Daniel 6 - Biblia Dc en Mixe de Quetzaltepec

Ma ja Daniel jap yajkujëpipën kemyjoty kaa itkujky

¹ Yë Darío yajkutujkpë, mëko'px ja i'px ojts tnikajpxpety ja'ay mëti'ipë ënä'ämëpën ma ja itjotmën mëti'ipë nyitënääpyën.

² Ojts tëkëëk tpëjktä'äky ja'ay mëti'ipë y'aye'eyëpën ja kutujktakn ma tyaapë kutuunktëjk të yajnikajpxpätën, këtiipë muum ja yajkutujkpë tsyiptëkëty. Daniel ojts näjyëtu'un yajtuknipëky ja tuunk ma ja nitëkëëkpë ojts yajnikajpxpätën mëti'ipë aye'ey anajxtëpën,

³ yë Daniel pojën ojts yajnijawë ko oytyuny ma ja tyuunkën mëti'ipë ënety të yajtuknipëkyën ets y'aye'ey y'anaxëty, ja wyijy'ajtën ets ja kyëpetyajtën jä'ä ojts tuknaxy; paaty ja yajkutujkpë tyuknipëjkë ets jä'ä y'ënä'ämpë'atëty ma ja yajkutujkpë ja kutujktakn tmëëtëtyën.

⁴ Ja mëti'ipë anajx atëjkëtyëpën ets mëti'ipë yajkutujktëpën ojts ja winma'any t'ixta'atë wi'ix y'ëna'antëtyën ets tyajnipaxëtëkëja'antë ja Daniel ma yajkutukyën, ja Daniel wa'ats ja jyot wyinma'any ënety tmëëtëty paaty ka'ap tpatë ja pyoky; jëtu'un ka'ap yajni'ë'ënëy.

⁵ Ojts je'eyëm t'ixtaay'ëtë'ëtstë ja winma'any ets y'ënantë: Ka'ap mpata'anëmë yë Daniel yë nyëë pyoky, ënät tëy ko yë'ë ntukni'ë'ënëmëty mëti'ipë y'ëwtajtypyën.

⁶ Ënet kutuunktëjkëty, mëti'ipë anajx atëjkëtyëpën ets ja yajkutujkpëtëjk tkajpxmujktë ets nëjkx tmëëtmëtya'aka'antë ja Darío yajkutujkpë, ko jam jyajtë tääts t'ënëmaaytyë: Xëmë juuky'ajtp yë yajkutujkpë.

⁷ Tëkokyë yë kutuunktëjkëty ets yajkutujkpëtëjk tëëjës ntu'ukmuktë ets të nkäjpxy'atës, ko tu'uk yë ënä'ämën yajpëjkta'akëty ma naax kajpnën ets i'px majk xëëw y'itëty, ja ënä'ämën jä'ä y'ënä'äny: ko ni pën mëpaat wiink tios tka'ëwtaty, yi'iyë tu'ukyë yë yajkutujkpë yaj'ëwtatëp. Mëti'ipë ka'ap jëtu'un tunyën jap nëjkx yajkujëpipë kemyjoty ma kaa jap yajpaatën.

⁸ Paaty yam mijts yajkutujkpë myajpëjktsoy ets xytsya'ajëty ya'atë noky; ya'atë ënä'ämën ka'ap mëpaat pën tyajtëkatsy jëtu'un tä yë tëyajtën y'ënä'änyën mëti'ipë Medos ja'ay ets persë ja'ay yajtuuntëpën ets ka'ap tjëkyepy pën tyajtëkoyëty.

⁹ Ja Darío yajkutujkpë ojts ja ënä'ämën tsa'ay ma ja kutuunktëjkëty ënety jamëtyën.

