Daniel 10 - Biblia Dc en Mixe de Quetzaltepec

Ma ja Daniel twinkuma'ay jam winkon ma ja Tigris mëjnëëjën

¹ Ma ënety mëtëkëëk jëmëjt yajkutukyën yë Ciro, mëti'ipë Persë ja'ayën; yë Daniel, mëti'ipë näjyëtu'un yajtijpën Beltsasar, ojts yajtuknijawë mëti'ipë mëtëyën, je'eyëp ko tsip ets yajja'akyukëty. E Daniel ojts yajxon tmëmay tmëtajy ets tja'akyukë wi'ix nyiwijyën.

² Jä'ä xëëw ëjts mon tukës ojts nyajpaaty ets jëtu'un y'ijty tëkëëk sëmaan.

³ Ka'apës ojts një'kxy jë'kxy pëky xu'kxpë, ka'apës ntsu'ty yë tsu'utsy ets ka'apës n'uky yë tsatym nyëë ets nän ka'apës nätyuku'tsë yë tsooy mëti'ipë pa'akxu'kpën koonëm ojts y'apety tëkëëk sëmaan.

⁴ Ma y'i'px taxk anyën ja mëët tu'kpo'opë tääpë jëmëjtpë, jamës ënety ëjts winkon ma Tigris mëjnëëjën.

⁵ Ënätës ajotkumonë të n'ijxpaaty tu'uk yë ja'ay, yë'ë wyit'ajtyp yë Linë wit ets yë'ë wyëën'ajtyp yë pu'ts pujxn wa'atspë.

⁶ Jëtu'un yë nyini'kx y'ajajy tä topacië kepyën, jëtu'un yë wyiin jyëjp y'atë'kxy tä wëtsukën, yë wyiin jëtu'un yaj'ixy jëënyä'änkën, yë kyë'ë tyeky jëtu'un kyëxë'ëky tä tsuxkpujxnën, ko kyäjpxy jëtu'un yajmëtoy mayjyä'äy yowë kajpxp.

⁷ Ëjtsyë nätyu'uk të n'ixy jëtu'unpë ja wiinkuma'ajën, jä'ä ko ja ja'ayëty mëti'ipë ënety jam mëët nyajpaatyënës ënätyë të kyäkta'atë ets nyäyu'tsta'ajëtë.

⁸ Nätyu'ukës të n'ixy tyaapë kuma'ay. Tsuxk wi'ixnës të njajta'ay ets jëtu'unës të näjyawëty tim këjxp yowë ja njot nmëjaawës.

⁹ Koos të nmëtoy të kyäjpxy ënetyës të nkëtay ets të njëpijpkëtä'äkyës naaxkëjxy.

¹⁰ Ënätës tu'uk yë kë'ë të xymyätsy etsës të xywyijtsë'ëky, koonëmës yajxon të näkyutijyë maas yë nkoxën etsës të ntënaaykyukë.

¹¹ Täätsës të xy'ënëëmë: Taniel, mëti'ipë yë Dios tsojkëpën, mëtoow'it yajxon mëti'ipë yam ntuk'ënëëmëjäämpyën: Pëtë'ëk, ëjts tëëjës mijts nyajtuknikexy. Je'eyë kyajpxtaay täätsës tsë'ëkë nwa'kujkëy.

¹² Ënätës xy'ënëmaay: Këtii mtsë'ëkë, Daniel, jä'ä ko jä'ä xëëw ma ojts mijts xytyuknipëjktaakës xyjyä'äkyukëja'ay tsipëtypë winma'any ets m'ënany ko yu'unk naxy mnäpyëjkta'aka'anyë Dios wintum, yë'ë ojts tmëtoy yë mnu'kxtakën. Paatykyëjxmës ëjts të nminy.

¹³ Yë tsajpjotmëtë kukäjpxy, mëti'ipë mëj'äämpy i'jtpën ma Persië ja'ayëtyën yë'ë të xy'awa'ktukyës I'px tu'uk xëëw; e yë Miguel mëti'ipë ni'ik mëj'äämpy ijtpën ma tsajpjotmëtë kukexyëtyën, yë'ëjës të xynyiminy etsës të xypyutëkë, ëjts tëëjës ënety nätyu'uk nwë'ëmnë ma Persië yajkutujkpëtyën.

¹⁴ E paatyës të nminy ets ntukmëmëtya'aka'any tii tunan jatanëpën ma mnaax mkajpnën, yë kuma'ay mëti'ipë të xy'ixyën yë'ë nyikäjpxyp mëti'ipë tunan jatanëpën ma mnaax mkajpnën.

¹⁵ Koos jëtu'un të xy'ënëëmë, ëjts tëyës ënety ja nwiin jam nyajtëëynyë naaxkëjxy ets amonyës ntänë.

¹⁶ Ajotkumonë të yaj'ixy jëtu'un kyëxë'ëky tä tu'uk ja'ayën mëti'ipës yë n'aaw të xytsyoonë. Ënätës të n'ënëëmë mëti'ipës ënety jam xywyintënääpyën: Wintsën ya'atë kuma'ay nëkooyës nmëmoon nmëtujknë ets jëtu'unës näjyawëty xejykyukëjxëpës yowë.

¹⁷ ¿Wi'ix ënät nnamëëtmëtya'akëty, ëjts ka'apës näjyawëty nmëkëty, tëëjës nxejykyukëxë?

¹⁸ Ja mëti'ipë jëtu'un këxë'kpën tä naaxwiinyëtë ja'ayën ënätës jatëkok të xytyony, etsës të xymyo'oy ja mëk'ajtën jatëkok

¹⁹ etsës të xy'ënëëmë: Këtii mtsë'ëkë ets këtii mmay mtajy. Yë Dios yë'ë mtsojkëp; jotmëk myajpaatëty ets këtii mkumay mkutajë. Tamës ënety jëtu'un xymyëmëtyä'äky, koos jatëkok të näjyawëty nmëkpëky, etsës të n'ënëëmë: Wintsën, mëëtmëtyakës, tëëjës jatëkok yë nmëk'ajtën xymyo'oy.

²⁰ Ënätës të xy'ënëëmë: ¿Mnija'ap wi'ix ko të niminyë? Jä'ä koos tsiptunaanpës jatëkok mëët yë tsajpjotmëtë kukäjpxy mëti'ipë pyutëjkëpën yë Persië kajpn. E koos ënety ntsiptuunta'ay mëët yë'ë, tääts myina'any yë tsajpjotmëtë kukäjpxy mëti'ipë pyutëjkëpën yë Grecië kajpn.

²¹ E tyam yë'ë yam ntuk'ëwaanëjäämpy mëti'ipë jap miinpën kuja'ay ma ja nokyën mëti'ipë myë'ijtypyën ja tëyajtën: Ëjts maas yam ntsiptunyën yi'iyës xypyutëjkëp yë Miguel, yë tsajpjotmëtë kukäjpxy mëti'ipë nyikopk'ajtypyën yë Israel kajpn.