Deuteronomio 1 - Biblia Dc en Mixe de Quetzaltepec

Ma myëtyaktsoonyën

¹ Ya'atë ojts yë Moisés tkäjpxy tmëtyä'äky ma ja Israel kajpnën ma ënety jam yajpaatën të'ëts'itjotm, a'oytsyow ma ja Jordán mëjnëëjën, jam Arabá ma mëët nyäwyinku'ixëtyën yë Suf, itkujk wyi'imy ma ja it naaxwiinyëtë txëëwatën Parán, Tofel, Labán, Hazerot ets Dizahab.

² Mëj ja it naaxwiinyëtë tyajwintujktë, tyimtsoony jam Horeb ets tyimja'ty jam Cades-barnea, majktu'uk xëëw yajtukye'eynyajxta'ay ko tëyë ja tu'u yajpanëjkxy mëti'ipë ja'ajtpën jam ma Seir kopkën.

^3-4 Ma tyu'uk'anyën ja majktu'uk po'opë, kom wëxtyikxy jyëmëjt ma ënety ja Moisés të tyajkutëkoyën ja Sihón, mëti'ipë ënä'ämpën jam ma Amor ja'ayëtyën, jampë ënety tsyëënën Hesbón ets ma ënety näjyëtu'un të tyajkutëkoyën ja Ok, jampë y'ëne'emyën Basán ets jam tsyëënë Astarot ma ja Edrei ja nyaaxjotmën. Ënet ja Moisés tuk'ëwa'anëy ja naax kajpn, jëtu'un tä ënety ja Dios të y'ënë'ëmxëtën ets tmooy ja aaw ayuk mëti'ipë mëpaat tpatuntën.

⁵ Ko ënety jam yajpaatën a'oytsyow ma ja Jordán mëjnëëjën, ma ja Moab itjotmën. Ënet ja Moisés ojts ja naax kajpn t'ëëwtë'ëy tkajpxtë'ëy mëët ya'atë aaw ayuk:

⁶ Y'ënäny: Yë nWintsën'ajtëm Dios, jëtu'un ojts xya'ënëma'ayëmë jam Horeb: Tëë miits yaa jeky m'ijtkojtë ma ya'atë kopkën.

⁷ Pëjkmujkta'atë winë ets nëjkxtë jam ma kyopkjotëtyën yë Amor ja'ayëty ets xynyiwa'ktaayëtëty yë y'it nyaaxwiinyëtë jënu'un mëët nyämyëwinkon'atëtën: Tä yë Arabá itjotmën, ja tunjotm kopkjotmën, joyjyotmën, jampaat ma ja itjotm yajtijyën Négueb ets ma ja naax akujkmejyjyotypë ja pya'a nyuxën, ma ja Canaán ja'ay tsyëënëtën ets ma txëëwatyën Líbano, tyimja'tëty jam ma ja Éufrates mëjnëëjën.

⁸ Tääpë it naaxwiinyëtë mijts të nmo'otë, nëjkxtë jam ets jä'ä'atë tääpë naax kam, ëjts maas nWintsën'atyën, yë'ë ojts ntukwinwanëtës yë m'ap m'okëty tä yë Abraham, Isaac ets Jacob ets näjyëtu'un yë y'u'unk y'okëty.

Ma yajnikajpxpätën mëti'ipë yajkutuktëpën

⁹ Jä'ä xëëw jä'ä jëmëjt, ojts mijts n'ënëëmëtë, koos atu'uk ka'apës nmëta'akëty ets miits ntu'uwinwowtëty.

¹⁰ May'äämpy yë Wintsën, mëti'ipë miits mTiosajtëpën yë u'unk ëna'k të mmo'ojëtë. Paaty ënät tyam janty nimay mkëxë'ëktë, jëtu'un tä mëtsa'a tsajpwinm myäykyëxë'ëktën.

¹¹ Yë Wintsën mëti'ipë yë m'ap m'ok Tyios'ajtëpën, yë'ë y'a'ixëp ets miitsëty jaakni'ik mnimayëtëty ets mkënu'kxëtëty jëtu'un tä yë'ë të tnikäjpxyën.