¹⁰ Ko yë Daniel tnija'awëy, ko tëë ja ënä'ämën yajtsa'ay, ënätyë ojts nyijkxy ma tyëjkën ets tya'ëwatsy ja tyëjk'aaw ets ja tyëjkwiin ma myä'äyën, mëti'ipë jam najts'ijxëpën maatsow yë Jerusalén kajpn wyi'imyën ets nyäkyoxtënaaytyakë ets t'ëwtajty ja Dios. Tëkëëk ijty tu'kxëëwpë nyu'kxtä'äky, jëtu'unyëm ënety xëmë tuny.

¹¹ Ënet ja ja'ayëty tyëjktëjkëtyë ma ja Daniel ja tyëjkën, Dios ënety jap yë Daniel myënu'kxtäkpy.

¹² Poj'am ojts tninëjkxtë ja yajkutujkpë ets tyajtëwa'antë wi'ix y'itëty ja ënä'ämën mëti'ipë ënety ja yajkutujkpë të tsa'ayën ets t'ënëmaaytyë: Mijts yajkutujkpë tëë tu'uk yë ënä'ämën xyajwë'ëmy, mëti'ipë ënaanpën ko ka'ap pën wiinkpë tios t'ëwtatëty, ko yi'iyë yaj'ëwtatëp yë yajkutujkpë, e ko pën wiink tios t'ëwtatëty jap nëjkx yajkujëpipë kemyjoty ma maykyaa jap yajpaatën, ¿këtii jyëtu'unëtyë? Mëtëy yë'ë, jëtu'un y'ëtsooy ja yajkutujkpë. E yë ënä'ämën kopkpëky yë ko yajpaatuny jä'ä jëtu'un myiny ja tëyajtën ma Persë ja'ayëtyën ets ma Medos ja'ayëtyën ets ko ka'ap tjëkyepy y'atëkoyëty.

¹³ Ënet y'ënaan'ëtë'ëtstë: Yë Daniel, yë jutië ja'ay, mëti'ipë tsumy matsy yaa miinën, ninu'un yë wintsë'kën tkatimmyëët'aty ma yajkutujkpën ets ma ja ënä'ämënën mëti'ipë yë yajkutujkpë të tsa'ayën, jä'ä ko ëëtsëty tëëjës kë'ëm ntimy ixtë ko yë'ë tëkëëk ok nyu'kxtä'äky tu'kxëëwpë.

¹⁴ Ko ja yajkutujkpë jëtu'un tmëtooy, ojts tmëkjawë ets ka'ap ojts jotkujk nyäjyawëty ënätyë tja ixtaay ja winma'any wi'ix jeexyë ja Daniel tyajtso'okyën. Jëtu'un ojts kyutsu'ujë ojts mëk jyamay jyatajy ets tjayajtso'okany ja Daniel,

¹⁵ e ja ja'ayëty jëtu'un nyajxnëtë tyëjkënëtë janaam jatsojk myiinëtë ma ja yajkutujkpën ets t'ënëmaaytyë: Yë yajkutujkpë wa'ats tnijawë ko yë Medos ja'ayëty ets persë ja'ayëty jëtu'un yë y'ënä'ämën y'ëna'antë ko yë yajkutujkpë tii t'akajpxtukëty ëkë tni'ënä'ämëty ka'ap tjëkyepy pën tyaj'atëkoyëty.

¹⁶ Paaty ja yajkutujkpë ojts tni'ënä'ämë ets tyajmintëty ja Daniel ets jap tkujëpipëtëty kepyjoty ma ja kaa jap nimay yajpaatën. E ka'anëm ënety ja Daniel jap yajkujëpipë kaa kemyjoty ko ja yajkutujkpë jyaak nëmaayë: Yë Dios mëti'ipë mëtuumpyën ets mëti'ipë wyinkutsë'këpën yë'ë myajtso'okëtëp.

¹⁷ Ko ja Daniel jap kemyjoty yajkujëpijpëy, ënät ojts yaj'akë'ëy mëët tu'uk yë mëjtsaa ets t'atsaay ja yajkutujkpë mëët ja kuttujkën ets ja wintsëntëjkëty ja kyutujkënëty ets jëtu'un yajpatunëty ja ënä'ämën mëti'ipë ënety të tkäjpxykyutëjyën ja Daniel.

