Apocalipsis 5 - Biblia Dc en Mixe de Quetzaltepec

Noky apëtity ets ja kupixyny

¹ Ënet tu'uk ja noky apëtity n'ijxyës tmëëtëty ma ja y'a'oykyë'ëjën mëti'ipë u'unyääpyën jam ma kutujktaknën. Nëkëjxy ets jootjoty ja noky wyinja'ayëty ets wëxtujkpëky tsyä'äyëty.

² Ënet n'ijxyës tu'uk ja tsajpjotmëtë kukäjpxy mëk'ajtënmëëtpë tyajtëy ets janty mëk kyäjpxy: ¿Pën paat'ajtëp tyaj'ëwa'atsëty yë noky mëti'ipë wëxtujkpëky tsyä'äyëtyën?

³ Ka pën mëpaat tkayaj'ëwa'atsy, yë'ëpaat tsajpjotmëpë, naaxwiinyëtë ets naaxpa'tkë'pë, ka pën mëpaat tka'ixy tkakäjpxy tii jap.

⁴ Ënätës jëëpyë yaxpë ntëjkëy, jä'ä ko ni pën ënety kyayajpaaty pën yaj'ëwa'atsëpën, pën y'ixëp ja noky ets yajnijawëty tii jap myëët'ajtypyën.

⁵ Tääts tu'uk ja mëjja'ay xynyëmaayës: Këtii myä'äxy. Yë'ë tu'uk ja mëk'ajtënmëëtpë, ja Judá y'u'unk y'ok, mëti'ipë David y'u'unk'ajtyp y'ok'ajtypyën, yë'ë të myëtä'äky ets tyaj'ëwa'atsëty ja noky mëti'ipë wëxtujkpëky tsyä'äyëtyën.

⁶ Ënätës n'ijxy tu'uk mëti'ipë yajtijpën Kupixyny U'unk, itkujky tyänë ma ja kutujktaknën, ma ja nimajktaxkpë juukyajtpën ets ja mëjja'aytyëjkëty. Jëtu'un kyëxë'ëky tëë yowë wyintsë'kën'aty. Wëxtujk ja wyaj tmëëtëty ets wëxtujk ja wyiin. Ja wëxtujkpë ja wyiin, yë'ë ja wëxtujkpë ja'awën mëti'ipë ja Dios të tkexyën yaa naaxwiiny.

⁷ Tääts ja mëti'ipë yajtijpën Kupixyny U'unk t'ëxajëy ja noky apëtity mëti'ipë y'a'oytsyow myëët'ajtypyën mëti'ipë u'unyääpyën jam ma kutujktaknën.

⁸ Ko t'ëxajëy, ënät ja nimajktaxkpë ja juuky'ajtpë ets ja i'px taxkpë ja mëjja'aytyëjk nyäkyoxtënaaytyakëtë jam wyintum ma ja mëti'ipë yajtijpën Kupixynyën U'unk. Ja mëjja'aytyëjk, këëkjä'ä tmëët'atë ja kow, ets näjyëtu'un tmëët'atë ja poom ato'oyën aak pu'ts pujxnpë. Jä'ä jëtu'un nyiwijy ja Dios ja'amyäjtsën mëti'ipë tyuuntëpën ja mëpëjkpëtëjk.

⁹ Ets ja jempyë ëy t'ëwtë: Mijts mpaat'ajtëp ets xy'ëxajëty yë noky apëtity mëti'ipë wëxtujkpëky nitsaaypyetyën, ets xyaj'ëwa'atsëty, jä'ä ko mijts të mwintsë'kën'aty, të xykyupety ja ja'ay ja pyoky ets ja Dios jyä'äy'atëtëty, ja ja'ay mëti'ipë tso'ontëpën ma ja it naaxwiinyëtën ets mëti'ipë kyajpxtëpën kanaakpëky ja aaw ayuk.

¹⁰ Tëë xypyëjktä'äky ets yajkutuktëty ets y'itëty teety, jëtu'unts tmëtuntëty ja Wintsën ets yajkutuktëty naaxwiiny.

¹¹ Ënätës n'ijxy ets nmëtooyës ja nimay tsajpjotmëtë kukäjpxy ko kyajpxtë myëtya'aktë na'ëwtity ma ja kutujktaknën, ma ja nimajktaxkpë juuky'ajtpëtyën ets ma ja i'px taxkpë ja mëjja'ayëtyën. Kanaak millon ja anklëstëjk ënety jam,

¹² ets y'ëna'antë mëk: Yë'ë paat'ajtëp t'ëxajëty ja mëk'ajtën, ja jotkujk'ajtën, ja wijyajtën kejyajtën, ja mëjaaw, ja wintsë'kën, ja mëj'ajtën jaanty'ajtën ets ja mëjja'awën jaanty ja'awën.

¹³ Ets nmëtooyës näjyëtu'un tëkokyë mëti'ipë ja Dios yajkojën, jam y'ëna'antë tsajpjotm, naaxwiiny, naaxpa'tkë'p ets mejyjoty: Mëti'ipë u'unyääpyën jam ma kutujktaknën ets mëti'ipë yajtijpën Kupixyny U'unk, yë'ë xëmëkyëjxm yajmo'ojëp ja mëjja'awën jaanty ja'awën, ja wintsë'kën, ja mëj'ajtën jaanty'ajtën ets ja mëk'ajtën.

¹⁴ Ets ja nimajktaxkpë juuky'ajtpë y'ëtsoowtë: Tëy jëtu'un. Tääts ja i'px taxkpë mëjja'aytyëjk nyäkyoxtënaaytyakëtë ets twintsë'këtyë ets t'ëwtajtë.