xymyo'oy.

⁵ Ënätës ojts jam ntso'onë kopkkëjxm mëët ja tsaatsetsy ma këxja'ay myinyën ja majkpë ja ënä'ämën. Japës npëjktäky kaaxëjoty, jëtu'un tääjës ënety ja Wintsën të xytyuk'ëne'emyën ets tyampaat tap ja y'ity.

⁶ Ënet yë Israel ja'ayëty jam tsyo'ontë ma ja it naaxwiinyëtë txëëwatyën Beerot-bene-jaacán ets ojts jam nyëjkxtë Moserá. Jam yë Aarón ojts y'o'knë ets jämyë nyaaxtëjkëy, yë Eleazar yë'ë ojts kyutëkëty ma ja teety'ajtkën.

⁷ Ko jam tsyo'ontë, jam ojts nyëjkxtë Gudgoda, jam tsyo'ontë Gudgoda ets jyajtë jam Jotbata, ma tyaapë it naaxwiinyëtën ka'ap ijty jam yë nëë y'ëmaaytyä'äky.

⁸ Ënet ojts yë Wintsën twin'ixy yë Leví y'u'unk y'ëna'k ets yë'ë tkë'ëtëty ja kaaxë mëti'ipë myë'ijtypyën ja käjpxytyu'unën ets tukwinkukëyëtëty ja Wintsën, ko tii wintsë'kën yajmo'oja'anëty, ijxtëm tyampaat tuntën.

⁹ E paatykyëjxm yë Leví ja'ayëty ka'ap yë nyaax kyamëty të tpëktë ets ka'ap yë kyuma'ayën të yajmo'otë ma ja jyiiky myëku'ukëtyën, jä'ä ko yë Wintsën yë'ë kyuma'ayën'ajtëp, jëtu'un ijxtëm yë Wintsën të tnikäjpxyën.

¹⁰ Jam kopkëjxm jä'äs ojts jam n'ity wëxtyikxy xyëëw wëxtyikxy tsyu'um, jëtu'un tääjës ojts jam n'ëk'ijtpën mëjëyëjp, koos yë Wintsën mëktä'äky nmëpëjktsooy, ojts tjanty'amëtoow'ity ja nu'kxtakënës. Paatykyëjxm ojts ka'ap myajkutëkoyëtë.

¹¹ Tyaajës ojts xy'ënëëmë: Nëjkx ets tuknipëjktaakë, tääts tääpë kajpn xywyoowtsoonëty wä'än tniwa'aktë ja it naaxwiinyëtë mëti'ipës ja y'ap y'okëty ojts ntukwinwanëtën.

Mëti'ipë Tios nyi'ënä'ämëpën

¹² E tyam miitsëty Israel ja'ayëty. ¿Tii ja Dios m'amëtoowëtëp? Dios yi'iyë y'amëtoopy ets xymyëjjawëtëty ets xypyanëjkxëtëty yë nyë'ë tyu'u, ko xytsyoktëty xyjyawëtëty ets xy'ëwtatëty winë aaw winëjot.

¹³ Ets xypyatuunëtëty yë y'ënä'ämën tyiyajtën ets kyutujkën jëtu'un'äämpy akujk jotkujk mjuuky'atëty.

¹⁴ Yë'ë yajxon nijawëtë, ko yë mWintsënëty yë'ë winë jyä'ä'ajtääpy, wä'än tyë'ëjëty yë pojjotypë, tsajpkëjxmëpë, naaxwiinypë ets tëkokyë jënu'un jää winë yajpaatyën.

¹⁵ E wi'ix n'ëk'ëna'anmëty, yë Wintsën ojts tsojkën'aty ets twin'ijxy miits yë m'ap m'okëty ets oy tsojky tja'awëy, ok ojts näjyëtu'un twin'ixy yë y'u'unk y'okëty, miits myaj'antijtëp, ko yë Wintsën yë'ë mnaax'ata'an mkajpn'ata'anëtë ma wiinkëtypë ja naax kajpnën, jëtu'un tä tyam yaj'ixy yajtunyën.

¹⁶ Pëjkta'aktë jap ma mjot mwinma'anyëtyën ja oy'aaw oy'ayuk, mëti'ipë mëët yë Wintsën të xyaj'apaatëtën ets këtii ni'ikyë m'ëk kujuun'o'knëtëty.

¹⁷ Jä'ä ko yë Wintsën mëti'ipë miits mTiosajtëpën, yë'ë Dios mëti'ipë ni'ik yë mëj'ajtën myëët'ajtypyën ma wiinkëtypë tiosën ets wiinkëtypë wintsënën. Yë'ë Dios mëjpë mëti'ipë maaytyääyëpën winë ets mëti'ipë kutsë'ëkën, mëti'ipë ka'ap win'ixy winkexy yë ja'ay tsoky tjawën ets mëti'ipë ka'ap yajuyën.

¹⁸ Mëti'ipë nyipaye'epyën ja ku'ooky'u'unk ku'ookytyo'oxy ets mëti'ipë myoopyën ja wyit tyujkxy ja jaaypyaat jaaypyo'kxy; mëti'ipë yajpatëpën ma miitsëtyën.

¹⁹ Paaty miits yam n'ënëëmëtë ets xytsyoktëty xyjyawëtëty yë jaaypyaat jaaypyo'kxy, jä'ä ko miitsëty ojts jap mjaaypyaat'at mjaaypyo'kxy'atë Egiptë.

²⁰ Winkutsë'ëkëtë yë mWintsën ets ëwtatë yi'iyë tu'ukyë. Mëtuntë oy yajxon ets pën tii ayuk mnikäjpxantëp mëët yë kuttujkën, yë'ë xyëëw myajtuunëtëp.

²¹ Jä'ä ko miits xoontä'äky myajpaatë, e mëët yë'ëkyëjxm jëtu'un mxoonta'aktë. Jä'ä ko yë'ë mTios'ajtëp ets tëë yë myëj'ajtën mëj këjää tyaj'ixyë mëët miitskyëjxmëty, miitsëty tëë kë'ëm xytyim'ix xytyimtuntë.

²² Ko ja m'ap m'okëty jap jyajtë Egiptë, je'eyë ënätyëty nitëkë'px majk. E yë Wintsën yë'ë të tuknipëjktaakë ets mnimayëtëty. Miitsëty nimay myajpatnëtë, jëtu'un tä yë may myatsa'a kyëxë'ëkyën tsajpjotm.