¹⁸ Ënet ja yajkutujkpë ojts nyijkxy ma ja tyëjkën mon tuk, ka'ap y'a'ux'ajty ets nän ka'ap tiituunk wiinkpë tuuny mëti'ipë ja yajkutujkpëtëjk tyuunk'ajtëpën; nän ka'ap ojts oy myä'äy pyo'kxy.

¹⁹ Tim je'eyë xyiinyëy ets pyëti'ky ets ojts nyijkxy ma ja kaa ijtaknën ma ja Daniel ënety të yajkujëpipën.

²⁰ Ko tmëwinkoony ja kaa ijtakn, ënät jë'ë ya'ax tmëkäjpxy ja Daniel: Daniel, Dios mëtuunpë, ¿tëë ja mTios myajtso'okyë kaa aawjoty, mëti'ipë m'ëwtajtypyën ets mëtuumpyën ëmuumtu'ukjotë?

²¹ Ets ja Daniel y'ëtsooy: Juuky'ijtp yë yajkutujkpë xëmë.

²² Yë nTiosës yë'ëjës të xytyuknikexy yë tsajpjotmëtë kukäjpxy, mëti'ipë të t'amë'pxta'ayën yë kaa këtiipës xytsyu'utstëty, jä'ä ko yë Dios nyija'ap koos ka'apës tii ntuuntëkoy ets ka'apës ma yajkutujkpë nmëtuuntëkoy.

²³ Ënet ja yajkutujkpë mëk xyoontäky ets ojts tim ënätyë tni'ënä'ämë ets ja Daniel tjuutëty jap kemyjoty. Ko tyajpëtsëëmtë jap ka'ap maa ja Daniel tsyëtyutëty ets ka'ap maa wi'ix të jyäty, mëët jä'äkyëjxm ko ja Dios yë'ë tu'ukyë tuk'ijxpejty.

²⁴ Ja yajkutujkpë ojts tni'ënä'ämë ets tyajmintëty ja ja'ayëty mëti'ipë ënety ja Daniel të tni'ëënëtë ets jap yajkujëpijpëtyë kaa kemyjoty mëët ja y'u'unkëty y'ëna'këty ets ja y'u'unk tyo'oxytyëjkëty; ka'ap ënety jap y'oyjya'tënëm ko ja kaa myajtstaayëtë ets tsyu'tstaayëtë.

²⁵ Ënet ja Darío yajkutujkpë tnija'ayëtyääy ja naax kajpn wi'ixjaty ja aaw ayuk tmëët'atën ets y'ënäny: Ëjts ntsojkpyës ets miitsëty jotkujk mjuuky'atëty ets xypyaatëty xy'ixtëty mëti'ipë mtukjuuky'atëpën,

²⁶ ets ni'ënä'ämës ma tëkokyë naax kajpnën wä'än tyajwintsë'ëkë ets wä'än tyajmëjjawë yë Dios mëti'ipë Daniel y'ëwtajtypyën. Jä'ä ko juuky Dios yë'ë ets xëmëkyëjxm yë y'ity. Yë y'ënä'ämën kyutujkën ka'ap nijëna'a pën tyaj'atëkoyëty ets myëk'ajtën ka'ap nijëna'a jyëjpkëxy.

²⁷ Yë'ë yajtsokp ets yaj'ëwaatsëpëtsëëmp yë'ë; yaj'ijxëp yë myëj'ajtën tsajpjotm ets naaxwiinyëtë. Yë'ë të tyajtso'oky yë Daniel ma kaa myu'utën nyiitstën.

²⁸ Ets Daniel je'eyëm ojts y'ity wintsën ma ja Darío ja kyutujktaknën ets ma ja Ciro näjyëtu'un yajkutujkyën, mëti'ipë Persëja'ayën.