¹² Ëjts ka'apës xëmë nmëta'akëty atu'uk ets ja m'amay mjotmayëty mpaye'eyëtyës.

¹³ E paaty yam miits n'ënëëmëtë ets xywyin'ixtëty tu'uk yë ja'ay winnaax winkajpn, ja'ayëty mëti'ipë ixpëkyëtyën, wijyëtyën ets nyija'awëtëp ja tuunk. Yë'ëts npëjkta'aktëp kutuunk ma miitsëtyën ets yë'ë mnikopk'atëtëty.

¹⁴ E miitsëty oy ojts xymyëtowtë ja aaw ayuk.

¹⁵ Paatyës ojts nikajpxpety ja ja'ayëty tu'ukjaty ma tu'kkajpnjatypë yajpaatën, mëti'ipë wijyëtyën ets nyijawëtëp ja tuunk ets ojts yë'ëjëty nkutujkënmo'oyës ma miitsëtyën. Tam mëti'ipës ntuknipëjkën twintänëty ja ja'ay nitu'kmilpë, nimëko'pxpë, niwëxytyikxymyajkpë, nimajkpë ets tam mëti'ipë tu'kkajpn ojts je'eyë pyäätyën.

¹⁶ Ënätës näjyëtu'un ntuk'ëwa'anëtyë, tii mëpaat tuntën ets n'ënëmaaytyës: Miits mëtoow'itëp, tii y'amay'ajt jyotmay'ajtëp. Nipaye'eytyë ma amay jotmay tpaatën, wä'än yë'ëjëty yë kunaax kukajpn ets wä'än yë'ëjëty jaaypyaat jaaypyo'kxy.

¹⁷ Ko tii poky xynyipaye'eyëty, këtii pën tu'uk xy'oyjyawëty ets tu'uk xy'ëxëëk'ixtëty. Tu'knax ja ja'ay xyjyawëtëty, wä'än yë'ëjëty mëti'ipë ëmaay amutsk yajpatpën ets wä'än yë'ëjëty jotkujkja'ayëty. Ni pën xykyatsë'ëkëty, jä'ä ko ja oypyë ets ja tëyajtënpë ja nipaye'eyën Dios yë jyä'ä. E pën jamts ja jotmay mëti'ipë m'ijxtëpën tsip xyaj'oyëtëty, yaa käjxnaxtë ma ëjtsën, ëjts yam nija'ap wi'ixës nyaj'oyë.

¹⁸ Jä'ä xëëw wa'atsës ojts ntukni''ijxëtya'atë tii mëpaat tuntën.

Ma yajkäxtën nimajkmäjtsk ja ja'ayëty ets nëjkx y'ixtë tyuntë

¹⁹ Ko ojts ntso'onëm jam Horeb, ënät ojts jam nja'ajtëmë ma ja kopkjotmën, mëti'ipë nyitënaaytyëpën yë Amor ja'ayëty, mpatu'unëmë jëtu'un ja nWintsën'ajtëmë Dios ja y'ënä'ämën. Ojts ntukye'eynyajxta'ayëmë tampë të'ëts'itjot ma kyutsë'ëkëtyën, miits wa'ats xy'ijxtë xynyija'awëtyë ets ojts nja'ajtëmë jam Cades-barnea.

²⁰ Jamts ojts n'ënëëmëtë: tëë ënät yaa nja'ajtëmë kopkjoty, ma Amor ja'ayëty tsyëënëtën, mëti'ipë yë Dios të xymyo'oyëmën.

²¹ Yë Wintsën mëti'ipë miits mTiosajtëpën, yë'ë ya'atë naax kam mooyëtëp. Paaty jä'ä'atë jëtu'un ya'atë naax kajpn, nitsiptuntë. Jä'ä ko yë Wintsën mëti'ipë m'ap m'ok Tyios'ajtëpën tëë mmo'ojëtë jëtu'un tä të tukwinwanën ja aptëjk, këtii mtsë'ëkëtë ets këtii mkumay mkutajëtë.

