Daniel 3 - Biblia Dc en Mixe de Quetzaltepec

Ja jëëntooytyakn

¹ Yë Nabucodonosor yajkutujkpë, ojts tni'ënä'ämë ets tu'uk yaj'oytyunëtyë yë awinax aakyë'ë yajtuk'oytyunëp yë pu'ts pujxn, jä'ä kyëjxmëty majkmokx xajpk ets tu'kxajpk ja mäjtsk kë'ënux myëjwiinëty ets jam ojts tni'ënä'ämë yajpëjkta'akëty ma ja Durá joyjotmën, mëti'ipë nyitënääpyën yë Babilonyë.

² Ënet tnikäjxëtyääy ja yajkutujkpëtëjk, mëti'ipë ënä'ämtëpën maajaty ja naax kajpnën mëti'ipë ja Babilonyë nyitënääpyën, ojts tnikäxë näjyëtu'un yë tsiptuunpë wintsëntëjkëty, kajpxwijpëtëjkëty, mëti'ipë meenykyoonë'ktëpën, mëti'ipë nyipaye'eytyëpën yë jotmay, mëti'ipë kutuunk'ajtëpën ets myiinta'atëty ma jam ja awinax yajnixëëwtuna'anyën mëti'ipë ja Nabucodonosor të t'oytyunyën.

³ Ënet ja ja'ayëty myujktaaytyë mëti'ipë ënety mëj'äämpy ijtëpën ma ja naax kajpnëtyën ma jam yajnixëëwtuna'anyën ja awinax.

⁴ Ënet ja ja'ay tukkajpxëy mëti'ipë ënety të yajtuknipëkyën ets t'ënëmaay ja mayjyä'äy: Mëtoow'itë ya'atë aaw ayuk miitsëty naax kajpnëty, ninu'un të mja'tën ets ninu'un wiinkëtypë aaw ayuk xykyajpxtën.

⁵ Ko xymyëtowtëty ja xuxn yajtukxu'uxy ets ja cítara, ja lirë ja salterië ja gaitë ets tu'kë'ëyë xuxn wojpk mëti'ipë ënaanpën, ënätyë mnäykyuxtënaaytyakta'ajëtëty ets xy'ëwtatëty ya'atë ja awinax pu'ts pujxnëmpë mëët y'oytyunyëtyën, mëti'ipë të tni'ënä'ämën yë yajkutujkpë Nabucodonosor ets kyojëty.

⁶ Pën ka'ap kyoxtänë ets pën ka'ap t'ëwtaty ya'atë awinax, jap nëjkx yajkujëpipë ma jap yë jëëntooytyaknën mëti'ipë jap tyam aanpëjkpën.

⁷ Ko ja ja'ay tmëtoowtë ja xuxn ets ja kow y'ënaantä'äky ënätyë ojts nyäkyoxtënaaytyakta'ajëtë ets t'ëwtajtë ja awinax mëti'ipë ënety të yaj'oytyunyën mëët yë pu'ts pujxn.

⁸ Ënet ja caldeo ja'ayëty ojts ya'atë winma'any tpaatë ets ja pyoky ojts t'ixtaayëtë ja jutië ja'ayëty ets ojts tni'ëënëtë ma ja yajkutujkpën Nabucodonosor,

⁹ jëtu'un t'ënëmaaytyë: Mëj'äämpy xëmë m'ity mijts yajkutujkpë ets xëmë yë mxëëw yaja'amyätsëty.

¹⁰ Mijts yajkutujkpë tëë xynyi'ënä'ämë ets tëkokyë yë ja'ayëty kyuxtënaaytyakta'atëty ko tmëtoowpaatëty ja xuxpë wojpë y'ënaannta'aktëty,

¹¹ e pën jëtu'un kyatuumpyën jap yajkujëpipëty ma jëëntooytyaknën mëti'ipë jap tyam aanpëjkpën.

