Cantares 3 - Biblia Dc en Mixe de Quetzaltepec

Ma ja to'oxytyëjk tninëjkxyën ja nyiye'etyëjk

¹ Maas yë nmaapäjnën, tëëjës nja'ijxta'ay ja ye'etyëjk mëti'ipës ntsojkpy nja'apën. Tëës nja'ixta'ay ets ka'apës të npaaty.

² Ënätës të mpëtë'ëky etsës të ntukjëtijtëtyä'äy yë naax kajpn nja'ixta'ayës ja mëti'ipës yë njuukyajtën tsyojkpy jya'apën, tëëjës nja'ixta'ay tu'ujoty, tëëjës nja'ixta'ay ma ja'ay y'u'unyëtë pyo'kxtën. Tëës nja'ixtaaytyä'äy ka'apës të npaaty.

³ Tëës njayajtëy mëti'ipë këwent'ajtëpën yë naax kajpn: ¿Këtii të xy'ixtë yë ye'etyëjk mëti'ipës yë njuukyajtën tsyojkën'ajtypyënë?

⁴ Wäänës ënety të nmëjëkämkä'äktë koos mëët të nyäpyäätyë ja ye'etyëjk mëti'ipës ja njuukyajtën tsyojkën'ajtypyën. Täätsës të nmatsy kyë'ëkëjxy etsës të nwoownëjkxy ma ntaakës yë jyëën tyëjkën.

Yë ye'etyëjk

⁵ Tyam n'amëtow npëjktsowtë miitsëty to'oxytyëjktëjkëty, mëti'ipë jam Jerusalén kukajpnajtëpën, ko këtii xyuxtëty yë to'oxytyëjk mëti'ipës ntsojkpyën. Ixmatstë wä'än tma'ay, kë'ëm wyijëty jëna'a tuknipëjktaakë.

Mëtëkëëk ëypyë Ma nimay y'ëëw'ëtsowtën

⁶ ¿Pën ximpë myinyën të'ëts'itjotm ets jëtu'un yaj'ixy jokjoty yowë myiny, yë'ë yowë winjojkp yë on mëti'ipë pa'akxu'kpën ets jëtu'un jyoky tä yë poomën ets tä jyokyën ko yajno'oky yë on wä'än timy myëti'ipëty mëti'ipë pa'akxu'kpën?

⁷ Yë'ë Salomón yë kyepy wintëkäämpë nikojpyë. Yë'ë paye'eyëp nitëkë'px yë tsyiptuunpëtëjk mëti'ipë jotmëkëtyën jampë yajpaatën ma Israel kajpnën;

⁸ Aak tyukjajtëp wi'ix yë tëypyujxn tyajtuntëty ets tsipt'ixëty; aaktam tmëët'atë yë tëypyujxn ma wyëënëtyën ko ajotkumonë koots tyuna'anëty.

⁹ Tëë yë yajkutujkpë Salomón tyaj'oyë tu'uk yë myaapäjn aakyë'ë të tuk'oytyuny yë oyëtypë kepy mëti'ipë jam Líbano tso'onpën.

¹⁰ Aakyë'ë poop pujxn tyeky'äjtyp; ets jyëxk yë'ë pu'ts pujxn; e yë nyi'ënyääypyäjn yë'ë oywyit, uky tyapts y'ixëty; jap itkujky yë'ë mëët y'oytyunyëty yë tsojkën ja'awën mëti'ipë yë to'oxytyëjkëty të t'oytyuntën jampë Jerusalén kyukajpn'atën.

¹¹ Miitsëty to'oxytyëjktëjkëty mëti'ipë yajpatëpën ma Jerusalén kajpnën, pëtsëmtë ets xy'ixtëty yë yajkutujkpë Salomón. Yë'ë myënëjkxyp yë kyujän mëti'ipë y'oytyuunën yë tyaak ko ënety pyiky y'uuky, ma ënety ja xyoontakën tpaatyën.