²² E miits ojts kë'ëm xynyimintës ets m'ënantë. Ko oy, ko yajkäxtëty yë mëku'ukëty ets nëjkx t'ixtë tuntë ja it naaxwiinyëtë ets yajnijawëty mëti'ipë tu'u yajpëkëpën ets mëti'ipë kajpn ëka'any yajnitëkëpën.

²³ Mëti'ipë miits mnikajpxtën, oyës nmëtooy, paatyës ojts nimajkmäjtsk nwin'ixy yë mëku'uktëjkëty, tu'ukjaty ma tu'ukpë ja kajpnën.

²⁴ Mëti'ipë ojts nyëjkxtën jam ma ja kopkjotmën ets jyajtë jam joyjyotm, ma txëëwatyën Escol ets ojts tukjëtijtëtya'atë ja itjot.

²⁵ Ojts wäänë tmëmintë yë aaytyëëm ujtstëëm, mëti'ipë ojts mëët yajtuknijawën, wi'ix ënety ja naax kam y'ixëtyën ets ja aaw ayuk tyajktë: Ja it naaxwiinyëtë mëti'ipë yë Dios xymyo'oyëmë mëj këjää yë y'oyëty.

²⁶ E miitsëty ka'ap mnëjkxantë, ojts xykyäjpxykyutëjtë ja Dios ja y'ënä'ämën, mëti'ipë ënety të mo'ojëtën.

²⁷ Ets ma ja mjëën mtëjkëtyën, ojts mtëkëtë ëëpë kajpxpë ets m'ënantë: Yë Wintsën ka'ap yowë xytsyojkëmë. Paaty të xyjyu'tëmë jap Egiptë ets yaa të xyajmi'inëmë, ma Canaán ja'ayëty yë nyaaxjotëtyën ets ënät yë Amor ja'ayëty xyaj'o'ktä'ämyëty.

²⁸ E tyam, ¿maa ënät nëjkxmëty? Yë nmëkukajpn'ajtëmë jëtu'un y'ëna'antë, ko ma tääpë itjotmën tam yë ja'ayëty mëti'ipë mëkëtyën ets këjxmëty tyänëtë. Ets nyaax kyajpnëty ta'tspëky oy nyapotsy'atë ets näjyëtu'un nikajpxtë, ko tëë t'ixtë yë y'u'unk y'ok yë ja'aypyajkyeny Anac. Tääpë aaw ayuk jëtu'unyë të xy'ëtsë'këtyä'äyëmë.

²⁹ Ënet ojts miitsëty n'ëtsowtë: Këtii nëkoo mkumay mkutajëtë, këtii tääpë ja'ayëty xytyimtsë'ëkëtë.

³⁰ Yë Wintsën mëti'ipë miits mTiosajtëpën yë'ë mwinye'eyëtëp ets yë'ë mnitsiptunanëtëp, jëtu'un tä ojts jyäty kyëpetyën jap Egiptë.

³¹ Ets jam të'ëts'itjotm yë Wintsën mëti'ipë mTiosajtëpën jëtu'un të mtimjyawëtë, tä yë ja'ay yë y'u'unk muum tseeny kony tyajnëjkxyën ets jëtu'un yaa të myajja'tëtë.

³² E miitsëty ka'ap tu'ukyë ja Wintsën mëti'ipë miits mTiosajtëpën tëë xytyuk'ijxpätë.

³³ Oy yë'ë mjatu'uwinwowëtë ets të t'ixta'ay ja it naaxwiinyëtë ma mtsënaaytyaknpëktëtyën. Ko ënety kyoots'aty, yë'ë mëët ja jëën tkutë'kxy ja në'ë tu'u, mëti'ipë mëpaat xypyanëjkxtën; e ko xyiiny'äty, yë'ë mëët ja yoots mtu'uwinye'eyëtë.

Ma ja Wintsën tukjoot'anpëkyën ja Israel ja'ayëty

³⁴ Ko yë Wintsën tmëtooy ko miitsëty je'eyë wiinkjaty xynyikajpx xynyimëtya'aktë, yë'ë mëk jyoot'anpëjky, paaty ojts yajxon timnyikäjpxy mëët ja kyutujkën.

