Cantares 8 - Biblia Dc en Mixe de Quetzaltepec

To'oxytyëjk

¹ Njatsojkpyës jeexyë mijts nmëkä'äx'aty ets jeexyë nän yë'ë të xymyuuky yë tsi'tsk mëti'ipës të nmuukyën. Ets jeexyë muum npaaty tu'ujoty jotkujk jeexyë ntsu'kxy ets jëtu'un jeexyë ka'ap pën xytyukxi'ikyës;

² jyëkyejpy jeexyë nwoownëjkxy maas yë ntaak yë tyëjkën ets jap mtëkëty ets xyaj'ijxpëkëtyës. Ets ntuk'uukëty yë oypyë tsatym nyëë mëti'ipë tëë nyimaanaxyën, ets ja oypyë granadas nëë.

³ Wä'än yë y'anajnykyë'ë tpëjktä'äky maas yë najts'uunën ets y'a'oykyë'ë yë'ë xytyukmënenyës.

Ye'eytyëjk

⁴ Tyam n'amëtow npëjktsowtë miitsëty to'oxytyëjktëjkëty, mëti'ipë jam Jerusalén kukajpnajtëpën, ko këtii xyuxtëty yë to'oxytyëjk mëti'ipës ntsojkpyën. Ixmatstë wä'än tma'ay, kë'ëm wyijëty jëna'a tuknipëjktaakë.

Mëtëtujk ëy Ma nimay y'ëëw'ëtsowtën

⁵ ¿Pën tääpë to'oxytyëjk mëti'ipë jam të'ëts'itjotm miinpën ets jam kyëx'ënëny ma kyejkyën yë ye'etyëjk mëti'ipë tsyojkpyën jya'apën? Ma mansaan kepypya'tkën ma ënety mma'ayën jam të nyuxy, jam ma mtaak pyëjkë y'ijxën ko ënety mijts mëxu'unk'ata'any ets ma mëxu'unk'ajtyën.

Ye'eytyëjk To'oxytyëjk

⁶ Xyaj'itëpës xëmë ma mjot mwinma'anyën, yaj'ijtkës xëmë ma mkë'ëpa'tkën. Jä'ä ko yë tsojkën ja'awën ka'ap jyëjpkëxy jyëjptuky; yë nätsyok näjyawë xëmë mëpaat juun nyäpyëjktä'äkyë. Yë tsojkën ja'awën Dios yë yäjkpy.

⁷ Yë tsojkën ja'awën ka'ap tjëkyepy kyutëkoyëty oy jënu'un nëëkom jyanaxëty; oy jënu'un yë mëjnëë jyanikoompätëtëty. Ko pën y'ënaanpëty ko tjuyä'äny yë tsojkën ja'awën je'eyë nëjkx yajtukxi'iky.

Ma nimay y'ëëw'ëtsowtën

⁸ Yë to'oxytyëjk mëti'ipës nmëkä'äx'ajtëpën ka'ap tii tyi'tsk. ¿Tiijës ntuunta'aktëp ko ënety pën y'amëtoyë?

⁹ Ko jeexyë y'ëkjëtu'unëty tä yë yenypyotsyën mëti'ipë kujkyë tënääpyën, n'oytyuunëtëpës jeexyë yë nyi'apojtsë'ëk jam këjxm ets aakyë'ë jeexyë tuunpë yë poop pujxn; ko jeexyë y'ëkjëtu'unëty tä yë tëjk akajën yë'ë jeexyë yajtuk'oytyuunp yë ajë kepy.

To'oxytyëjk

¹⁰ Ëjts jëtu'unës tä tu'uk napotsën ets ntsi'tskës jëtu'un tä tu'uk yenypyotsyën mëti'ipë kujkyë tënääpyën. Paaty yë ye'etyëjk oyës xy'ixy ets tëëjës npaaty yë xoontakën.

¹¹ Jam ijty yë Salomón tmëëtëty tu'uk yë tsatsymkyam jam Baal-hamon. Yë'ë ojts tuknipëky yë tyuunpëtëjk ets tkëwent'atëty, e ko tpëjkë'ëk tuunë'ëktë ja pëjktä'äky tääts ja tyuunpë këëkjä'ä tkë'ëyaktë ja poop pujxn meeny këëktu'uk miljaty.

¹² Yë tu'kmilpë yë poop pujxn meeny mijts yë mjä'ä, Salomón, e yë mäjtsk mëko'pxpë yë'ë jyä'ä'atëp yë këwent'ajtpëtëjkëty; ëjts kë'ëmës yë ntsatsym kam nkëwent'aty.

Ye'eytyëjk

¹³ Nmëtowäämpyës yë m'aaw m'ayuk, mijts to'oxytyëjk mëti'ipë mnikutujkpë'ajtypyën yë pëjykyam. Yë ja'ayëty mëti'ipë mëët oy nämyä'äyëmën yë'ë myëtowantëp.

To'oxytyëjk

¹⁴ Pëyë'ëk mijts ye'etyëjk, mëti'ipës ntsojkpy nja'apën, pëyë'ëk tä jëtyu'ujën, tä yë jëtyu'u u'unkën jam kopkkëjxm ma oy pya'akxuuky pya'ak jokyën.