Apocalipsis 9 - Biblia Dc en Mixe de Quetzaltepec

¹ Ko ja mëmëkoxkpë tsajpjotmëtë kukäjpxy tukxuxy ja pujxnxuxn etsës n'ijxy ja matsa'a mëti'ipë ënety të kyuka'anaxyën naaxwiiny ets yajmooy ja ëwatsn, mëti'ipë nyijä'ä'ajtypyën ja mëjjut mëti'ipë nëjkxpën jap ëyoowtaknjoty.

² Tääts tyaj'ëwatsy ja mëjjut. Japts ja jok jyänty pyëtsimy ijxtëm jeexyë mëj tsijtskjotypyën ets ja jok tyajwinkootsëy ja xëëw ets ja tsajp.

³ Jap jokjoty ja maymyu'u pyëtsëëmtë ets ja naaxwiinyëtë twinye'eyëtyääytyë, ojts yajmo'otë ja mëk'ajtën ijxtëm ja kä'pyën ets ja naaxwiinyëtë ja'ay tyajtsëtyutëty.

⁴ Ka'ap yë'ëjëty të yajtuknikäxtë ets ja aay kepy tyajkwintëkoytyëty, yi'iyë të yajtuknipëktë tsaatsy tyuntëty mëti'ipë ja Dios ja tsya'a kyamëët'ajtëpën wyimpokëjxmëty.

⁵ Näy ka'ap të yajtuknipëktë ets ja ja'ay timyaj'ooktëty, je'eyë ko tyajtsëtyutëty ets ja ja'ay pyëk y'atonëtëty mëkoxk po'o, ijxtëm ja kä'py tyipyën.

⁶ May ja ja'ay tjatsoktëty ets jeexyë y'ooktë, je'eyëp ko ka'ap nëjkx pën y'ooky.

⁷ Ja mu'ujëty jëtu'un kyëxë'ëktë ijxtëm ja maykyëwaayën mëti'ipë yajmëtsoonaanpën tsiptuunpë. Kyëpajkëjxm tmëët'atë ijxtëm pu'ts pujxn kujupën. Jëtu'un ja wyiin jyëjp kyëxë'ëktë ijxtëm yë ja'ayën.

⁸ Ets ja wyääyëty jëtu'un yaj'ixy ijxtëm ja to'oxytyëjk ja wyääyëtyën; ets tyëtsëty jëtu'un ijxtëm yë kaatëtsën.

⁹ Aak tim pujxn nyi'ak'ajtëp. Ko kyääkjëtitë, mëk yajmëtoy ijxtëm pyëyi'ikyën may kyepy wintëkäämpë mëti'ipë ja kwaay pyajëtujtëpën ko nyëjkxtë tsiptuunpë.

¹⁰ Jëtu'un ja pyi'ixyëty ijxtëm ja kä'pyën, yë'ëts ja ja'ay tyukyaj'ëyoowtëp mëkoxk po'o.

¹¹ Jam tu'uk ja tsajpjotmëtë kukäjpxy mëti'ipë tso'onpën ëyoowtaknjotm, yë'ë nyiwintsën'ajtyp ja maymyu'u. Abadón yajtijy ma hebreo ayukën ets ma griego ayukën, Apolion.

¹² Tëë mëtu'uk ja ëyo'on nyäxy, mäjtsk jyaak tëkoy'äty.

¹³ Tääts ja mëtëtujkpë tsajpjotmëtë kukäjpxy tukxuxy ja pyujxn xuxn etsës nmëtooy ja ayuk ma ja pu'ts pujxn wintsë'këntyaknën, ma ja majktaxkpë ja tyäkën, mëti'ipë Dios wyintum yajpatpën.

¹⁴ Ets t'ënëmaay ja mëtëtujkpë ja tsajpjotmëtë kukäjpxy mëti'ipë ja pujxnxuxn myëët'ajtypyën: Mëkajë yë nimajktaxkpë ja tsajpjotmëtë kukäjpxy mëti'ipë kuwëënyëtyën ma ja Éufrates mëjnëëjën.

¹⁵ Ënet yajmëkäjëtyë ja nimajktaxkpë ja tsajpjotmëtë kukäjpxy ets tyaj'ooktëty tu'kpëkpyë, ma ja tëkëëk pëkpyë ja naaxwiinyëtë ja'ayëtyën. Tuknipëjktaakë ënety y'itë tääpë xëëw, jä'ä xëëw, jä'ä po'o, jä'ä jëmëjt.

¹⁶ Ets nmëtooyës ko nimäjtsk mëko'px millon nyimay'atë ja tsiptuunpëtëjkëty, aak këwaaykyëjxmëty.

¹⁷ Ko ja maykyëwaay n'ijxyës, aak tim pujxn kyätywyiin myëët'ajtëp mëti'ipë ja kwaay tyuk'u'unyäätyëpën. Tëkëëk wooxy kyëxë'ëky, ijxtëm jëënyä'änkën tsapts, tsu'unk ets pu'ts. Ja këwaaykyëpajkëty, jëtu'un kyëxë'ëky ijxtëm tu'uk yë kaajën; ets y'aawjotyëty jëtu'un jap pyëtsimy ijxtëm ja jëënyä'änkën, ijxtëm ja jokën ets ijxtëm ja nëë mëti'ipë no'kpën tsääpyën.

¹⁸ Jëtu'unts tu'kpëky ja tëkëëk pëkpyë naaxwiinyëtë ja'ay y'o'ktë mëët ja jëënyä'änk, jok ets ja azufre mëti'ipë kwaay y'aawjoty pëtsëëmpën.

¹⁹ Jä'ä ko jä'ä ja kwaay tyukmëk'ajtëp ja y'aaw ets ja pyi'ixy. Jëtu'un ja pyi'ixy kyëxë'ëktë ijxtëm tsa'anykyëpajkën. Yë'ë ja ja'ay tyukyajktsëtyujtëp.

²⁰ E ja ja'ay mëti'ipë jaakwë'ëmtën mëti'ipë jaakjuukyëtyën mëët ja jëtu'unpë ëyo'on, ka'ap ja t'ëxmajtstë ja y'ëxëëk winma'anyëty, wyintsë'ëkë ëtëtstëp ja ku'oypyë, ja awinax mëti'ipë pu'ts pujxn, poop pujxn, tsuxkpujxn, tsaa ets kepy mëët y'oytyunyëtyën; mëti'ipë ka'ap myëtoyën ets mëti'ipë ka'ap ye'eyën.

²¹ Ets ni yë'ë tka'ëxmajtstë ja yajja'ay'o'k, ja panajxk, ja ëxëëk juukyajtën ets ja mä'tsk.