Colosenses 2 - Biblia Dc en Mixe de Quetzaltepec

¹ Yë'ës ntsojkpy ets miits xynyijawëtëty ko mëk yam nnitsiptuntë ets näjyëtu'un mëti'ipë tsënaaytyëpën jam Laodicea ets ni'ëmukë ja wiinkëtypë mëti'ipë ka'ap xy'ixy'atës.

² Paatyës jëtu'un ntuny jä'äkyëjxm koos ntsoky ets ni'ëmukë mjotmëkta'aktëty ets m'itëty tu'ukyë mëët ja nitsokën ets xymyëët'atëty kä'pxy ja wijyajtën kejyajtën, jëtu'unts xyjyä'äkyukëtëty xymyëtoowkukëtëty ja Dios ja jyä'ä mëti'ipë ijty kayajnija'apën, yë'ë jëtu'un ja Kristë.

³ Kristë mëët yajnijawë tu'kë'ëyë ja wijyajtën kejyajtën ets ja'aykyujkën mëtoowkujkën.

⁴ Paaty miits ya'atë ntuk'ëwaanëtë ets ka'ap pën mwin'ëënëtëty mëët ja aaw ayuk mëti'ipë oy tsuj je'eyë yajmëtoopën.

⁵ Oyës kë'ëm nkatimjam'aty, tamës ja nja'awën y'ity ma miitsëtyën ets jotkujkës näjyawëtëty jä'ä ko oy yajxon xytyuntë ets ko tu'ukyë xymyëpëktë ja Kristë.

Jempyë juukyajtën ma Kristën

⁶ Paaty miitsëty, ko tëë ja Wintsën Jesukristë xykyupëktë, jëtu'un mjuuky'attëty ijxtëm yë'ë t'oyjawën.

⁷ Ijxtëm tu'uk ja kepy tyikts në'p yajpaatyën, jëtu'un miits mëk yajpaatë tu'ukyë mëët ja Jesukristë. Jëtu'un ijxtëm myajtukni''ijxëtën ets xëmë ja Dios xykyukajpxëtëty.

⁸ Näkyëwent'atëtë këtiipë mwin'ëënëtëty mëti'ipë yaj'ijxpëjktëpën tëkatsy ets je'eyë mwin'ëënëtë; jä'ä ko yë'ëjëty ka'ap ja wyinma'any jam tpëjkta'aktë ma ja Kristën, jam ja wyinma'any tpëjkta'aktë ma ja ja'ay ja jyot wyinma'anyëtyën ets ma ja mëti'ipë mëj këjxm ijtëpën naaxwiiny.

⁹ Ja'ayën ja Kristë ojts y'awinpity ets yaj'ixëty ja Dios ma yë'ëjën,

¹⁰ ets yë'ë ko tu'ukyë m'itë mëët ja Kristë, jam ja Dios y'ity ma miitsëtyën. Ja Kristë nyikëpajk'ajtääpy tu'kë'ëyë mëti'ipë myëët'ajtëp ja mëk'ajtën ets ja kuttujkën.

¹¹ Ko mëët ja Kristë m'itë tu'ukyë, tëë ja tpëjktä'äky ja ijxwë'ëmën ma miitsëtyën këtiipë yë'ë xytyuntëty mëti'ipë mkë'ëm mmaaytyëp mtajtëpën; ka'ap yë'ëjëty jëtu'unpë ja ijxwë'ëmën mëti'ipë yajpatpën ma ja jutiis ja'ayëtyën, ijxtëm ko yajnatsujk'ëwtity ja ye'etyëjk'ajtënëty.

¹² Jëtu'un miitsëty ijxtëm ja Kristë jeexyë mëët të mnaaxtëkëtën nëëpäjtënkyëjxm ets tëë mëët mjuukpyëktë jä'ä ko të xymyëpëktë ja Dios ja myëk'ajtën, ja Dios mëti'ipë Kristë yajjuukpyëjkën.

