Cantares 4 - Biblia Dc en Mixe de Quetzaltepec

Ja ye'etyëjk mëti'ipë mëk ja tyo'oxytyëjk tsokyën Ja ye'etyëjk

¹ Janty oy m'ixëty mijts to'oxytyëjk, mëti'ipës ntsojkpy nja'apën. Janty oy m'ixëty. Jëtu'un yë mwiin yaj'ixy tä mäjtsk yë pakën. Jëtu'un yë mwiin yaj'ixy tä mäjtsk yë pakën mëti'ipë jap ma wyinkuyä'äpën yu'utsy ijtpën; yë mwaay jëtu'un tä yë tsajppax u'unk jam myäy jyënäkyën ma Galaad kopkën.

² Oyëty yë m'aaw mtëts, tu'knax, jëtu'un tä yë kupixynyën oyëtypë mëti'ipë të tsyiiwta'atën ets jëjp'ixy y'ijnëtë ets yajnikääpa'antë.

³ Tsapts yë m'atääm tä yë tsapts piityën ets oy mkäjpxy mëtyä'äky. Yë m'apënuuky jëtu'un tä mäjtsk xixën yë granadë tsa'amën mëti'ipë jap yu'utsy ijtpën ma mwinyä'äpën.

⁴ Yë myo'kn jëtu'un tä ye'nypyotsyën mëti'ipë kujkyë tënääpyën mëti'ipë David ojts yajtuknikojën. Ma tkëxjäntën yë y'akëëytyukëty yë tsiptuunpëtëjkëty jotmëkëtypë.

⁵ Yë mtsi'tsk jëtu'un tä mäjtsk yë jëtyu'u u'unkën, mëti'ipë nimäjtsk të pyi'k'atën ets pëjjyoty y'oktë.

⁶ Wä'än t'ëkxëënyë, wä'än t'ëkjajtä'äky, ëjts jamës nëjkxy ma mirrë kopkën, ma poomkopkën.

⁷ Janty mkëxë'ëky mijts to'oxytyëjk, mëti'ipës ntsojkpy nja'apën; tyimtso'ontä'äky ma mtekyën ets tyimkëpety ma mkëpajkën. Ma mijtsën nitii ma'at kyayajpaaty.

⁸ Tsojk ntso'onëmë yaa Líbano, to'oxytyëjk mëti'ipës mpëkäämpyën; tsojk yaa Líbano ntso'onëmë. Najts'ixë yë joyjyot ma Amaná kopkën, jam m'ijxtsoonëty ma Senir kopkën ets jampaat ma Hermón kopkën, ma kaa aankën, ma kuuyxyëpëjy aankën.

⁹ Tëës yë njot nja'awën xypyëjkë, mijts to'oxytyëjk, mëti'ipës mpëkäämpyën; tëëjës yë njot nja'awën xypyëjkë koos të xy'ixy, mëët yë mpiity mëti'ipë myo'ktëy'äjtypyën.

¹⁰ Janty oy yajjawë mwiin mjëjp koos ntsu'kxy mijts to'oxytyëjk, mëti'ipës mpëkäämpyën. Jëtu'un yë mwiin mjëjp pya'akëty koos ntsu'kxy tä yë tsatym nyëëjën mëti'ipë tëë nyimaanaxyën ets ni'ik y'oyëty yë tsooy mëti'ipë mnätyukja'axëpën këtiinëm jyëtu'unëty yë tsooy oypyë pya'akxuuktën.

¹¹ Mijts to'oxytyëjk, mëti'ipës mpëkäämpyën, ma mwiin m'aaw jam yë uuxpa'ak myuuty. Jëtu'un yajjawë uuxpa'ak ets tsi'tsknëë yowë jap pëtsëëmp myä'änpa'tkë'p. Jëtu'un tä yë Líbano it pya'akxuukyën jëtu'un pya'akxuuky yë mwit.

¹² Mijts to'oxytyëjk, mëti'ipës mpëkäämpyën, ëtuky mijts myajpaaty, jëtu'un ëtuky m'ity tä yë nëëkopk ëtuky y'ityën, tä yë nëëkopkën mëti'ipë ku'ëtsa'ayën;

¹³ tä pëjykyamën ma myäymyuxtën yë granados mëti'ipë xu'kxëtyën pa'akëtyën; tä pëjykyamën ma jyam'atyën yë alhenyë pëjy,

¹⁴ tä yë nardos ets azafrán pëjyën, tä yë waxkën ets tä yë canelën ets tä yë poopkepyën ets kepy mëti'ipë pa'akxu'ktëpën, tä yë mirrën ets tä yë áloe ujtsën; tä tu'kë'ëyë yë aay ujtsën mëti'ipë ja'ay yaj'onkojtëpën mëti'ipë pa'akxu'kpën.

¹⁵ Mëti'ipë yë pëjykyam nyëëkopk'ajtypyën yë'ë mëti'ipë jam tso'onpën ma Líbano y'itjotmën.

¹⁶ Mijts poj mëti'ipë anëkëjxytsyow tso'onpën ëkwij. Mijts poj mëti'ipë ëpa'tkë'ëytsyow tso'onpën Min yaatsow. Pojtë jam maas yë mpëjykyamën ets xyajpojwa'kxtëty yë pa'akxu'k pa'ak jojkën. Min mijts ye'etyëjk, mëti'ipës ntsojkpy nja'apën, ma mpëjykyamën ets xyjyë'kxëty mëti'ipë jam mkamjotm ijtp wintëëpën.