³⁵ Nitu'uk yë ja'ay nëjkx kyaja'ty jam ma ja itjotmën ja oypyë, tyampë jyuuky'atën mëti'ipë je'eyë ja ëxëëk jot ëxëëk winma'any myëët'ajtëpën, mëti'ipës ntukwinwa'anëyën ja m'ap m'okëty.

³⁶ Yi'iyë Caleb, yë myaank yë Jefuné, nëjkxëp jam jyä'ty mëët yë y'u'unk tyo'oxytyëjk ets y'u'unk y'ok. Mëët ko yë'ë jëtu'un winë t'ëy tkäjpxy tääjës ntukjotkëtä'äkyën.

³⁷ Ets mëët miits mpokykyëjxmëty ojtsës yë Wintsën näjyëtu'un xytyukjoot'anpëky, etsës xy'ënëmaay: Mijts ka'ap nëjkx mtëkë ma tääpë naax kamën.

³⁸ Ma mijtsën yë'ë nëjkx mkutëkëty yë Josué, yë myaank yë Nun. Paaty mijts jotmëkmo'o, jä'ä ko yë'ë nëjkx tkë'ëmo'oy yë Israel ja'ayëty ja it naaxwiinyëtë.

³⁹ E oyëtën miitsëty të m'ëna'antë, ko ja mto'oxytyëjkëty ets ja m'u'unk m'ëna'këty ja mëtsip nëjkx tkë'ë'ampëjkta'ay. Tääpë pi'k'ëna'këty yë'ë nëjkx jam tyëkëtë ma tääpë itjotmën oy ënety ka'ap oy myäytyë tyajtënëm. Jä'ä ko yë'ëjës yam nmooytyëp ets yë'ë tjä'ä'atëty.

⁴⁰ E miitsëty, winpitë jatëkok jam të'ëts'itjotm. Nëjkxtë jam ma ja Tsaptsmejyën.

Ja tsyuuwinma'any mëti'ipë yajtëkooyëtën ja Israel ja'ayëty

⁴¹ Ënet m'ëtsoowtë: Tëës mëj këjää ja Wintsën nmëtëkoytyë. E tyam jëjp'ixy ëëts nyajpaatë, oy nëjkxtëtyës tsiptuunpë, jëtu'un tä ja nWintsën'ajtëm Dios të tni'ënä'ämën. Ënet xypyëjkë'ktë ja mëti'ipë yajmëtsiptuunpën ets ojts mnëjkxtë, jä'ä jëtää ënety mjootwinmaytyë ko ka'ap nëkooyë tsyipëty ets mkopktëkëtëty.

⁴² E yë Wintsën ojtsës xy'ënëëmë ets miits n'ëwaanëtëty: Ko ka'ap mnëjkxtëty tsiptuunpë, ko këtii ja mjuukyajtën nëkoo ëtsë'ëkëtum xypyëjkta'aktëty ma ja mëtsiptëjkëtyën ets myaj'ook myajtëkoyëtëty, jä'ä ko ka'apës nyajpaaty ma miitsëtyën.

⁴³ Ojts miits jëtu'un nja'ënëëmëtë, ka'apës ojts xytyuntë këwentë, ojts xykyäjpxy kumëtoownaxtë yë Wintsën ets ka'ap xykyuuytyuuntë ja y'ënä'ämën mëti'ipë ënety ja Wintsën të tjanikäjpxyën, ni'ikyë ojts jam mnëjkxtë tunkëjxm janty këtii pën myëjëty.

⁴⁴ E ja Amor ja'ayëty ko tnija'awëtyë, tääts mnipëtsëëmëtë tä xëmiinky kyääkwä'kxyën ets ka'ap myajmëtakëtë; jampaat mpaja'ajtëtë ma txëëwatyën Seir ets ma txëëwatyën Hormá.

⁴⁵ Ko ojts mwinpijtnëtë ojts mjajëëy mjayaxnëtë Wintsën wintum, e yë'ë ka'ap ojts mtunëtë këwentë.

⁴⁶ Paatykyëjxm jëtu'un ojts jekpyaat mwë'ëmtë tsënääpyë ma ja Cadés y'itjotmën.