¹³ Miitsëty, ooky ijty tëëyëp myajpaatë ma Tiosën mëët ko ka'ap xy'ëxmatstë ja pokytyu'unën, e tyam tëë ja Dios mmo'ojëtë ja juukyajtën mëët yë Kristë, mëti'ipë të tme'kxyën tëkokyë yë mpoky'ajtëmë.

¹⁴ Tëë ja Dios tjëpëky ja ënä'ämën mëti'ipë ja Moisés yajmooyën ets tyajnikëxë'ëky ja npoky'ajtëmë mëti'ipë jeexyë nkupäjtëmën. Jëtu'un ojts tyajkëxy tyajnaxy ja tsip ko ojts yajmëjwojpety kruutskëjxm.

¹⁵ Kristë mëët yë Dios ojts tpëjkëtë ja kuttujkën yaapë naaxwiiny y'ënä'ämtën ets yajkutuktën ets ojts naxym tyajnajxtë tsumpyë matsypyën ko ojts yë Kristë myëtä'äky.

Jotmay'atë ja Tios ja jyä'ä tsajpjotmëpë

¹⁶ Këtii xymyëjpëjkta'aktëty ko ja'ay mnikajpx mnimëtya'akëtëty pën tii mkaaytyëp mjë'kxtëp, mëti'ipë xëëw m'ëmaay'ajtëp mka'ëmaay'ajtëp, pën yë'ë jempyo'o ëkë po'kxënxëëw.

¹⁷ Ya'atë, ko ijty winë yaj'amaay'äty, jä'ä ko ka'anëm ënety ja Kristë myinyëm; tyam nmëët'ajtënëp ja tëyajtën ko tëë ja Kristë myiny.

¹⁸ Ka'ap mëpaat mtuk'ëxmatsëtë Kristë mëti'ipë nätyijëtëp yujy tëtä'äky ets mëti'ipë wyintsë'këtëp ja tsajpjotmëtë kukäjpxy; jä'ä ko yë'ëjëty yë'ë kyajpxtëp mëti'ipë ka'ap nijëna'a t'ixtën, yi'iyë nätyukmëjpëjktakëtëp ja wyinma'anyëty.

¹⁹ Ka'ap mëët y'itë ja Kristë, mëti'ipë nyikopk'ajtypyën ja mëpëjkpëtëjk ets mëti'ipë yajwinpejtypyën ja mëpëjkën ko n'ijtmëty mëët ja Kristë ijxtëm tu'uk ja ni'kx kopkën ijxtëm ja Dios tsokyën.

²⁰ Ko ja Kristë të xymyëpëktë, jëtu'un tpaaty ijxtëm jeexyë miits të m'ooktën mëët ja Kristë, ka'ap m'ëk'ijnëtë ma ja ku'oypyën mëti'ipë yaa naaxwiinyëtën. ¿E wi'ix ko ënät je'eyëm mjuuky'ajt'ëtë'ëtstë ijxtëm ja ja'ayëtyën mëti'ipë ka'ap ja Dios tmëpëktën?

²¹ ijxtëm ko y'ënä'ämtën jëtu'un y'ëna'antë: Këtii tääpë xytyonëty, këtii tääpë xyjyë'kxëty, këtii tääpë xykyoonë'ëkëty.

²² Ya'atë mëti'ipë ni'ik nyi'ënä'ämëtëp këtiipë yajkayëty yajjë'kxëty, tëë ja Dios tuknipëjktaakë ets wyintëkoyëty ko yajkay yajjë'kxy.

²³ Jëtu'un ya'atë ënä'ämën yajmëtoy mëtëy yowë, jä'ä ko jëtu'un tni'ënä'ämëtë ijxtëm jeexyë ja Dios yajmëjjaw yajjaantyjäwën, yujy tëtä'äky nyäpyëjkta'akëtë ko tëytyun tsaatyuntë ja nyi'kx kyopkëty, je'eyëp ko nimaa kyatuny jëtu'unpë ets yajmëmëta'akëty ja ëxëëk atsojkën mëti'ipë yajtuunpën mëët ja kë'ëmwinma'any.