Daniel 7 - Biblia Dc en Mixe de Quetzaltepec

Ma yajwinkëma'ayën taxk ja mëj jëyujk

¹ Tëkok ojts yë Daniel wyinkuma'ay, koots ënety, mëët tu'kjëmëjt ënety kyëjääjë yë Belsasar yajkutuky jam Babilonyë. Ko myä'äypyëti'ky, ënät tkujaaytyääy tiijaty ënety të twinkuma'ayën. Jëtu'un tjaaypyejty:

² Ënätës të nwin'ixy, ko taxk it pyojy ets jëtu'un ja mejy jyänty pyojminy jyänty pyojxëpy.

³ Ënet jam mejy itkujky të pyëtsëmtë nimajktaxk yë mëj jëyujk, tëkatyëty y'ixë'atë.

⁴ Ja mëët tu'ukpë jëtu'un y'ixëty tä kuuyxyëpëjyën, je'eyëp ko tam yë kyäkn jëtu'un tä witsnën. Tam ënety n'ixyës ko të yajkatsnuky yë kyäkn ets yajwijtskukë jëtu'un të wya'kukë ja'ayën ets ja kyuko'oxy jëtu'un të y'awinpity tä ja'akyuko'oxyën.

⁵ Ja mëmäjtskpë jëtu'un yaj'ixy tä osën, tu'kpa'a këjxm yaj'ixy ja nyini'kx, yë'ë y'akap'ajtyp tëkëëk yë jëwiits pajk; ets të nmëtoyës yaj'ënëëmë: Nëjkx mtsu'utsy, tii mtimytsyu'utsäämpyën.

⁶ Ja mëtëkëëkpë jëtu'un yaj'ixy poop kaajën, je'eyëp tap taxk tmëëtëty yë kyäkn jëxkë'p; ets të n'ixyës ko nän taxktëm yë kyëpajk ets tëë yajmo'oy yë kuttujkën.

⁷ Ja mëmajktaxkpë ja mëj jëyujk atsë'ëk ajawë yaj'ixy ets nëkooyë myëk'ajnë. Yë'ë tyëts'ajtyp yë pujxn; aak tyimtsu'tstääpy tii tyimpatyp ets tnaxmëtäänë mëti'ipë natëjkëpën. Tëkatsy tääpë ja mëj jëyujk y'ixëty, ka'ap jyëtu'un'atë ja mëti'ipës ënety mëjëyëjp të n'ixyën, tam tmëëtëty majk yë wyaj ma kyëpajkën.

⁸ Yë'ëjës ënety jam ja wyaj n'ijxëp ko të n'ijxpaatyës wiinkpë wyaj jam itkujky ma ja majkpë yajpaatyën je'eyëp ko mutsk, ënät të yajnëtëjy tëkëëk ja wyaj ets të nyi'ëwaatsë ja mëti'ipë ok të pyëtsimyën, jëtu'un yë wyiin ja'ayën ets amëk yo'k mëk kyäjpxy.

Ma ja Tios ja nipaye'eyën tuna'anyën

⁹ Tamës ënety jëtu'un njaak ixynyëm, koos të n'ixy yajkëëytyä'äky yë kutujktakn, ënyääytyakn ets jam tu'uk yë Mëjja'ay të nyaaxweetsy. Poopëm yë wyit yaj'ixy tä tsajp o'pykyën ets wyääy jëtu'un kyëxë'ëky tä kupixyny nyijëmkën. Ja ënyääpyäjn ets ja nyiye'eypyäjn mëti'ipë tëkäämpën jëënën yaj'ixy,

¹⁰ ets jam wyintum mëjnëëjën jam yaj'ixy tsyoony ja jëën. Mil'am jam yaj'ixy ja tuunpëtëjk ets millonk'am nyatänëty. Ja mëti'ipë ja aaw ayuk yäjkpyën ënät ojts kyajpxtsoony ets ojts yajkëëywyä'kxy ja noky.

¹¹ Jä'äjës ënety jam n'ijxypyt wi'ix ja waj ja mutskpë jyänty y'ëti'itsy jyänty y'ënä'änyën; ets tamës jëtu'un n'ixy ko ja mëj jëyujk të tyaj'ooktë ets piw nuuk të tuunta'atë ets të njëën mo'otë ets tyooytyëkoyëty.

¹² Näyjyëtu'un ja wiinkëtypë ja mëj jëyujk ojts yajpëjkëtë ja myëk'ajtën, je'eyëp ka'ap të tyaj'ooktë jä'änëm tyuk'ëwxijtëp ja xëëw po'o.

¹³ Tamës jëtu'un nwinkumaa ëtë'ëtsy koots. Ko ajotkumonë të n'ixyës: Ja'ayën myiny yootsjoty, naaxwiinyëtë ja'ayën yaj'ixy, jä'ä të tninëjkxy ja Mëjja'ay ets të yaj'ënëëmë ets wyinkonëty.

