Cantares 7 - Biblia Dc en Mixe de Quetzaltepec

Ye'eytyëjk

¹ Janty oy yë mteky yaj'ixy ma mkë'ëkën, mijts yajkutujkpë nyëëx. Yë m'ixpajk tsuj kyëxë'ëky tä jeexyë pu'ts pujxn mëët y'oytyunyëtyën, mëti'ipë wijyjyä'äytyëjk të tyajkojtën.

² Yë mputsk jëtu'un tä tu'uk a'ukënën mëti'ipë xëmë tuktuky ijtpën mëët yë uuky, tsatym nyëë tëëpë nyimaanaxyën; yë mox jëtu'un tä apëjkënën ma tsajpmok nyipetyën ets yë'ë mëët nyakoj'ëwtityëty yë pëjy.

³ Yë mtsi'tsk jëtu'un tä mäjtsk yë paxën, mëti'ipë nimäjtsk të pyi'k'atën.

⁴ Yë myo'kn jëtu'un tä yenypyotsyën yujkpotyëtyën mëti'ipë mëët y'oytyunyëtyën yë elefantë pajk; jëtu'un yë mwiin mäjtsk yajpaaty tä yë nëë apojtsë'ëkyën mäjtskpë jam y'ityën Hesbón, wiinkonpë yajpaatyën ma yajnitëkën yë Bat-rabim; yë mjëjp jëtu'un tä yenypyotsyën yujkpotyëtyën jampë Líbano yajpaatyën, mëti'ipë najts'ijxëpën Damaskë.

⁵ Yë mkëpajk, mëti'ipë yajpatpën ma mnini'kx kopkën, jëtu'un yë'ë tä Carmel kopkën; yë mwaay jëtu'un kyëxë'ëky tä yë tsapts'yëk piityën, ma tu'uk yë yajkutujkpë të jyänën.

⁶ Mijts to'oxytyëjk, mëti'ipës mëk ntsojkpy nja'apën, janty'oy mkëxë'ëky janty tsuj m'ixëty.

⁷ Jëtu'un mtänë tëywyijtsnë tä tu'uk kumkepyën; ets mtsi'tsk jëtu'un jam y'ity mkatsywyiiny tä yë kumyo'k u'unkën.

⁸ Ja ënaanpës jam mpäta'anyës ma tääpë tëëxykyepyën etsës jeexyë ëjts njä'ä'aty. Ets mtsi'tsk y'awinpitëty tä yë tsatym tsya'amën tu'kxe'enty; ets mxejy xyuukëty tä yë mansaan tsa'amën;

⁹ ets mpa'kxwiin, jëtu'un jyawëty tä yë uukyën, tä yë tsatym nyëëjën tëëpë nyimaanaxyën mëti'ipë tyuktëjkëtya'ajëpën yë aaw tëts.

To'oxytyëjk

¹⁰ Ëjts jëtu'unës të naxy tä tu'uk yë tsojkën ja'awënën mëti'ipë yë ye'etyëjk, mëti'ipës ntsojkpyën y'oy'ijxypyën.

¹¹ Mëta'ak mijts ye'etyëjk, mëti'ipës ntsojkpy nja'apën, tsojk nja'amëmë kamjotm tu'ujotm. Jam yë tsuu nyajnajxmëty kamjotm pëjy jotm.

¹² Jëpom nja'amëty ma tsatym kyamën ets n'ijxmëty pën tëë myuxy, pën jam kujk pyëtsimy yë y'ääy u'unk, pën jam mëti'ipë pëjpën ets pën jam mëti'ipë tëë tyëëm'ajtë'ëkyën. Jam nmo'ojëty ëjts yë ntsojkën nja'awën.

¹³ Yë'ë pa'akxu'kp pa'ak jojkp yë mandrágoras. Jam tëjk'ëkë'ëm tam jyätyë yë aaytyëëm ujtstëëm wä'än tmëti'ipëty; tam mëti'ipë tëë xyëëw'antë'ëtsyën ets tam mëti'ipë jemtyukyën, tamës mpëjkë'ëky mëti'ipë mijts nmo'ojäämpyën, mijts ye'etyëjk mëti'ipës ntsojkpy nja'apën.