Apocalipsis 7 - Biblia Dc en Mixe de Quetzaltepec

Israel ja'ayëty mëti'ipë ëxëëktuuntëpën

¹ Ko jëtu'un y'ëkjajty, ënätës n'ijxy ko ja tsajpjotmëtë kukäjpxy nimajktaxk tyänëtë jam taxk täk këjxm ma ja naaxwiinyëtë ja tyäkën. Jamts ja poj t'awa'ktuktë oymyëti'ipë pojëty, naaxwinkëjxypë, mejy wiinkëjxypyë ets ujtskëjxypë.

² Ojts wiinkpë tsajpjotmëtë kukäjpxy n'ijxyës ko myiny xëëwpëtsëmtsyow. Tap tmëëtëty ja Dios ja tsya'a, ja Dios mëti'ipë xëmëkyëjxm juukyajtpën ets mëk t'ënëmaay ja nimajktaxkpë ja tsajpjotmëtë kukäjpxy mëti'ipë ënety të yajmo'otën ja mëk'ajtën ets tyajkwintëkoytyëty ja naaxwiinyëtë ets ja mejy ets tiijaty jää'ajtpën naaxwiiny ets tiijaty jap mejyjotyën; jëtu'un y'ënäny:

³ Këtii wi'ix xynyatuntëty ja naaxwiinyëtë, ja mejy ets ja aay kepy. Koonëm ja Dios ja tyuunpëtëjk npëjktakmëty ja tsyä'äyën wyimpokëjxm, jäänëm xyajwintëkoytyëty.

⁴ Jëtu'un të nmëtoyës ko mëko'px ja wëxtyikxy majktaxk mil të yajtsa'atë ja Israel ja'ayëty, ja nimajkmäjtsk pëkpyë ja Israel ja y'u'unk y'ok.

⁵ Ets mil yajwinwijtstë ja Judá y'u'unk y'ok, nimajkmäjtsk mil ja Rubén ja y'u'unk y'ok, nimajkmäjtsk mil ja Gad ja y'u'unk y'ok,

⁶ nimajkmäjtsk mil ja Aser ja y'u'unk y'ok. Nimajkmäjtsk mil ja Neftalí ja y'u'unk y'ok, nimajkmäjtsk mil ja Manasés ja y'u'unk y'ok,

⁷ nimajkmäjtsk mil ja Simeón ja y'u'unk y'ok, nimajkmäjtsk mil ja Leví ja y'u'unk y'ok, nimajkmäjtsk mil ja Isacar ja y'u'unk y'ok,

⁸ nimajkmäjtsk mil ja Zabulón ja y'u'unk y'ok, nimajkmäjtsk mil ja José ja y'u'unk y'ok ets nän nimajkmäjtsk mil ja Benjamín ja y'u'unk y'ok.

Mayjyä'äy poop witxëpë

⁹ Ko jëtu'un y'ëkjajty, ënätës n'ijxy ja nimayjyä'äy, mëti'ipë tso'ontëpën wiink naax wiink kajpn ets wiink aaw wiink ayuk kyajpxtëp. Jam tyänëtë ma ja kutujktaknën ets ma ja Kupixynyën, nimay yajxon ka'ap tjëkyepy nmëtyo'owmëty. Poop xoxyëty, kum aay myënëjkxtëp.

¹⁰ Ni'ëmukë mëk y'ëna'antë: Yë Dios të xyajnitsokëmë, mëti'ipë u'unyääpyën jam ma kutujktaknën ets mëti'ipë yajtijpën Kupixyny U'unk.

¹¹ Jamts ja anklëstëjk na'ëwtity tyänëtë ma ja kutujktaknën, ma ja mëjja'ayëtyën ets ma ja nimajktaxkpë juuky'ajtpëtyën ets nyäkyoxtënaaytyakëtë ma ja kutujktaknën ets ja Dios tja'amyätstë,

¹² ets y'ëna'antë: Tëy jëtu'un. Ja mëjja'awën jaanty ja'awën, ja wijyajtën kejyajtën, ja mëj'ajtën jaanty'ajtën, ja kukajpxën, ja wintsë'kën, ja mëk'ajtën ets ja mëjaaw, yë'ë tu'kë'ëyë yajmooytya'ajëp xëmëkyëjxm ja nTios'ajtëmë. Jëtu'un y'itëty

¹³ Ënet tu'uk ja mëjja'aytyëjk xyajtëëyës: ¿Pën yë'ëjëty tääpë aak poop witxëpë ets maa tsyoontë?

¹⁴ Ets n'ëtsooyës: Wintsën, mijts mnija'ap. Ets xynyëmaayës: Yë'ë mëti'ipë mëj ëyo'on të tyajnaxtën ets të pyokywya'atstën mëët ja nye'pyny ja Kupixyny U'unk.

¹⁵ Paaty jam y'itë ma ja kutujktaknën ma ja Dios y'u'unyën, xëënaxy tsunaxy ja Dios tmëtuntë ma ja Dios ja tyëjkën. Yë'ë ijx'ijtëtëp këwent'ajtëtëp mëti'ipë u'unyääpyën ma kutujktaknën.

¹⁶ Ka'ap ja yuu tëëtsë t'ëkmëët'atanëtë, ka'ap nyi'ana'antë ets ka'ap y'an'ooka'antë,

¹⁷ jä'ä ko ja Kupixyny U'unk, mëti'ipë itkujky tënääpyën, yë'ë këwent'atanëtëp ijxtëm ja kupixyn këwent'ajtpën ets tyukniwowa'anëtë ja nëë mëti'ipë yajjuuky'ajtpën ets ja Dios tu'kë'ëyë ja wyiin nëë pyo'ta'aja'anëtë.