Colosenses 4 - Biblia Dc en Mixe de Quetzaltepec

¹ Ets miitsëty, wintsënëty wintajëty, yajxon mja'ay'atëty; najtsjawën'äämpy mja'ay'atëty mëët ja mtuunpëtëjkëty. Ja'amyätstë ko miitsëty tap tu'uk ja mwintsënëty tsajpjotm.

² Xëmë ja Dios xyjyä'ämyätstëty. Wijy kejy mnäyaj'itëtëty ets mo'otë ja Dios ja kukajpxën.

³ Tuknija'amyäjtsëtëkës ja Dios ets ja në'ë tu'u y'ëwa'atsëty ets nkajpxwa'kxëtyës ja Kristë ja y'aaw y'ayuk, mëti'ipë ijty kayajnija'apën ets mëti'ipës tsumy nku'ijtëpën.

⁴ Tuknija'amyäjtsëtëkës ja Dios etsës nnimëtya'akëty wa'ats ijxtëm myëpaatëtyën.

⁵ Oy mja'ay'atëty mëët ja ja'ay mëti'ipë ka'ap Kristë tmëpëktën. Yajtuunk'paatë ja xëëw.

⁶ Tsuj ets jotkujk mkajpxtëty mmëtya'aktëty ets mjatëp wi'ix tu'ukjaty ja'ay xy'ëtsowtëtyën.

Ko Pablo ja kajpxpo'kxën tjaakyajnaxy

⁷ Ja mmëku'uk'ajtëm Tiquico, mëti'ipë ni'ik yajmëku'ukja'apën ets oy tsuj tmëtuny ja Wintsën, yë'ë mtuk'ëwa'anxëtëp wi'ixës yam nyajpaatyën.

⁸ Paaty ntuknikäxtë ets mtuk'ëwa'anxëtëty wi'ixës yamën ets myajjotkujk'atëtëty.

⁹ Näy tam mëët nyijkxy ja nmëku'uk'ajtëm Onésimo, ja nmëëtmëpëjkpë'ajtëm mëti'ipë ni'ik yajmëku'ukja'apën ets oy tmëtuny ja Kristë. Yë'ë mtukmëmëtya'akëtëp tii yam tuunëp jajtëp.

¹⁰ Aristarco, nmëku'ukës nmëpujxntëjk ja'ayës, yë'ë mtuknikäjxëtëp ja kajpxpo'kxën; näjyëtu'un ja Marcos, Bernabé myëku'uk. Tëë myajtuk'ëwaanëtë pën Marcos'ajtpën. Yë'ë mninëjkxëtëp, kupëktë yajxon.

¹¹ Näyjyëtu'un ja Jesús mkajpxpo'kxëtë, mëti'ipë yajtijpën Wa'ats ja'ay. Yi'iyë ya'atë jutiis ja'ayëty mëpëjktëp mëti'ipës mëët ntuntën ma ja Dios ja kyutujktaknën ets yë'ëjës të xyajjotkujk'atë.

¹² Mtuknikäjxëtëp näjyëtu'un ja kajpxpo'kxën ja Epafras, mëti'ipë ja Jesukristë myëtuumpyën, miits yë mja'ayëty. Xëmë yë'ë mninu'kxta'akëtë ko ja Dios tja'amyetsy ets oy m'ittëty ijxtëm ja Dios tsokyën.

¹³ Ëjts nija'apës ko mëk ja Epafras tyuny mëët miitskyëjxmëty, mëk mëmay mëtajtë näjyëtu'un mëti'ipë tsënaaytyëpën jam Laodicea ets Hierápolis.

¹⁴ Näy mkajpxpo'kxëtëp ja Lucas, mëti'ipë yajtsooypyäjtpën ets näjyëtu'un ja Demas.

¹⁵ Kajpxpo'kxtë ja nmëku'uk'ajtëm mëti'ipë tsënaaytyëpën jam Laodicea, kajpxpo'kxtë ja Ninfa mëët ja mëpëjkpëtëjk mëti'ipë ye'eymyujktëpën jam ma tyëjkën.

¹⁶ Ko miits ya'atë noky xykyajpxta'atëty ets xytyuknikäxtëty yë mëpëjkpëtëjk jampë Laodicea yajpaatën; ets tkajpxtëty näjyëtu'un. E mëti'ipë yë'ë kyäjxtëpën ma miitsëtyën mkajpxtëp näjyëtu'un.

¹⁷ Tukmëmëtya'aktë ya'atë yë Arquipo: Kä'pxy xypyatunëty ja mtuunk ijxtëm ja Wintsën të mtuknipëkyën.

¹⁸ Ëjts Pablo, ëjts yam kë'ëm njääpy ya'atë kajpxpo'kxën ets miits ntuknijayëtë. Xyjä'ämyätstëpës koos yam tsumy n'ity. Dios mkënu'kxëtëp.