¹⁴ Ënet yajmooy ja kuttujkën ets ja mëj'ajt oyajtën, aak mëtuunëp ja naax kajpn mëti'ipë kanaakjëjp ja ayuk kyajpxtëpën. Yë kyutujkën yë'ë xëmë itaanp ets ja y'ënä'ämtakn ka'ap nijëna'a kyutëkoyëty.

¹⁵ Ëjts Daniel, jëtu'unës të näjyawëty nxujxta'ay; ets mëkës të nmëmay të nmëtajy mëti'ipës të n'ixyën,

¹⁶ ënätës të ninëjkxy tu'uk ja ja'ay mëti'ipë ënety jam tënääpyën, etsës të n'ënëëmë etsës xytyukmëmëtya'akëty wi'ix ko jëtu'un të nkuma'ayës. Yë'ë tëë tkupëky koos xytyukmëmëtya'aka'any, etsës të xy'ënëëmë:

¹⁷ Yë taxkpë mëj jëyujk të xy'ixyën yë'ë mëti'ipë y'ënä'ämantëpën yë naaxwiinyëtë.

¹⁸ Ok nëjkx yë Wintsën Ni'ik kyë'ëtëjkëtyä'äyë yë kutujkëntakn ets nëjkx yë'ë tjä'ä'aty xëmëkyëjxm.

¹⁹ Ëjts jä'äs ënety njaak nijawëjäämpy ja mëmajktaxkpë ja mëj jëyujk tiijës ko jëtu'un të n'ixy ëxëëkëm kyëxë'knë: Yë'ë tyëts'ajtyp pujxn ets yë'ë tyeky xyooky'ajtyp yë tsuxkpujxn; aak tyimtsu'tstääpy tii tyimpatyp ets jëtu'unyë naxmëtä'änëtyä'äy mëti'ipë jaaknatëjkëpën.

²⁰ Näy jä'äs ënety nijawëjäämpy ja mëti'ipë majk ja wyajën ets ko yaj'ixy ja wyiin tmëëtëty ja mutskpë wyaj mëti'ipë pëtsëëmpën ma mëjätyëtypyën ets ko kyäjpxy amëj akëjxm yajmëtoy kyäjpxy, jëtu'un yajmëtoy ni'ik yowë myëjëty ets ojts tëkëëk nyëka'ay ja mëjatyëtypë ets yë'ë pyëtsiimy.

²¹ Ënätës të n'ixy ko tyaapë waj tëë tnipëtë'ëky yë Dios yë nyaax kyajpn ets tëë tmëmëtä'äky,

²² koonëm të myiny ja mëjja'ay ets jä'ä të tnitsiptuny ja Wintsën Ni'ik nyaax kyajpn, jä'ä ko tëë ënety tpaaty ja xëëw jëmëjt ets ja naax kajpn jä'ä tjä'ä'atëty ja kutujkëntakn.

²³ Ets të y'ënä'äny: Mëmajktaxkpë yë mëj jëyujk, yë'ë y'antijpy ko jää'ataanp ja mëmajktaxkpë ja yajkutujkpë, tëkatsy yajkutuka'any, ka'ap jyëtu'un'atë ja myëku'uktëjkëty. Ëxëëk ja naax kajpn tuna'any, jëtu'unyë t'atääna'any tuktääna'any ets tnuka'any twëtsa'any.

²⁴ Yë majktaxkpë yë wyaj, majk yë yajkutujkpë y'ita'any ma tääpë yajkutujkpën. Ok wiinkpë yajkutujkpë jyää'ata'any mëti'ipë nëjkx ja tëkëëkpë tyaj'atëkoyën ets tëkatsy tyuna'any.

²⁵ Nëjkxëp ja Dios Ni'ik tnëxi'iky tukxi'iky ets nëjkxëp ja nyaax kyajpn ëxëëk tuunë; yatëkatsa'anëp ja Dios ja y'ënä'ämën tyiyajtën ets yajtëkajtsta'aja'anëp ja xëëw mëti'ipë yajtuunpën ma tsajptëjkën ets ja Dios ja nyaax kyajpn yë'ë nëjkx tuntë tëkëëk jëmëjt ja kujkm mëti'ipë ënety yë'ë nyi'ënä'ämëpën.

²⁶ E ja nipaye'epyëtëjk nëjkxëp tyajkutuktë ets ja kutujktakn yajpëjkëty ets nëjkx yajxon tyim atëkoy.

²⁷ E ja kuttujkën, mëk'ajtën ets ja mëj'ajt oyajtën mëti'ipë naaxwiinyëtë apëtsëmy yajpatpën yë'ë nëjkx yajmooytya'atë ja Dios Ni'ik ja nyaax kyajpn. Yë kyutujkën xëmëkyëjxm nëjkx yajpaaty ets tëkokyë yë naax kajpn naaxwiinyëtë apëtsëmy yë'ë nëjkx tmëtuntë ets tmëmëtowtë.

²⁸ Jëtu'un jyëjpkëxy ja nyimëtyä'äky. E ëjts Daniel, mëkës të nmëmay të nmëtajy, poopëmës je'eyë të njajta'ay; je'eyëp ko tyaapë ni pënës të nkatuknijawë.