Cantares 6 - Biblia Dc en Mixe de Quetzaltepec

Ma nimay y'ëëw'ëtsowtën

¹ ¿Ma ënät të nyijkxy ja ye'etyëjk mëti'ipë mtsojkpy mja'apën, to'oxytyëjk oypyë tsujpë? ¿Ma ënät të nyijkxy? Oy mpajamtëty ets n'ixtä'ämyëty.

Ja to'oxytyëjk

² Yë ye'etyëjk mëti'ipës ntsojkpy nja'apën jam të nyijkxy pëjykyamjotm, ma ja pëjykyamën mëti'ipë pa'akpëjy kyamjotm xu'kp jojkpën, yë'ë jam yaj'ojkpy yë kyupixyny ets yë'ë jam tyukäämpy yë pëjy.

³ Ëjts xyjyä'ä'ajtpës yë ye'etyëjk mëti'ipës ntsojkpy nja'apën ets yë'ëjës njä'ä'ajtyp. Jam yë kyupixyny tkëwent'aty, pëjy'akujky.

Mëmëkoxk ëy Yë ye'etyëjk

⁴ Mijts to'oxytyëjk, mëti'ipës ntsojkpy nja'apën, m'oy mtsuj mijts ets oytyukxootaknë mijts tä yë Tirsá kajpnën ets Jerusalén kajpnën; tsip jeky myajwintänëty ijxtëm yë tsiptuunpëtëjkëtyën ko waatswitsy ye'eytyë.

⁵ Këtiis nëkoo xywyintë'kxy, koos xywyintë'kxy ka'ap jeky nwintë'kxa'any. Jëtu'un yë mwaay pyojyu'kxy tä yë kupixyny kyëpijp ëwtitën jam ma Galaad kopkën.

⁶ Oyëty yë m'aaw mtës, tu'knax, jëtu'un tä yë kupixynyën oyëtypë mëti'ipë të tsyiiwta'atën ets jëjp'ixy y'ijnëtë ets yajnikääpa'antë.

⁷ Jëtu'un yë m'apënuuky tä mäjtsk xixën yë granadas tsa'amën mëti'ipë yu'utsy yajpatpën ma mwiin yä'äpën.

⁸ Nitëkë'px yë to'oxytyëjk myäy'atë mëti'ipë yajkutujktëpën, nimajkta'px mëti'ipë putu'unëtyëpën ets nimay mëti'ipë pyajëtitëpën yë to'oxytyëjk mëti'ipë yajkutujktëpën,

⁹ e yë to'oxytyëjk mëti'ipës ntsojkpy nja'apën tu'uk je'eyë; tu'uk je'eyë ja yajkutujkpë ja nyëëx mëti'ipë të yajtsojkën'atyën mëti'ipë ojts ja tyaak yajmëxu'unk'atyën. Ko yë myëto'oxy'ëna'k y'ixyë janty oyjya'awëyëp;; yë to'oxytyëjktëjk mëti'ipë yajkutujktëpën ets mëti'ipë pujëtu'unëtyëpën janty tsojk janty ja'awëyëp.

Ma nimay y'ëëw'ëtsowtën

¹⁰ ¿Pën tääpë ja'ay mëti'ipë jëtu'un ijxwo'ompën tä xëëw pyëtsimyën jopyëp? Jëtu'un y'oyëty tä po'ojën, jëtu'un tyi'kxy tä xëëwën, tsip jeky myajwintänëty ijxtëm yë tsiptuunpëtëjkëtyën ko waatswitsy ye'eytyë.

To'oxytyëjk

¹¹ Tëës jam n'oty ma nuez kepy yukën, yë'ëjës ojts të n'ixy wi'ix tsyuxkëtyën yë aay ujts jam nëëwokjotm; yë'ëjës të nja'ixa'any pën kujk myuxy yë tsatym tyëëmp jam kamjotm ets pën jam mëti'ipë pëjpën.

¹² Ka'apës të n'ëk'ijxnë jä'ä ko yë'ëjës mëët të nyäpyäätyë yë ye'etyëjk mëti'ipës ntsojkpy nja'apën etsës jam të xyapety ma kyepy wyintëkäämpën.

Ma nimay y'ëëw ëtsowtën

¹³ Wimpit, Sulam to'oxytyëjk, winpit. Wimpit mijts n'ixantëp. ¿Tii m'ixantëp ma Sulam to'oxytyëjkën? Yë ety puty, jëtu'unpë tä jamën ma y'ijta'aktën mëti'ipë tsiptuuntëpën.