¹² E tëëjës n'ixtës, ko tää yë jutië ja'ayëty mëti'ipë yë yajkutujkpë jam yajtuumpyën ma kutujktaknën ets y'ënä'ämtëty ma Babilonyë kajpn tnitänën, yë'ëjëty ka'ap ninu'un tmëët'atë ma mijtsën yajkutujkpë, ka'ap t'ëwtatë yë tios mëti'ipë n'ëwtajtëmën ets ka'ap t'ëwtatë ja awinax mëti'ipë mijts yajkutujkpë të xynyi'ënä'ämën kyojëty. Yë'ë yë Sadrac, Mesac ets Abed-negó.

¹³ Ja Nabucodonosor yajxon ojts jyoot'anpëjknë ets tnikäjxëy ja Sadrac, Mesac ets Abed-negó. E ko jam myiintë,

¹⁴ ënät ja yajkutujkpë yajtëëwëtë: ¿Janty tëy yë'ëjë ko miitsëty ka'ap xy'ëwtatë ëëts yë ntiosëty ets nän ka'ap xywyinkoxtänëtë ja awinax mëti'ipë të ni'ënä'ämën kyojëty?

¹⁵ ¿Wi'i m'ëwtatantëp ets mwinkoxtänëjantëp yë awinax mëti'ipës të ni'ënä'ämën ets kyojëtyë ko ënety ja xuxpë wojpë tyëkëtë xuxpë? Jä'ä ko pën miitsëty ka'ap xy'ëwtatë ya'atë awinax, jap ënät jëëntooytyaknjoty myaj'ajëpipëtëty mëti'ipë jap tyam aanpëjkpën; e ko ënät jap myajpëjkta'aktëty ¿pën tios ënät mnäyajtso'okëtëp?

¹⁶ Tyaapë ka'ap tjëkyepy nimëtyakmëty, jëtu'un ja ëna'ktëjkëty y'ëtsoowtë.

¹⁷ Ëëts ja nTiosëty, mëti'ipë n'ëwtajtëpënës, yë'ëjës xyajtso'oktëp jap jëënjoty ets muum ëxëëktum ma ënety ja yajkutujkpë ëëts xypyëjkta'aka'antën, yë Wintsën yë'ë ëëts xyajtso'okantëp.

¹⁸ E oy tkatuunpëty jëtu'un tä ëëts yam n'ëna'antën, mijts yë'ë mnijawëp ko ëëtsëty ka'apës tääpë awinax n'ëwtata'antë ets ka'apës nwinkoxtänëja'antë mëti'ipë të xy'oytyunyën mëët yë pu'ts pujxn.

Ma ja nitëkëëkpë ja ëna'ktëjk tsyo'oktën jëënjoty

¹⁹ Ko ja Nabucodonosor jëtu'un tmëtooy ja ëna'ktëjk y'ëna'antë, tsaptsëm ojts ja wyiin jyëjp jyajta'ay mëët ja joot'anë. Ënet ni'ënä'ämëy ets tyaj'aanpëktëty ja jëënjut wëxtujk'ok;

²⁰ ets ojts tuknipëky ja tsyiptuunpëtëjk mëkëtypë ets tsumtëty mëët yë tejpxy ja Sadrac, Mesac ets Abed-negó ets nëjkx jap tkujëpipëtë ma ja jëënjutën.

²¹ Ja nitëkëëkpë ja ëna'ktëjkëty, tam ënety je'eyëm tmëët'atë ja wyit mëti'ipë myëwintsën'ajtëpën ko ojts yaj'atsum yajtekytsymtë ets yajkujëpijpëtyë jap jëënjoty.

²² E jä'ä ko tëë ënety ja yajkutujkpë y'ënä'äny ko yë y'ënä'ämën ënätyë mëpaat yajpaatuny, tëë ënety ja jëënjut nyayä'änpëjknë, ja jëën nëkooyë ojts pyëtë'knë paaty ja tsiptuupëtëjkëty y'o'ktaaytyë ko ja jëën pyatëtë mëti'ipë ënety ojts të tkujëpijpnaxtën ja nitëkëëkpë ja ëna'ktëjk,

²³ kë'ëtsumy tekytsym ojts jap jëënjutjoty kya'ata'atë.

²⁴ Ënet ja Nabucodonosor ënätyë y'ëxwä'ätsë'ky ets mëët ja jotmay t'ënëmaay ja nyaxkajpxëpëtëjk mëti'ipë tuuntëpën ma yajkutukyën: ¿Ti këtiijën nyitëkëëk'atë tääpë ëna'ktëjkëty mëti'ipë të yajkujëpipëtën jëënjutjotyë? Jëtu'un, nitëkëëk të yajkujëpipëtë, jëtu'un y'ëtsoowtë.

²⁵ Nimajktaxkës jap n'ixtë ets tëë yajkë'ëkaj yajteky kyäjtë, najxtëp tëjkëtyëp jap jëënjoty ets ka'ap yaj'ixtë wi'ix jyatë, ja mëmajktaxkpë ja ja'ay jëtu'un yaj'ixy tä tu'uk Dios kukäjpxy.

²⁶ E ko jëtu'un kyajpxtaay, ënät ja Nabucodonosor ojts jam nyijkxy jëënjut ëkë'ëm ets mëk yujk'ënany: Sadrac, Mesac ets Abed-negó, miitsëty, Dios Ni'ik Këjxmëpë m'u'unk'ajtëtëp, pëtsëmtë jap ets yam mintë. Ënet nitëkëëk pyëtsëëmtaaytyë jap jëënjutjoty,

²⁷ ënät wyinkoontaaytyë ja yajkutujkpëtëjk ets ja kutuunktëjkëty jä'ä y'ijxtëp ja tääpë ja nitëkëëkpë ja ëna'këty mëti'ipë ka'ap wi'ix të jyatën ets ka'ap ja jëën wi'ix të tyunëtë ets t'ixtë ko nitu'uk ënety kyakiipyxyuuktë ets niwi'ix ja wyit tyujkxy të kyajatë ets ka'ap maa të jyëëntukmëjojtë.

²⁸ Ënet yujk'ënany ënätyë ja Nabucodonosor: Kënu'kxy mëjjawë nyaxëty yë Dios mëti'ipë y'ëwtajtëpën yë Sadrac, Mesac ets Abed-negó, mëti'ipë të tkexyën yë tsyajpjotmëtë kukäjpxy ets tyajtso'oky yë jyä'äy mëti'ipë oy mëtuunëpën, jä'ä ko yë'ëjëty ka'ap yë o'kën të tsë'ëkëtë ko të tkäjpxykyutëjtë yë yajkutujkpë jä'ä ko yë'ëjëty mëj tjëkyäptë yë Tyiosëty ets ka'ap të t'ëwtatë wiink tios.

²⁹ Tyam yë'ëjës yam nikäjpxyp ko pën ëxëëk tnikäjpxy tnimëtya'akëty yë Dios mëti'ipë tyaapë ëna'këty y'ëwtajtëpën nëjkxëp yaj'atsuk yajtuktsukë ets nëjkx ja jyëën tyëjk tsaanipiy y'awinpity oy ënety myaakajpnëty tsyoony ets wä'än myëti'ipë y'ayukëty tkäjpxy, jä'ä ko ka'ap maa tios mëti'ipë jëtu'un yajtsokpën tä yë'ëjëty yë Tyiosëtyën.

³⁰ Ënet ja yajkutujkpë ojts tmo'oy tyaapë ëna'ktëjkëty këjxmëtypë tuunk ma ja kyutujktaknën ets ojts näjyëtu'un y'ënä'ämtë ma ja itjot tnitänën ja Babilonyë.